2 Kings1
1Ahab tsai kedicai Moab Israel de reniadi.2Pecai Ahaziah Samaria ga pe kibung reu ga riepwa kebam gade cakmie, nah rejam di. Cine pa samgwame langgai nah penui dage rang, “Mie delwe Baal-Zebub, Ekron rabe de keteu lo, Ih aipau rejam gade yi mi yi gailak bi kecu.”3Dede RAMPAUBE tinggimgwame Tishbeme Elijah dage rang, “Cuhlu, Samaria gwangpei samgwamedung de redau kera nghang lo, nah penuide keteu lo, ‘Israel ga Tinggwang gah kecu ziemne nang Ekron rabe, Baal-Zebub dade ma keteu lai eh lani?4Ciziemne RAMPAUBE rangzeu, “Nang cuh kelu zeulie gade nghung dailak ta; meliene, nang tsai bi zie da.”’” Pecai Elijah tetti.5Samgwame Ahaziah da cailigwanglu ge, pa penui dage rangdi, “Nnui daitei eh cailigwang lano?”6Penui pe dage rangdi, “Mipei ge anuide redau kera gwang eh pa anui dage ranggai, ‘Nnuide lang kegaibe hegwangpei da cailigwang cu, delwe pe dage ranglo, “RAMPAUBE aide rangla: ‘Israel ga Tinggwang gah kecu ziemne nang Ekron rabe, Baal-Zebub dage ma keteu kera mina langgai lani? Ciziemne nang zeu kebam zeulie de gade nghung dailakta; meliene, nang tsaibi zie da.’”’”7Ahaziah pe samgwame dage rangdi, “N da gwang eh aipau samdung de kerangbe de daikenzwa kauge no?”8Penui pecu keligai, “Pa tam le tei kelu pai ge ba la nah teigeu kiakang le pe kia nkang pwala.” Cine hegwangpei keligai, “Cide au Tishbe mepei Elijah da.”9Pecai hegwangpei kedime ge de reugwame riakngei si eh Elijah da langgai. Kedibe Elijah da pa hangdeutu ga ntum kebam ga nghang. Kedibe pecu resiu, “Nang, Tinggwang gu mina, hegwangpei rangzeu, ‘Nghunglu.’”10Elijah keli eh kedibe dage rangdi, “Ih Tinggwang mina ge liecai, peu tinggim gade mi cak mie eh ncu nah n minadung riakngei de ngkapti lu.” Pecai tinggim gade mi cak mie eh pecu nah pe minadung riakngei de ngkapti.11Hegwangpei Ahaziah kedime keda ge reugwame riakngei si eh Elijah da langgai dai. Kedibe aide de Elijah da rang, “Nang, Tinggwang gu mina, hegwangpei rangbam, ‘Zette nghunglu.’”12Elijah keligai nah penui dage rang, “Ih au Tinggwang mina ge liecai, peu tinggim gade mi cak mie eh ncu nah n minadung riakngei de ngkapti lu.” Ge Tinggwang gu mi de tinggim gade cak mie dai eh pecu nah pe minadung riakngei de ngkapdi.13Dede hegwangpei reugwame riakngei maa pe kecumbe langgai dai. Kedibe aide hang eh, Elijah dwa kwaktunglu, nah pe da penggia kia eh pedage ranggai, “Nang, Tinggwang minabo, Ih nda de kiela, a teilung nah n kilame riakngei aidungde teilung keli beulo.14Kesang, tinggim gade mi cak mie eh kedibe keraibe kena de nah penai minadung de si eh ngkapdi, dede cu a teilung keli beulo.”15RAMPAUBE tinggimgwame Elijah dage rang, “Pecu ngngwa nghung lu. Pecu hing so.” Cine Elijah cuhlu delwe pecu ngngwa hegwangpei da mie.16Pecaine Elijah Ahaziah dage rang, “Aide RAMPAUBE ne rang, ‘Ekron rabe Baal-Zebub dage ma keteu kera nang samgwame de langgai. Israel ga Tinggwang gah kecu ziemne ni nang pe dade ma keteu lu kera? Cine cu, nang cuh kelu zeulie gade nghung dailak ta; nang tsai bi zie da.’”17Hegwangpei Ahaziah tsaidi Elijah ne RAMPAUBE sam rangkegai nzwa eh. Judah gwangpei Jehoshaphat napei Jehoram hegwang tei kelu mmi kena bekum Joram pe bam leu eh hegwang teilu, kedanemene Ahaziah pe napei gah kecune.18Ahaziah ma kedadung teikedi be au, Israel gwangpeidung hakwak gage raupwa meni?
Bridge Connectivity Solutions Pvt. Ltd.