Corinthiame Kenabe4
1Tinggwang ngaugia gade zierang ta aide anui ngau kelu nzwa, anui lung ceudi lama.2Ciciu meliene, kebai pwa kebam hengam dungde anui gi dida, mide kecwa ga tetla meda mede Tinggwang sam kemak de rang meda, dede kesangbe teu teilia eh, Tinggwang dwagade anui mina leune lungning kemzuibe tei lala.3Dede anui samliakeyi paukelade de kebaidi liecai, cide au kapdi keramedung dade kebai dida,4Kideube rabe penui, nlumkemakme peusuidung teimang dida, iciu eh penuide peu Khrista,Tinggwang rehibe kendu samliakeyi kebaa de peu ngau melu kerane.5Kedanemene anuikatei anui zierang tei ma, dede Khrista Jisu au Rampaube lie eh nah anui au Jisu ziemne nnui kilamedung lie zierang teila.6Kedanemene, “Kemui gade kebaa baapet dizie,” de eh kerang de au Tinggwang, pa anui nlung ga baa kebambe, Tinggwang kendu kebaa maci de Jisu Khrista zu gade anuide peu kerane.7Dede anui mahei aide tangdei lidung ga bam, iciu eh kengkieng kedi de anui da bam ma dede Tinggwang da bamlie kecu keulia lu kerane.8Anui kehei leuga keherei bam dida, dede pungpai gailak dima. Anui sui mang dida dede suihak gah dima.9Anuide teikeherei süt dede püt dima. Anuide teingkau mie dede teimsia dima.10Anui pum gage Jisu tsit de anui pungla muila, ciciu eh Jisu teilung de anui pumdung gade keulialu kerane.11Kedanemene anui ring kebamme Jisu ziemne ketsai kengngi ga la muila, iciu eh Jisu teilung de anui ketsai pumteih gade keulialu kerane.12Cine ketsai au anui da bata teibam, dede kering nnuida bata teibam.13Dede cide raupwa kela nzwa rabe gade anui kenlum au nsam ciau: “Ih nlumlu; cine Ih rangla.” Anui de nlum; cine anui de rangla,14Jisu de kwakcuh kelube anuide de Jisu de ngngwa kwakcuh luzie nah anuide nnuide ngngwa pedwa gwang zielie kecu ci eh.15Kedanemene aidung pelane nnui ziemne da, ciciu eh ngaugia mina da gwang reureulu eh Tinggwang kendu ketwa de peu kieesi lu kerane.16Cine anui lung siadi lama. Meliene, anui pumteih siala liede, anui rabe de tingba ramsang ne teiheci beula.17Kedanemene anui ting kaknage keherei kegai gade mdet canggai kelak kelungta kendu mdet anuide pwapeu bamlu.18Anui ngau kelabedung de pie bam ma, dede ngau kemakbedung de. Kedanemene ngau kelabedung au tingkak nage ziemne, dede ngau kemakbedung au kelungta ziemne.
Bridge Connectivity Solutions Pvt. Ltd.