2 Heleuhha7
1Cu Hegwangpei Solomon kekie teicang dige, tinggim gade mi cak mie delwe keru recadung nah ratakdung rudi, nah RAMPAUBE kebaa le kerecaki puidi.2Cingkumedung RAMPAUBE ki ga lüt gailak di, kedanemene pe kebaa le pe ki pui kedine.3Israelme mina pelane mi cak mie kecu nah RAMPAUBE kebaa kerecaki reuga kebam ngau luge, penui hangdeu ga, tangtsu kam kenzeu reuga penui zudung keumielu delwe RAMPAUBE de reca nah hetwa peugai. Penui ranggai, “Pa au yilie, kedanemene pe samkakkelu samsang de kelungta bam mui lalu.”4Cine hegwangpei nah mina pelane RAMPAUBE de ratakdung peugai.5Hegwangpei Solomon ketumseu cang ngkai-kena nah meurün nah hemeudung 120,000 ratak ge teigai. Iciu eh hegwangpei nah mina pelane ngngwa Tinggwang kerecaki teimci gai.6Cingkumedung, penuide ramsiak kebeu nidung ga saplu; penuide ncwa eh Levime de saplu delwe hegwangpei David ne mtei kebeu leinetdung pwa lei tei eh RAMPAUBE de ketwa peu, “Kedanemene pe samkakkelu kesamsang au kelungta bammui kelane.” Cingkume pelane penui dwaga teluidung kwagai, nah Israelme pelane saplu.7Solomon RAMPAUBE kerecaki dwa ga kigu sum de teimci lu. Cikage pa keru recadung nah kekangbau recadung ca rugai, kedanemene pa teikelu hetageu recabam de keru recadung, mei recadung, nah macadung ziemne nrum zu kedine.8Cine Solomon cidau lang henane paiki ngyi bamlu nah Israelme pelane pecu ngngwa, baudi kedi ge ngkwalu, Lebo Hamath gade Egypt reuceuna ga kecang.9Lang heset ne benai penui baudi bam sünne lu, kedanemene penui recabam de teikemci tingbazie lang henane teu kedine, nah lang hena hengyi kedine.10Kei hena bekei zie ngkai-kecum benai, Solomon au minadung de penui mlung suiyile kepui tei eh penui kidung gage lang gaidi kedanemene Rampaube David, Solomon, nah pe mina Israel dage pe zaikeyi pwalia kegaine.11Cinzwa eh Solomon RAMPAUBE ki nah pekatei pe ki teicanglu. RAMPAUBE ki nah pekatei pe ki ga tei kera Solomon riem kelude, pa tei hemi süt eh teilu.12Matie mene RAMPAUBE tingmui Solomon de peu pecu ngaugai eh pe dage rangdi, “Ih n kekie siulu da, nah Ih heni aide a ziemne ratak ki ge tei kerane kedet luda.13Magade Ih tinggimdung ngkuidi iciu eh cika tingrui gadi lulo beu, mede Ih tangriem de kideube tyeilu kerane aja kaicai, mede Ih a minadung dage mateei langgai cai,14magade a zi gade qukelu a minadung, penuide tei henah, kie, acu peei, nah penui kemau tei kela gade nreulu cai, Ih tinggim gade siu luzie, nah penui mau gibeu zie, nah penui deu teingkei beu zie.15Cu a miak mrak luzie nah heni aikade kekie tei kegaidung a kwen siulu zie.16Kedanemene Ih cu ki aide kedetlu eh teimci luda iciu eh peu a zi cika bammui lu kerane. A miak nah a mlung tingba ramsangne cika bammui zie.17Nang, n pei David nzwa a dwaga tetla lu cai, Ih ncu teilo kebeu leune teimzai lucai nah a zaidung nah a ajadung kaizeu lu cai,18iciucai Ih n hegwangram hegwangbam de teucuh beu zie, Ih n pei David de ngngwa samkakkelu ga rang kenzeu nzwa, Ih, ‘N leuhme ge madaude Israel ga hegwang teita dilak,’ de eh kerang de.19Dede nnui nreu tet dicai, nah a zaidung Ih nnuide pwa kepeu ajadung gidi cai, nah nnui mie hera kedadung de reca eh cidungde dwa keumie cai,20Iciucai Ih penuide pwa kepeu a hangdeu gade keugi dizie. Ki aide Ih a zi ziemne teimci kelude Ih a dwa gade keugi dizie, nah Ih cide teu sam kerang ge nah mina pelane kakga henui ge tei dizie.21Cu kerecaki aide piage mlang süt bam de, mina cide kahkegwang leune de keheu dizie nah rata kwa rang dizie. Penui keteu zie, ‘Daitei RAMPAUBE hangdeu aide nah kerecaki aide gage aiciu teigai dino?’22Kedame sam keli zie, ‘Kedanemene penui RAMPAUBE, penui Tinggwang, pa penui paume de Egypt deu gade ngngwa mpet kebeube de gi kedine, nah penui hera kedadung de luulu eh cidungde dwa keumie nah cidungde de reca kedine. Ciziemne RAMPAUBE kekap aidungde pelane penui reu gage teugwang gai beuda.’”
Bridge Connectivity Solutions Pvt. Ltd.