2 Heleuhha35
1Josiah Jerusalem gade RAMPAUBE de kerüt gade Kahkegwangngyi hengyilu, nah penui hekei raitube kei ziangreiehmdai benai Kahkegwangngyi meurünnadung gilu.2Pa cingkume de penui ta tei keradung ramsiak beu nah RAMPAUBE ki ga heta tei hemi lulo penuide kecunggai.3Pa Levime Israel pelane de keledeume nah RAMPAUBE ziemne kedet ntsam kelu medung dage rangdi, “Israel gwangpei, David napei Solomon ne tei kelu ki gage samkakbung kemci de kailu. Nnui hekeutu gage cide pung rwa sila tadi. RAMPAUBE nnui Tinggwang de recalu, nah pe mina Israel gwa teilu.4Israel gwangpei David nah pe napei Solomon rangkebeu rau kenzeudung de mzuilu eh nnui pautsa nah nnui mzidung rehi gade nnuide mteilu.5Nnui mzidung, nnui sinamedung pautsa kelak de ngngwa kemci ni ga nnui saplu, nah Levime pautsa kelak kakga nnui mzidung ga ngngwa nnui bam ga bamlu.6Kahkegwangngyi meurünnadung gilu, nnuikatei nnuide teimcilu, nnui siname ziemne meurünnadung de mteilu, RAMPAUBE sam Moses dage peu kebeude nzwa teilu kerane.”7Josiah minadung gwang kebam pelane de Kahkegwangngyi reca ziemne pe kauhaudung gade meurünna nah hemeuna cang camrei pwapeu. Pa ketumseu cangcum de si eh pwapeu; aidungde pelane hegwangpei mabam gade pwapeu.8Pe kangga muiteumedung suiyi mapeu minadung de, cingkume, nah Levime de pwapeu. Tinggwang kerecaki kerengei peuteume Hilkiah, Zechariah, nah Jehiel, penui cingkume de makaune keceubedung 2,600 nah ketumseu haicum kahkegwangngyi recadung ziemne pwapeu.9Levime muiteu kedime, Konaniah, nah Shemaiah nah Nethanel, pe sinabe kena, nah Hashabiah, Jeiel, nah Jozabad, Levime de makaune keceube cangmengei nah ketumseu haimengei Kahkegwangngyi recadung ziemne peu.10Iciu eh nzui gwang kera mteilu, nah cingkume penui bam ga bamlu, Levimedung de penuide mzi kebeu ga, hegwangpei ne rang kebeu nzwa.11Penui Kahkegwangngyi meurünnadung gilu, nah cingkumedung Levime ba gade penui hejai pwa kelude kezingai, nah Levime meurünnadung geu gaudi.12Penui keru recadung de keu mpetlu, cidungde pautsa kelak mzidung gage mzi gaibeu kerane, Moses Laisiukwak ga rauteu kela nzwa RAMPAUBE de pwapeu kerane. Penui ketumseudung de de aide nzwa siakte teilu.13Penui Kahkegwangngyi meuründung de hezai de mzui eh rulu. Teimcikelu recadung cai, penui lidung, tegwalidung, nah likiemdung gage swalu, nah penui cidungde minadung pelane dage pungmie kelwabeudi.14Pecaine penui katei ziemne nah cingkume ziemne penui recadung teleilu, kedanemene cingkume, Aaron leuhme, keru recadung nah maca tingmui nlütcu kecang pwa reca nnang süt kebamne, cine Levime penui ziemne nah cingkume, Aaron leuhme ziemne recadung mteilu.15David ne nlum kebeu nzwa lei keteime, Asaph leuhme, penuide nlumkebeu niga bamlu, Asaph, Heman, nah hegwangpei gu caihakecibe Jeduthun, nah kekwame kirie leune ga bam. Penui penuide nlumkebeu nide gidi ma, kedanemene penui siname Levime penui ziemne mtei kebeune.16Cine, cipau tingdau RAMPAUBE de reca gwang kecu teilu Kahkegwangngyi de mnei kera ziemne, nah RAMPAUBE recabam gage keru recadung recagai beu kerane, hegwangpei Josiah ne rang kebeu nzwa.17Cipau tingdau Israelme cika kebamme Kahkegwangngyi mnei lu, nah pecai Cehikaikemak Tangku Ngyi lang hena ne kecang hengyilu.18Israel ga aikenzwa Kahkegwangngyi hengyi cu madau de caihakecibe Samuel tingdau gade hengyi ma, mede Israelme hegwangdung keda migede Josiah hengyi kelu nzwa Kahkegwangngyi aikenzwa hengyi ma, cingkume, Levime, nah Judah ga kelunghme pelane, nah cika kebam Israelme, nah Jerusalem ga kelunghme pelane de si eh.19Josiah hegwang tei kelu mmi kereieheset bekum Kahkegwangngyi aide mneilu.20Aidungde pelane tei kelucai, Josiah kerecaki tei petau tei luge, Egypt gwangpei, Necho, Euphrate Reuki ga Carchemish gade regi kerane hang, nah Josiah pecu ngngwa regi kera mie.21Dede Necho samgwame pe dage langgai eh ranggai, “Ih ncu ngngwa daipai ge tei kera bamno, Judah gwangpei? Henai Ih ncu renia kera gwangla ma, dede Ih ngngwa hereu tei kebamme kilungme de renia kerane. Tinggwang acu kelwa lulo rangbeu da, cine Tinggwang, acu ngngwa kelabe de renia so, mecai pa ncu ngkap dizie.”22Iciuliede, Josiah pe dade nreutet raudi. Pa pecu ngngwa regi kerane perehi teitsam lu. Pa Necho sam Tinggwang dade kegwang de kingnei ma; cine pa Megiddo langkam ga regi kera miedi.23Lakpi kekapme Hegwangpei Josiah de kapdi, nah hegwangpei pe kilame dage rangdi, “Acu ngngwa tetdi kedanemene acu rezam msiasüt dida.”24Cine pe kilame pecu bagi gade ngngwa mpet lu, delwe pe bagi kedabe gage pecu kailu. Penui pecu Jerusalem ga ngngwa gwangdi, cikade pa tsaidi. Pecu pe paume raukie gage kungdi. Judah nah Jerusalem ga mina pelane Josiah ziemne heei eh hapdi.25Jeremiah hegwangpei Josiah ziemne lei mpokgai; mipei nah mipui lei keteime pelane Josiah ziemne henai kecang de teila. Lei cidungde Israel ga hezai gedi; ainie, leidung cidungde kehap leidung gage raupwa bam.26Josiah tei kegwang kedadung, nah RAMPAUBE zai ga raupwa kebamdung de samzai tei eh heta keyi tei kegaidung,27nah pa tei kegaidung, kerai gade penli kecang, Judah nah Israel gwangdung ha laisiukwak gage raupwala.
Bridge Connectivity Solutions Pvt. Ltd.