2 Heleuhha33
1Manasseh pa hegwangpei tei kelu dau mmi kereiehkena di; pa Jerusalem ga mmi riakngeiehmengei hegwang tei.2RAMPAUBE miakngau gade pa kemau teidi, RAMPAUBE pe mina Israelmedung dwa gade penuide gwa kelüt dau hangdeube gade gwa mpet kedi leuhdung kemneeu tadung ketei nzwa.3Kedanemene pa pe pei Hezekiah ne tei msia kedi nidung de retak dailu, nah Baal de reca kera ziemne recabamdung teilu, pa Asherah miedung de teilu, nah pa tinggim ga kebam gidung leune da keumie eh reca di.4Manasseh RAMPAUBE ki gage nlum kemakme recabamdung teilu, RAMPAUBE, “Jerusalem ga a zi kelunghta bam zie,” de eh aja kaibeu liede.5Pa RAMPAUBE ki kigu kena gage tinggim ga kebam hegidung pelane ziemne recabamdung tei gai beu.6Ben Hinnom langkam gade pa pe namedung de teu ratak tei eh keru reca tei gai. Pa reka tadung teila nah pa hebariet piela, nah pa ketsaime de mpau kelame nah herabe de mpau kelame dade ma keteu. Manasseh RAMPAUBE miakngau gade kemau tei sütdi, nah pa pe rata teidi.7Pa mamie tei kelu de pa Tinggwang ki gage kailu. Tinggwang David nah pe napei Solomon de aipau ki ha de rang kebeu; pa ainzwa eh ranggai, “Aipau ki gade nah Jerusalem gade, Ih a zi kelunghta peu bam kera, Ih Israel leuhdung pelane gade kedet luda.8Ih Moses dade penuide kai kebeu hezai pelane mzui eh, Ih penui de aja kai kebeu pelane mzui siakte lucai, Ih penui paume de kepeu deu gade Ih Israelme de gwa mpet dai silakta.”9Manasseh Judah nah Jerusalem ga kelungh minadung de ngngwa ndaa RAMPAUBE ne Israel minadung dwa gade gwalüt eh gwagi kedi leuhdung kemau ketei swade kemau diki kecudung teidi.10RAMPAUBE Manasseh nah pe minadung de mrai ranggai, dede penui pe samde kingnei meidi.11Cine RAMPAUBE Assyria hegwangpei reugwamaa muibedung de peu penuide gwalüt, penui Manasseh de tuihlu, pecu hegeuria le kangdi delwe pecu Babylon ga ngngwa miedi.12Manasseh pe lungrei le pui kedi dau, pa RAMPAUBE, pe Tinggwang dade kengha kiegai, nah pe paume Tinggwang dwade pa henah sütlu.13Pa pe dage kekie teigai, nah Tinggwang pe kekie luulu, nah Tinggwang pe kekie kingnei lu, nah pecu peu Jerusalem ga cailigwang hegwang tei dailu. Cidau Manasseh RAMPAUBE au Tinggwang lie kecu ci mci lu.14Aipau cai, Manasseh David namdi gwale kirie ge tei silu, Gihon naimiak kenlütle ga, langkam gade, Heka Rieki ga kecang. Pa Ophel deutu de tei twagwalu nah kirie de tei cehu sütlu. Pa Judah ga tsukwa kwa kelu namdidung leune ga reugwa kekuu muiteubedung de kailu.15Pa sangme rabedung keu gidi, RAMPAUBE ki gade mamie keu mpetdi, nah RAMPAUBE ki teipwa kebam deutu ga nah Jerusalem ga nlum kemakme recabamdung pa tei pwa kebam leune de, cidungde namdi gwale ge kelien gidi.16Pa RAMPAUBE de kerecabam de tei dailu nah cikage kekangbau recadung nah ketwa reca ratakdung tei gaibeu; pa Judah de RAMPAUBE Israel Tinggwang de reca lulo aja kaigai.17Ciuliede, minadung kereca nidung gage ratak teigai la, dede penui cidungde RAMPAUBE penui Tinggwang de rünne teigai beula.18Manasseh tei kegai leune, pa pe Tinggwang dage kekie tei kegai, nah caihakecime RAMPAUBE Israel Tinggwang zi teu eh pe dage kerang samdung leune, ainie, cidungde Israel gwangpeidung batadung gage raupwa la.19Cipau laisiukwak ga pe kekie ha, nah Tinggwang dainzwa pe lung nreulu dibi de kecude la. Pa pecu tei henahlu kemak dwa, pe mau pelane, nah pa hezai gikah kedidung nah pa nlum kemak reca nidung tei kegai bamdung nah herabe pui Asherah miedung tei ncuh kegai nidung nah reca kecu miedung teikegai hadung de bam, cidungde Caihakecime Laisiukwak gage raupwala. 20Cine Manasseh pe paume de ngngwa tsaidi, nah penui pecu pe ki gage kungdi, nah pe napei Amon, pe bam leu eh hegwang teilu.21Amon pa hegwang tei kelu dau mmi ngkaiehkena di, nah pa Jerusalem ga mmi kena hegwang tei.22Pa pe pei Manasseh nzwa eh RAMPAUBE miakngau gade kemau teidi. Amon pe pei Manasseh tei kelu mamie leune de ratak tei pwa peu nah pa cidungde de reca di.23Pe pei Manasseh tei kegai nzwa, pa RAMPAUBE dwa gade henah lu tadi. Meliene, Amon aipaude kemau tei si reureu di.24Pe kangga kilame kebam heciem tei eh pecu pe ki gade teitset di.25Dede cika kelungh minadung hegwangpei Amon de tei ketsetme pelane de teitsetdi, nah penui pe napei Josiah de peu pebam leu eh hegwang teilu.
Bridge Connectivity Solutions Pvt. Ltd.