2 Heleuhha18
1Cu Judah gwangpei Jehoshaphat mahei sütlu nah hetwa de pung sütlu. Pe kelak gade hangge Israel gwangpei Ahab napui depeu ngngwa lunghlu, ciu eh pa Ahab de ngngwa yilu.2Mmi kiee kemakge cai, pa Samaria namdi ga Ahab de dau kera hung. Ahab pe ziemne nah pecu ngngwa kela minadung ziemne meurün nah ketum kekiee ge gilu. Delwe Ahab Jehoshaphat de pecu ngngwa Gilead ga Ramoth namdi de gwaketang kera pe lung teigai.3Israel gwangpei, Ahab, Judah gwangpei Jehoshaphat dage rangdi, “Nang acu ngngwa Ramoth Gilead namdi ga mie zie mi?” Jehoshaphat pe sam keligai, “Nang mtei lude Ih mtei luda, nah a reugwame n reugwame nzwada. Hereu ga anui ncu ngngwala zie.”4Jehoshaphat Israel gwangpei dage rangdi, “Kehereide RAMPAUBE sam daige keli ziebi pie rai lugo.”5Cine Israel gwangpei Ahab caihakecime hai mdai gede qu hekwa ncütlu nah penui dage rangdi, “Anui mie Gilead ga Ramoth namdi de regi ziemi, mi lak no?” Penui keligai, “Gwaketang lu, kedanemene Tinggwang ncu ngkieng kelu peu zie.”6Dede Jehoshaphat keteudi, “Anui RAMPAUBE sui keteu kera, caihakecime kedame aika ga deni?”7Israel gwangpei, Jehoshaphat dage rangdi, “Mi hangge bam si reu anui RAMPAUBE sui keteulu kera, pa Imlah napei Micaiah. Dede Ih pecu ngkau kedanemene pa madaude a ziemne caiha keyi rangbeula melu, dede kesiabe mui lie.” Dede Jehoshaphat rangdi, “Hegwangpei cide rang kerabe ma.”8Cine Israel gwangpei kedime gede qulu nah rangdi, “Zette mie Imlah napei Micaiah de ngngwa gwang lulo.”9Cu Israel gwangpei Ahab penai Judah gwangpei Jehoshaphat penai hegwang paini teu lwe Samaria kirie gwale hecaipung ga penai hegwang bam ga ntum bam, nah caihakecime pelane penai dwa ga caihakeci sam rangbam.10Kenaanah napei Zedekiah pa ne hegeu teki ge teilu nah rangdi, “Aide RAMPAUBE rangla: Aide le nang Aramme de ngngwa regi zie penuide ngamlu kemaktane.”11Caihakecime pelane caihakeci sam nzwakap eh rangdi, “Ramoth Gilead namdi de gwaketang lu nah ngkienglu, kedanemene RAMPAUBE ncu ngkiengkelu n ba gage peudi delu.”12Micaiah de qu zielie mie kedi samgwabe de pe dade rangdi, “Pielo, caihakecime ket tei eh hegwangpei ngkienglu kera caiha rang dida. Peu n sam de penui samdung ga samdau lulo nah ngkienglu kera sam rang lulo.”13Dede Micaiah sam keligai, “RAMPAUBE ring kela nzwa, Tinggwang rang kebeube rünne Ih rang zie.”14Micaiah hegwangpei Ahab da kegwang dau, hegwangpei pe dage rangdi, “Micaiah, anai Ramoth Gilead namdi de renia kera mie zie mi lak no?” Micaiah pecu keligai, “Gwaketang cu nah ngkienglu! Kedanemene cide ngkiengkelu kedi ge zie.”15Cidau hegwangpei pe dage rangdi, “Ih ncu pia daikiee ge n sampet RAMPAUBE zi gade a dage kesangbe rünne rang kera ranglai no?”16Cine Micaiah rangdi, “Ih Israel pelane, lamlwatudung ga meuründung penuide kekwabe gah eh zangra kela nzwa bam eh ngau, nah RAMPAUBE rangdi, ‘Aidungde au muiteube gah. Peu mina keheibede de pe lung nciep eh pe kilung cailigwanglu.’” 17Cine Israel gwangpei Jehoshaphat dage rangdi, “Pa a ziemne caiha kesia gwale keyi rangla melie kecu Ih ncu ranglia meni?”18Cidau Micaiah rangdi, “Ciziemne nnui pelane RAMPAUBE sam kingnei lulo: Ih RAMPAUBE pe hegwangbam ga ntum kebam ngau, nah tinggim gwame pelane pe hile nah zetle sap bam.19RAMPAUBE keteu, ‘Caune Israel gwangpei Ahab de cwa eh pecu peu Ramoth Gilead namdi ga mie eh kaudi lai?’ Mige madungge rang nah kedame keda dungge rangdi.20Cidau rabe ge tet pet eh RAMPAUBE dwa ga gwang saplu eh rangdi, ‘Ih ne pecu cwa beuzie.’ RAMPAUBE pe dade keteu eh, ‘Dainzwa eh?’21Rabe de sam keligai, ‘Ih mie zie nah Ahab caihakecime pelane mui ga Ih kenret rabe ge dizie.’ RAMPAUBE keli eh, ‘Nang pecu cwalu zie, nah nang ngkienglu zie.’ Cu mie delwe tei cu.22Cu pie lulo, RAMPAUBE ngu caihakecime aidungde mui gage kenret rabe kaigai dida nah RAMPAUBE n ziemne kesia ge gwang kera sampet dida.”23Pecai Kenaanah napei Zedekiah Micaiah da hang eh pe bia kepeu, nah rangdi, “RAMPAUBE Rabe nda gwang marang kera a dade dai lambie tet gaidi no?”24Micaiah keligai, “Pielo, nang kibung dungge helung lebie mbai kera pak nlüt de, nang cipaunai cilu zie.”25Israel gwangpei kilamedung kangge dade rangdi, “Nnui Micaiah de tuilu delwe pecu namdi gu deuceudi Amon nah hegwangpei napei Joash da ngngwa mie cu.26Nnui minadung pe dade, ‘Hegwangpei ne ainzwa ranglie de eh ranglu: Aipau peide de hebaangki gage kaidilu nah pecu tangku penai dui ceuna ge gwale peu so, Ih kwak eh cailigwanglu kemaktane.’”27Cidau Micaiah hemaabe dage ranggai, “Nang kwak eh cailigwanglu cai, RAMPAUBE a dage marang gai meda.” Delwe pa rang si gai, “Aide kingneilu, nnui mina pelane.”28Cine Israel gwangpei Ahab penai Judah gwangpei Jehoshaphat Ramoth Gilead namdi de renia kera miedi.29Israel gwangpei Jehoshaphat dage ranggai, “Hereu ga kemie dau Ih a rehi teitsam dizie, dede nang au n hegwang paini teulu.” Cine Israel gwangpei pe rehi teitsamlu delwe penui hereu ga miedi.30Aram gwangpei pe bagidung keteu kedime dage aja kai gai, “Reugwame kenlangme mede nlang kemakme de gwaketang helo. Meliene Israel gwangpei de rünne gwaketang lu.”31Cidau bagidung keteu kedimedung Jehoshaphat de ngaulu ge penui rangdi, “Cide Israel gwangpei da.” Cine penui pecu gwaketang kera nreu gwang, dede Jehoshaphat sahbak gai nah RAMPAUBE pecu ngha beu. Tinggwang pe dade penuide peu nreu tetdi.32Pecai bagidung keteu kedimedung pa Israel gwangpei kemak ngau luge, penui pecu gwazui kela gade cailidi.33Dede mige pe lakpi keu mpet pesuira tei kapgai ge Israel gwangpei Ahab reunet ketamtwak kak gage kapti. Pecai Ahab pe bagi keteube dage rangdi, “Nreu gwanglu nah acu hereu gade pung mpet beulo, kedanemene acu rejamsüt dida.”34Cipau nai hereu tei ntei sütdi, nah Israel gwangpei Ahab pe bagi reuga tinghegi kecang dungpung bamdi, Aramme de mcwa lwe. Tingnaimiak kenlüt dau, pa tsaidi.
Bridge Connectivity Solutions Pvt. Ltd.