2 Heleuhha15
1Tinggwang Rabe Oded napei Azariah reuga gwanglu.2Pa Asa de redau kera mie eh pe dage rangdi, “Akwa kingnei lu, Asa, nah Judah pelane nah Benjamin: RAMPAUBE nnuide ngngwala, nnui pecu ngngwa kela dau. Nnui pecu peei cai, pecu nnui ngau luzie; dede nnui pecu gidi cai, pa nnuide gidi zie.3Cu peting ketie ge ziemne, Israel au Tinggwang kesangbe de sita di, cingku keledeu nah hezai de si tadi.4Dede penui rei gade penui RAMPAUBE Israel Tinggwang da nreugwang luge, nah pecu peei luge, penui pecu ngaulu.5Cipauting mbeu kelame ziemne lungciep bam lama, mede aika mbeu kegwangme ziemne liede; meliene, keherei süt kecu hangdeu cidung ga kelunghme pelane da bamla.6Penuide au pang kecai dila, heleuh ge kedage de renia, nah namdi ge kedage de renia, kedanemene Tinggwang penuide keherei ketsamtsam pelane teugwang teikeherei kegaine.7Dede ngkieng lu, nah peu n ba de mnei diso, kedanemene n tatei de ziemne ziehi peu zie kecune.”8Asa, sam aidungde siu luge, caihakecibe Oded caihasamdung de, pa pelung kuu lu eh Judah nah Benjamin deu pelane gade kemneeubedung, nah pa kideutu deudi Ephraim namdidung gade pa tui keludung de gwa gidi, nah pa RAMPAUBE recabam tei dailu, cide RAMPAUBE kerecaki kigu dwaga bamla.9Pa Judah nah Benjamin pelane de hekwa lu, nah penuide ngngwa lungh kebamme de, Ephraim nah Manasseh, nah Simeon leuh gade. Kedanemene penui pe Tinggwang RAMPAUBE pecu ngngwa kela ngau keludau Israel gade mina kekiee ge peda gwang kelune.10Cine penui Asa hegwang tei kelu mmi kereiehmengei bekum, keicum dau Jerusalem ga gwang ngkwalu.11Cipaunai penui hematui kelu teugwang kebam gade penui RAMPAUBE dage ratak teigai beu: ketumseu hai hena nah meurün nah hemeudung cang hena.12Penui nlüt penui paume Tinggwang, RAMPAUBE de peei kerane penui mlung nah penui keringria pelane teu eh samkak ge teilu.13Penui Israel Tinggwang, RAMPAUBE de peei laklie kedime de teitset di kera kesuisamlu, hecing, hena, mipui, mipei liede.14Penui RAMPAUBE dage teluidung nah tekiidung kwagai nah sah eh sampet gai.15Judah pelane samkak cide penui suilu, penui mlung pelane teu sampet kelune, nah penui lung pelane teu Tinggwang de peei gai, nah penui pecu ngaulu. RAMPAUBE penuide twakenggwa pelane dade lungciep peu.16Hegwangpei Asa pe pai, Maacah de hegwangpui tei kebam gade keu mpetdi, kedanemene pa Asherah mie keu kemneeu mie ge tei kegaine. Asa kemneeu mie cide bikau mie rüt takcaidi, delwe cide Kidron reuki gade rudi.17Dede reca nidung de au Israel gade keumpet dima. Iciu liede, Asa au pe teilungzie pelane lungsang tei eh gwang.18Pa rangkanggeu, nah kecak nah lidung pe pei penai heta tei kera teimci keludung de Tinggwang kerecaki ga teu nlütlu.19Asa hegwang ketei mmi camreiehmengei kecang au hereu tei ma.
Bridge Connectivity Solutions Pvt. Ltd.