2 Heleuhha13
1Hegwangpei Jeroboam hegwangtei kelu mmi kereieheset bekum, Abijah Judah reu hegwangtei cuhdi.2Pa Jerusalem ga mmi kecum hegwangtei; pe pui zi au Macaiah, Gibeah mepei Uriel napui. Abijah penai Jeroboam kakga hereu teidi.3Abijah hereu ga mie kera mina 400,000 kedetlu, reugwamaa ngkieng, kekuu reugwame de ngngwalwe. Jeroboam pecu renia kera mteilu, ngkieng, kekuu reugwame, mina 800,000 de kedetlwe.4Abijah Zemaraim Deutu ga saplu, cide Ephraim lamlwatu deudi kideutu ga bam, nah ranggai, “Akwa kingnei gailo, Jeroboam nah Israelme pelane!5Nnui RAMPAUBE, Israel Tinggwang, David nah pe napeidung de ngngwa samkak ge teilwe pecu peu kelunghta Israel reu di kera peu kedi ci meni?6Dede Nebat napei Jeroboam, David napei Solomon kilabe, cuhlwe pe mpaube de reniadi.7Kemta kaudung, suisam kaudung, peda gwang ngkwalu. Penui Solomon napei Rehoboam de gwang renia, Rehoboam hena nah heta tei cima nah penui dwa sapgai kelak tingdau.8Cine nnui cu RAMPAUBE hegwangram David leuhme ba ga kebamde de renia kera riemlu, nnui au reugwamaa kedi ge kecune, nah nnui rabedung tei kerane Jeroboam ne tei kebeu kecak tumnadung bam kecune.9Dede nnui RAMPAUBE cingkumedung, Aaron leuhme, nah Levimedung de gwa mpet di meni, delwe heleuh kedadung ga lungh kelamedung nzwa, nnui gu cingkumedung kedetlu di meni? Keheibe de, ketumseuna ge nah meurünseu hena pwa ratak tei zielie kegwangbe de peu rabedung kemakbe cingku tei dila.10Dede anui au, RAMPAUBE au anui Tinggwang, nah anui au pecu püt dima. Anui da au Aaron leuhme gade cingkumedung bam, RAMPAUBE gwatei eh, nah Levimedung, penui ta tei kebamme.11Tingcang nah tinghegi ramsang penui RAMPAUBE ziemne keru recadung nah marim keyi kehengui rula. Penui taktyeibam kemci gage Tinggwang de reca kebeu tangku de mtei beula; penui kecak mitaubam mitaubungdung de si eh penui tinghegi ramsang ru kera ziemne mtei lula. Anui Tinggwang, RAMPAUBE ajadung anui mzai la, dede nnui au pecu püt dida.12Ainie, Tinggwang au anui mapie la, nah pe cingkumedung au aika lalie telui pwalwe nnuide renia kera qugai kerane. Israelmedung, RAMPAUBE de ngngwa regi so, nnui paumedung Tinggwang de, kedanemene nnui ngkieng gailak lu.”13Dede Jeroboam penui caile de ketang kera mteilu; pe reugwamaa Judah dwaga la, nah ketang kera maa penui caiga la.14Judah nreugwang pie kegai dau, ainie, keregi kecude penui dwaga nah penui caiga de ladi. Penui RAMPAUBE dage sahgai, nah cingkumedung teluidung kwagai.15Pecai Judahmedung sah gai. Penui sahgai ge, Tinggwang Abijah penai Judah dwa gade Jeroboam nah Israelme pelane de ngamlu.16Israelme Judahme dwa gade pakdi, nah Tinggwang penuide Judahme ba gage kai beudi.17Abijah nah pe reugwamaa penuide teitset ngkiee sütdi; Israel kedet kelume 500,000 tsai kaudi.18Ainzwa eh Israelme de cidau ngamdi; Judahmedung ngkieng lu kedanemene penui RAMPAUBE, penui paumedung Tinggwang de ngngei kelune.19Abijah Jeroboam de zuimie; pa pe dade namdidung tuilu: Bethel nah Jeshanah nah Ephron nah cidungde twagwapung kebam renamdung.20Jeroboam madaude Abijah tingdau kengkieng ngau dailu tadi; RAMPAUBE pecu kedeudi, nah pa tsaidi.21Dede Abijah ngkieng reureu di; pa pe nau kereiehmdai teilu nah pe na mipeina ngkaiehkena nah mipuina kereieherok lunghlu.22Abijah batadung kedabe, pe zaireli, nah pe samdung caihakecibe Iddo hakwak gage raupwala.
Bridge Connectivity Solutions Pvt. Ltd.