2 Heleuhha1
1Hegwangpei David napei Solomon de pe kedih teingkieng beu, nah RAMPAUBE pe Tinggwang pecu ngngwala nah pecu tei ngkieng süt beu.2Solomon Israelme pelane de, pecang nah pehai reugwamuibedung, nah tutiakmedung, nah Israel pelane ga kedihme leune, nah kelak peumedung dage marang gai.3Cine Solomon nah pecu ngngwa kela hemaabe pelane Gibeon namdi ga kebam reca ni ga miedi, cika Tinggwang kebam paiki de kebamne, RAMPAUBE kilabe Moses, hetaideu gade tei kelude.4Dede David Tinggwang Samkakbung de Kiriath Jearim namceu gade pa cide ziemne heni mteipwa kebam gage pwa nghang gailu, kedanemene pa cide ziemne Jerusalem ga paiki ge teipwa kebam ne.5Ci rünne mene, hetageu recabam Hur capei Uri napei Bezalel ne tei kelude RAMPAUBE kebam paiki dwa ga kebam ne; Solomon nah mina ngkwa kebamme cika miedi. 6Solomon hetageu recabam ga RAMPAUBE dwa ga nghanglu, RAMPAUBE kebam paiki, nah keru recadung cang ge cikage reca tei gaibeu.7Cipau ziude Tinggwang Solomon de peu pecu ngaugai nah pe dage keteu, “Ncu peu daipai peu neu labi kie lulo!”8Solomon Tinggwang dage rangdi, “Nang a pei David dage samkakkelu kesamsang kedi liagai da, nah pe bam ga acu peu hegwang tei luda.9Cu, RAMPAUBE Tinggwang, a pei David dage nang sampet kelude teicang beulo, kedanemene nang acu kideu ga mina rebui nzwa peikap kelak kieege reu hegwang tei kelune.10Cu acu kemteu nah maci peulo, iciude Ih mina aidungde puisau teilu kerane, kedanemene n minadung kekiee kebamde de caune teulu laino?”11Tinggwang Solomon dage ranggai, “Aide n mlung ga kebam, nah nang maheidung, mabam mede ketwa, mede ncu kengkaume keringria, mede nang ring tielu kera kie kemakne, dede nkatei ziemne nang kemteu nah maci kie, iciu eh nang, Ih ncu penui reu hegwang tei kebam a minadung de teulu kerane, nah Ih ainzwa tei beuzie.12Ih cu ncu kemteu nah maci peu zie. Ih ncu mahei, mabam, nah hetwa de peu zie, ndwa hegwangmedung mige de bam kemak, nah ncai migede de ngau gai kelak ge.”13Cine Solomon Gibeon ga kebam reca ni gade Jerusalem ga gwanglu, RAMPAUBE kebam paiki dwa gade; pa Israel reu hegwang teidi.14Solomon bagidung nah hekwen keteume de hekwalu, nah pa bagidung 1,400 nah hekwen keteume cang kereiehkena pa bagi namdidung ga kaipwa kebamdung bam, nah hegwangpei taiga, Jerusalem gage kainzeu pwa bam.15Hegwangpei rangkanggeu nah kecak teingkiee pwa Jerusalem ga tangtsukangdung nzwadi, nah pa cedar tsing teingkiee pwa caimün bangdung hangdeu kehenah ga kebamdung nzwadi.16Solomon ziemne Egypt nah Kue gade hekwendung teukegwang, pe lila keteime pemi ge taklwe Kue gade cidungde luilu.17Penui Egypt gade rangkanggeu shekel hai herok le bagi ket nah hekwen ge shekel 150 le teugwang lu. Penui cidungde Hittime nah Aramme gwangpeidung dage de langgai beula.
Bridge Connectivity Solutions Pvt. Ltd.