1 Timothy4
1Kekamle tingdau kangge kenlum gade nlidi kera Kemci Rabe rangsiakte gaibeu, kecwa rabedung nah herakesiadung keledeu samdung nzui dizie,2keledeu sam cikenzwabe hezaiketei kemretmedung ne rangrwala, penui lungcet au hegeu kelumle ru kedi nzwa tsai dida,3mina ci kenzwame henau ketei kaam nah ketyeipok kesa tyei helo ledeu lala, dede Tinggwang kenlumme nah kesangbe ci kelume de ketyeipok cidungde pecu twa eh tyeilo damgai.4Kedanemene Tinggwang damkegai leune au yi, nah ma keheibe de hetwa peu eh luu kelube au kesiabe ma,5kedanemene cide Tinggwang sam nah kekie le teimci kelune.6Nang keledeu sam, nang nzuikela kenlum samdung nah keledeu sam keyi de ne ncu teingkienglu eh aidungde pwa siname de ledeu lucai, nang Khrista Jisu gwaketei keyime ge tei luzie.7Dede nlumkemak nah kemta rasamdung de mlai dilu. Dede rabe kilam ge lunghgai kera laikai teilu,8kedanemene mipum hegwahezang kegai au pe keyi kecamna ge bam, dede rabe kilambie hegwahezang kegai au ma pelane gade pe keyi kieeki, kedanemene cide cu teilung gade nah gwangkela teilung ziemne de ringlu kera sampet kaibeu pwa bamlu.”9Sam aide au nlumlukebui ge nah pwa migu teikaplu kebui ge,10nah anui laikai tei eh matei heri lala, kedanemene anui kereguide ringkela Tinggwang da kebamne, pa mina pelane de Kelikelube, keraide nlum kelume de.11Ma aidungde ranglia nah ledeu lo.12Peu migede de ncu rehang zeu reulie de cet hena so, dede kenlumme dwade n samrang, nah n zai, keku, kenlum, nah kemci gade saulia ge teilu.13Ih gwang kemaktane nang kesanglaisiu pei pwa mide lia kecu, mide kecung nah keledeu gage n ting nggwang bamlu.14N da kebam rabe mapeu de mlai diso, caihakecime kerang nah ngqwa hangkiamedung n reu gage penui ba hwakegai gade ncu kepeu de.15Ma aidungde pie mtinglu, cidungde gage n ting nggwang bamlu, iciu eh peu mide nang yisi reureu kecu ngaulu kerane.16Nang nkatei n zai nah n keledeu gade sünne lulo. Aidungde tei eh bamlu, kedanemene aide ketei gade nang nkatei ncude nah n sam kekingneime dede kelilu zie.
Bridge Connectivity Solutions Pvt. Ltd.