1 Samuel7
1Cine Kiriath Jearim ga minadung gwang RAMPAUBE samkakbung de pwalu, delwe lamlwatu ga lungh kebambe Abinadab ki gage pwa gwang gaidi. Penui pe napei Eleazar depeu RAMPAUBE samkakbung de rengei kerane tei mcilu.2Samkakbung Kiriath Jearim ga peting ketie ge bamdi, mmi ngkai ge. Israelme pelane hei eh hapdi nah RAMPAUBE da nreugwang neudi.3Samuel Israelme pelane dage ranggai, “Nnui nlung pelane teu RAMPAUBE da cailigwang lucai, nah nnui kakgade sangme rabedung nah herabe pui Ashtoreth recamiedung keu gidi, delwe RAMPAUBE dage nnui nlung nreulu eh pecu rünne recalu cai, ciciu lucai pa nnuide Philistinme ba gade kelibeu zie.”4Cine Israel ga minadung Baal nah Astarte miedung de keugidi delwe RAMPAUBE de rünne recadi.5Cidau Samuel rangdi, “Israelme pelane de Mizpah nam ga ngngwa gwang ngkwalu, nah Ih nnui ziemne RAMPAUBE dade kie zie.”6Penui Mizpah ga ngkwalu, dui twaklu eh RAMPAUBE dwa gage ruigai beu. Penui cipaunai mmwang eh rangdi, “Anui RAMPAUBE dage kemau teigai dida.” Cikade Samuel Israelmedung ziemne kehebwak de teimci di nah minadung de teuswa beu.7Cu Israelme Mizpah ga ngkwa bam lie kecu Philistinme siu luge, Philistin gwangpeidung Israel de gwaketangdi. Israel ga minadung cide siu luge penui Philistinme de hingdi.8Cidau Israelmedung Samuel dage rangdi, “Anui ziemne RAMPAUBE anui Tinggwang dade kie mtakdi helo, ciude pa anuide Philistinme ba gade kelibeu zie.”9Samuel meurünna ge keulwe ruciau gai eh RAMPAUBE dage reca teigai beu. Cidau Samuel Israelme ziemne RAMPAUBE dage mragai nah RAMPAUBE pe kekie teibeu.10Samuel keru reca tei kebamdau, Philistinme Israel de gwaketang kera tetcuh gai. Dede cipaunai RAMPAUBE Philistinme de mmau eh tingceu sütgai eh penuide kebwakdi, nah penui Israelme dwade pakdi.11Israelme Mizpah gade tetpet, nah penui Philistinme de Beth Kar ga kecang zuimie penuide teitsetdi.12Cidau Samuel tangtsu ge keulu delwe Mizpah penai Shen kakgage sum gaidi. Pa cide de Ebenezer msiaklu eh ranggai, “RAMPAUBE cu kecang anuide ngha beulie.”13Cine Philistinme de ngamdi nah penui Israel deurai ga lütma. Samuel teilung pelane ga RAMPAUBE Philistinme de renia ladi.14Philistinme Israelme dade tuiteu kedi namdung de Israelme de peu kelibeudi, Ekron gade Gath kecang; Israelme penui deu Philistinme dade ngau dailu. Pecai Israel penai Amoritme kakga lungciep bamlu.15Samuel pe teilung pelane Israelme reu tutiakme tei jüja gwang.16Pa mmi ramsang kum Bethel, Gilgal, nah Mizpah namdidung ga huigwangla. Pa heni aidung pelane ga Israel ziemne kehebwakdung teimci beula.17Pecai pa pe ki Ramah namdi ga cailigwang dila, nah cika de pa Israel ziemne kehebwakdung teimci beula. Pa cika RAMPAUBE ziemne recabam ge teibeu.
Bridge Connectivity Solutions Pvt. Ltd.