1 Samuel27
1David pe lung gade rangdi, “Ih cu tingnai ge Saul ba gade acu teitset dizie da. A ziemne Philistinme deu gage pakgai kelu swade magade yiki kecu gahda; Ciude Saul a ziemne Israel deurai pelane ga acu peei sita dizie; ainzwa eh Ih pe ba gade pakmpet luzie.”2David cuhlu delwe pa nah pecu ngngwa kelame mina hai herok de ngngwalwe Gath ga hegwangpei, Maok napei Achish da miedi.3David nah pe minadung, mina hangge ge de penui kelakdung si eh ngngwa Achish Gath ga lungh bamdi nah David penau hangna pecu ngngwa la. Ahinoam Jezreelme pui ge, nah Nabal nau Abigail au Carmelme pui ge.4Saul de David au Gath gage pakgai kedi ranglia beu, cine pa pecu peeisi tadi.5David Achish dage rangdi, “Ih n miakngau ga petau liecai, peu deudi ga namdidung kakgade namdi ge ga heni ge penuide peu acu peulo, ciude Ih cika lungh luzie. N kilabe daitei ncu ngngwa hegwangbam namdi ga lungh lai?”6Cine cipau tingdau Achish pecu Ziklag nam de peudi, nah aide ziemne Ziklag aipaucai gwale de Judah ga hegwangpeidung gu teilamui di.7David Philistinme deu ga kelung ting mmi ge nah kei mdai lungh di.8David nah pe minadung heni ketsamtsam Geshurme, Girzme nah Amalekme; heleuh lunghkebam deu ga kelamedung, ndaa ting gede penui cika lunghla kedidungde gwaketang, nnui Shur ga mie kecunzwa, Egypt deu ga kecang gwalu.9David hangdeu cide gwaketang nah mipui mede mipei pelane de teitset eh; pa meurün, ketum, gadadung, utdung nah paiheni kecang de luu lu; nah pa Achish da caili eh gwangdai lala.10Achish rangla, “Nang henaipia caude mie gwano? David ainzwa samkeli zie, Judah reu tingbangle, mede Jerahmeelme reu tingbangle, mede Kenitme reu tingbangle.”11David mipei mede mipui de de teitset dila, nah penuide Gath ga ngngwa gwang kai ma, rang eh, “Ciu eh penui pa nah pe minadung ha ranglia kelu teilu lama, ‘David tei kelubedung teilu.’” David Philistinme deudi ga kelungtane ainzwa eh pelane teigwang.12Achish David da kenlum bam eh ranggai, “Pa pe minadung Israelme ne pecu ngkau süt kecu teidi; pa ciziemne a kilabe kelungta teila zieda.”
Bridge Connectivity Solutions Pvt. Ltd.