1 Samuel17
1Philistinme hereu tei kerane penui reugwame gwang ngkwalu. Penui Judahme deu Sokoh nam ga ngkwalu. Penui Sokoh nam nah Azekah nam kakga, Ephes-Dammim gage ramzeuki teilu.2Saul nah Israelme peidung Elah langkam ga ngkwa nah ramzeuki teilu, nah Philistinme de redau kerane sapbia lu.3Philistinmedung lamlwa ge lam sapbia lu, nah Israelme lamlwa keda ga sap bialu, penui kakga langkam ge bam.4Mi ngkieng süt kecu pei ge Philistinme ramzeuki gade pet, Gathme pei ge pe zi Goliath, pe hu cubit herok nah span ge .5Pe peu ga hetageu peurwa ge bam, nah pecu hegeu ncwa reunet le cum teula. Pe ncwa perüt hetageu shekel cang mengei ge. 6Pe pi ga hetageu reunet kaipwala nah pa hetageu ngei ge pe hekeutu ga pung la.7Pe ngei tie au disüt, pe ngei paidakme deikim pak siu ge. Pe ngei mui perüt hegeu shekel haiherok ge. Goliath gu hegeu kepungbe pe dwaga miela.8Pa saplu nah Israelme reugwame leune dage sahgai, “Nnui daitei eh hereu tei kera mpet lano? Ih Philistinme ge meni, nah nnui Saul kilame meni? Nnui katei nnui ziemne hangge de kedetlu nah peu acu regi kera nghung lo.9Magade pa acu ngngwa regi eh acu teitset lucai, anui nnui kila tei zie. Dede Ih pecu ngamlu nah teitset lucai, nnui anui kila tei nah anui gwatei zie.”10Philistinme rangdai di, “Ih Israel reugwame de henai heneu kiela. Anui ngngwa regi lu kerane acu mipei ge langgai lo.”11Saul nah Israelme pelane Philistinme kerang de siu luge, penui lungceu di nah ngngi sütdi.12David, Jesse napei, pa Ephraim leuhme ge, Judah deu Bethlehem gade gwang. Jesse pe na mipeina hang heset bam. Saul hegwang keteidau Jesse kecingme ge di, minadung kakgade cingsütdi.13Jesse napei kecingme bau hangcum hereu ga Saul cai suimie. Pe name hangcum hereu ga kemiemedung zi Eliab pe neraibe, pe kenabe Abinadab, nah pe kecumbe Shammah.14David ne henatu. Cingtube hangcum Saul cai suimie.15Ge David Saul gu reugwamaame nah pe pei gu meuründung Bethlehem ga kebam kakga penui pok tei kera mpet nlüt bam.16Zie riakdai ge Philistinme gu kengkiengbe pei tingcang nah tinghegi hereu tei kera sap lia bamla.17Cidau Jesse pe napei David da rangdi, “Tak hetakelu ephah ge aide nah tangkukwak kerei aidungde n siname da pwamie cu, nah ramzeuki ga n sinamedung dage cidungde keu kelwa miecu.18Nah macakang kerei aidungde reugwame pecang reu kedibe de keu mie beulu. N siname dainzwa bambi pielo nah penui yibam lie kecu keulia kerane mage keu cailigwang lu.19N siname au Saul de ngngwala nah Israelme peidung pelane Elah langkam ga, Philistinme de keregi bam.”20David tingcang nuge cuhlu nah meurün kekwame ge dage pe kauhau mapie kera nlum gaidi. Jesse pecu sam kai kebeu nzwa eh, pa taktyeiniadung punglu nah tetdi. Reugwame hereu ga tetpet lai eh hereukwa sah kebam dau pa ramzeuki ga gwang canglu.21Cidau Israel nah Philistinmedung hereu tei kera sapria lu, reugwame kerai ncwa lu.22David pegu maniadung hemaa kenzibe dage kainzeudi, reugwame dage pakgai, nah pe sinamedung de kelumgai.23Pa penuide ngngwa resiu bam ge, kengkiengbe pei de, Gath gade Philistinme pei, pe zi Goliath, nah pa Philistinme reugwame kakgade mpet eh, nah ndaa rang bamkela samdung nzwa rang, nah David cidungde siulu.24Israelme pei leune pecu ngau luge, penui pe dade pakdi nah penui hing sütdi.25Israelme peidung kakgade rangdi, “Nang aipau pei gwang bam kecube de de ngau mi? Pa Israelme de heneu kie kerane gwang bam. Pecu teitset kelube de de hegwang pei pe maheidung peu zie, nah pe napui de pe nau kera peu zie, nah pe pei kilungme dade Israel ga heraha ha lak.”26David pe taiga kebam reugwame dage rangdi, “Philistinme pei aipaude de teitset kelube ne Israel de hengam gade teumpet kelube daipai ngaulu buino? Philistinme pei hegeurum kemak aide ringla kela Tinggwang reugwame de heneu kielu kera cauno?”27Cidau minadung penui rang kebamde pecu ranglia dai, “Pecu teitset kelube de de cidungde tei beuzie.”28Pa reugwamedung dage marang kebamde peswa cingtube pei Eliab siu luge. Eliab David de pe rata di, nah pa rangdi, “Daitei nang aika gwang lano? Hetaideu ga kebam meurünnadung kecamna de cau dage gi gai dino? Ih nang ngang kela, nah n mlung ga nggwa kesiade cibam; nang keregi kecu pie kera ziemne aika miela.”29David rangdi, “Ih cu daipai ge teidi deno? Cide ma keteu kegai ge gwale meha?”30Pa pe dade nreupwa reugwame kedame lam gwangdi, nah nu nzwa marangdai. Minadung nu de nzwa keligai.31David rangkedi sam de siu luge, reugwamedung cide nzwa Saul dage paudai beu, nah pa David de qu kera mide langgai.32Cidau David Saul dage rangdi, “Cipau Philistinme de ziemne peu mige mlung de sia diso; n kilabe mie zie nah aipau Philistinme de regi zie.”33Saul David dage rangdi, “Nang aipau Philistinme de ngngwa regi gailak; nang hena nage reu kecune, nah pa au pe henane gade hereu keteime ge.”34Dede David Saul dage rangdi, “N kilabe au pe pei meurün kwala la. Hingho mede hegum gwang meurünna de kauhau gade tui teudi ge,35Ih pecai zuimie pecu renia, nah pe mui gade kelilu la. Pa a cu renia cuh ge, Ih pe tangkeimai nzaplu, pecu hui, nah teitset lula.36N kilabe hingho nah hegum de teitset dida. Aipau hegeurum kemak Philistinme de ci kenzwa hangge zie, pa ringkela Tinggwang reugwamedung de heneu kie kebamne.”37David rangdi, “RAMPAUBE acu hingho nah hegum badeu gade kelibeu da. Pa aipau Philistinme ba gade acu kelibeu zie.” Cidau Saul David da rangdi, “Miecu, nah RAMPAUBE depeu ncu ngngwa lalu.”38Saul pe reunet David de peu teu. Pa hetageu peurwa de pe peu gage kaibeu, nah pa pecu peu hegeu ncwa teu.39David Saul kiengtie pe reunet gage kailu. Dede pa tet luma, kedanemene pa cidungde teu nnimla kemakne. Cidau David Saul dage rangdi, “Ih aidungde teu pet regi gailak, Ih aide teu nnimla melu.” Cine David cidungde ra mpet di.40Pa pe tuitie peba gage keulu nah tangtsukang kemduibe mengei reuceuna gade kedetlu; pa cidungde meurün kekwa loko gage kailu. Pa Philistinme tai ga kepetdau pe ba ga pe tangnung la.41Philistinme pei de, pe geu kepungbe de peu pe dwa rai eh David tai nna jüja gwang.42Philistinme pei de pie twagwa gai nah David de ngau, pa pecu hega di, pa hena nage kecune, nah pe luilung yi, hezu de yi.43Cidau Philistinme pei de David dage rangdi, “Ih heteu ge lie eh, nang tsingtiedung keu eh a da gwang lani?” Nah Philistinme pei de pe rabedung zi teu David de reset di.44Philistinme pei de David dage rangdi, “A da gwang lu, nah Ih ngu ketsai paau tinggim ruinedung nah renaam kaune de peu dizie.”45David Philistinme pei de sam keli eh, “Nang kingtie ge, hengei ge, nah hengei ge keu eh a da gwang. Dede Ih reugwame reu RAMPAUBE zi teu eh n da gwang la, Israel reugwame Tinggwang, nang mlai kebambe de.46Henai RAMPAUBE acu n reu ngkiengkelu peuzie, nah Ih ncu teitset dizie nah n peu n pum gade teutsam dizie. Henai Ih Philistinme reugwame tsaipaaudung pwa tinggim ruinedung nah kideu ga renaam kaunedung de peu dizie, ciciu lu eh kideu pelane Israel ga Tinggwang kebam ci luzie,47nah aika ngkwa kebam peciakne RAMPAUBE kingtie mede hengei le kengkieng peula melie kecu cilu zie. Hereu au RAMPAUBE gu kecune, nah pa ncu anui ba gage kaibeu zie.”48Philistinme pei de cuhlu nah David da gwang kecu dau, David pecu redau kera ngaurau reugwame lam pak mzet süt pet.49David pe loko gage pe ba kai, tangtsu ge cikade keulu, keling gai, nah Philistinme pei sipie gage samdi. Tangtsu Philistinme pei sipie ga nlüt di, nah pa kau mie hangdeu ga pe zu ngkum bam di.50David Philistinme pei de tangnung ge nah tangtsu ge le ngamlu. Pa Philistinme pei de samdi nah teitset di. David ba ga kingtie gede bam ma.51Pecai David pakpet Philistinme pei de reu ga saplu nah pe kingtie keulu, kinghya gade jütlwe, pecu teitset di, nah cide le pe peu dang di. Philistinmedung penui kengkieng bede tsaidi kecu ngau kegai dau, penui pak di.52Cidau Israel mepeidung nah Judahme sahbak eh cuhlu, nah Philistinme de Ekron kiriedung nah langkamdung kecang gwamie di. Philistinme ketsaipaau Shaaraim kemie lampui ga, Gath nah Ekron namdidung ga kecang mla zeudi.53Israelme Philistinme de zui mie kecu gade cailigwang lu, nah penui ramzeuki gade penui gunia pwalu.54David Philistinme pei de peu pwalu nah cide Jerusalem ga pwa gwang, dede pa pe reunetdung pe paiki gage kai zeudi.55Saul David Philistinme pei de renia kera tet petla kecu ngau ge, pa reugwame reu kedibe Abner da rangdi, “Abner, aipau rehangpei de cau napei no?” Abner rangdi, “Nang ring kela nzwa, hegwangpei, Ih ci ma.”56Hegwangpei rangdi, “Cau napei bi, cilu kebuime dade keteu lo.”57David Philistinme pei Goliath de teitset lwe cailigwang luge, Abner pecu ngngwalu, nah Philistinme pei de peu pe ba gage pwa lwe Saul dwa ga ngngwa gwang.58Saul pe dage rangdi, “Rehangbo, nang cau napei no?” David keligai, “Ih Bethlehemme n kilabe Jesse napei lie.”
Bridge Connectivity Solutions Pvt. Ltd.