1 Samuel11
1Pecai Ammonme gwangpei Nahash mie delwe Jabesh Gilead namdi de gwa lu. Jabesh nam ga mina pelane Nahash de rangdi, “Anuide ngngwa samkak lu, nah anui n gwatei luzie.”2Hegwangpei Nahash, Ammonme pei sam keli eh, “Ainzwa lu zie cai Ih nnuide ngngwa samkak lu zie, peu acu nnui pelane zetle miakdung let mpet cai, nah ainzwa eh Israel reu hengam keu gwang lu kerane.”3Cidau Jabesh namdi ga hangkiame pecu keli eh, “Lang hena ne ziemne anui de püt beu lo, iciu de anui Israel deu pelane ga samgwame langgai beu lu kerane. Ciciu eh, migede de anuide keli beu kera gah di cai, anui n kang nlüt zie.”4Jabesh gade samgwamedung Saul lungh kebam, Gibeah namdi ga gwanglu, nah dai teidi dibi minadungde paulia. Ciu eh mina pelane hapsüt di.5Cu Saul hetumseudung caisui eh luh gade mpet di. Saul rangdi, “Dai ge mau di eh minadung hap bam no?” Penui Jabesh ga minadung ne rang kebeu de peda pau beu.6Saul penui kerang de siu luge, Tinggwang Rabe pereu ga zette gwang di nah pa pe rata süt di.7Pa hetumseu ngwanggai de pwalu, dang kecai lu, nah Israelme deu pelane gage samgwame dage lang gai. Pa rangdi, “Saul nah Samuel caisui kemakme tumseudung de aiciu beu zie.” Cidau RAMPAUBE ne keheu kegai de minadung reu gwang di, nah penui pelane mi hangge nzwa ngngwa tet petlu.8Pa penuide Bezek namceu ga ge peu ngkwalu ge, Israelme mina cang hai cum, nah Judahme cang camrei bam.9Penui samgwame gwang kebamme dage rangdi, “Nnui Jabesh Gilead dage rangzie, ‘Ncünne, tingna tingding, nnuide kelilu zie.’” Cine samgwame mie Jabesh ga minadung de rangbeu, nah penui suiyi di.10Cidau Jabesh ga minadung Nahash da rang eh, “Ncünne anui nda nlüt zie da, nah nang cet eh n ziemne dai yizie bie anui dage teigai lubui.”11Pecai benai Saul reugwame de nzipwa maa cum teilu, penui tingcang nuge ramzeuki sum ga paklüt, nah penui Ammonme de gwaketang eh tingna dauge ngkienglu. Ring kebammedung zangra di, ciu eh mi hangna gede ngngwa ket tei eh tet tadi.12Cidau minadung Samuel dage rangdi, “Saul anui reu di zie ni? ‘De rang kecube de caudung no?’ Penuide ngngwa gwang lo, anui penuide daptset dizie.”13Dede Saul rang eh, “Mige de de henai daptset lak, kedanemene henai RAMPAUBE Israel de kelibeu delu.”14Pecai Samuel minadung dage rangdi, “Gwanglu, anui Gilgal ga mie hegwangpei de tei heci dai go.”15Cine mina pelane Gilgal ga mie RAMPAUBE dwa gade Saul de hengwang tei gai. Cika Gilgal gade penui lungciep ratak RAMPAUBE dwa gage teigai, Saul nah Israelme leune penui sui yisüt lu.
Bridge Connectivity Solutions Pvt. Ltd.