1 Samuel1
1Mige pe zi Elkanah lie kecu ge Ephraim deudi, Zuph cuikui ga Ramah namceu ga lungh bamla. Pa au Ephraim leuhme Jeroham napei, Elihu napei, Tohu napei, Zuph napei.2Pa penau hangna bamla; keraibe pui zi cai Hannah, nah pe kenabe pui zi cai Peninnah. Peninnah pe name lunghlu, dede Hannah pena tei ma.3Elkanah mmi ramsang kum pe namdibe gade tetmie Shiloh nam ga reugwame reu RAMPAUBE de reca nah ratak teibeu bamla. Cidau cika Eli napei kena, Hophni penai Phinehas ne RAMPAUBE cingkupei teibam.4Mmi ramsang kum Elkanah ratak keteidau, pa pe nau Peninnah, nah penai napeime nah napuime de hetei qwa ramcau peu muila.5Dede pa Hannah de qwana peu muila, kedanemene pa Hannah de kusüt kecune, RAMPAUBE pe henabam ngkuidi liede.6RAMPAUBE pe henabam ngkui kedine, Peninnah pe kemei tei eh pe rata teisüt bamla.7Cine mmi ramsang kum Hannah pe kelak de ngngwalwe RAMPAUBE kiga nghang kecudau, Peninnah pe kemei tei bamla. Ciziemne pa hap eh magede tyei mene bamla.8Pe nahpei Elkanah pecu rang muila, “Hannah, nang daitei hap bamno? Nang daitei matyei meno? Daitei n suisia bamla no? Ih au n ziemne n na mipei hang kerei swa yiki me luini?”9Aikenzwa ting dauge, Shiloh gade penui matyei nah sak kelucai Hannah cuhdi. Cidau cingkupei Eli RAMPAUBE kerecaki kimui tet kelwet lampui taiga pe bam ga ntum bam.10Hannah pelung keherei sütdi eh RAMPAUBE dage hapsüt eh kekie teigai.11Pa pe sam pet eh ranggai, “Reugwame reu RAMPAUBO, nang n kilabe keherei kebam de piegai eh acu nsunglu liecai, nah n kilabe de nsung tadi mene, n kilabe de mipeina ge peu liecai, iciucai Ih pe teilung zie pelane RAMPAUBE de peu zie, nah pe peutam madaude tai lak.”12Pa RAMPAUBE dwa kekie tei kebam dau, Eli pe mui ncet bam.13Hannah pe lung gade kekie tei bam. Pe muileu nlai bam, dede pe kwa siu ma. Ciziemne Eli pa sakmie bam lie cetdi.14Eli pe dage rangdi, “Nang dai ting tie ge sakmie bam lai no? Zau sakta dilu.”15Hannah keligai, “Ma, a mpaubo, Ih au lungrei kebam pui ge. Ih zau mede zau kengkieng sak ma, dede Ih RAMPAUBE dage a lungrei paugai bamla.16N kilabe de kemta pui ge lie cet so; Ih a lungrei nah suisiet kepui tei eh kekie teibam.”17Cidau Eli sam keligai, “N lung nciep eh tetcuh; Israel Tinggwang de peu nang pe dade kie kegaide tei beulo.”18Pa rangdi, “Peu n kilabe de n dwade ngaugia ngau kelube teilo. Pecai mipuibe tetdi nah matyeilu; pa pesui kesia bamsi tadi.”19Pecai benai penui tingcang nuge cuhlu eh RAMPAUBE de recalu, nah pecai penui ki Ramah ga cailigwang daidi. Elkanah penau Hannah de ngngwa nauhepei zai teidi, nah RAMPAUBE pe kekie teibeu.20Cinzwa eh Hannah tetlaklu nah mipeina ge de mnalu. Pa pe zi Samuel msiaklu eh ranggai, “Ih RAMPAUBE dade pecu kie kelune.”21Elkanah nah pe kilungme pelane RAMPAUBE dage mmi ratak nah pe sampet de tei kera tetmie dai.22Dede Hannah mie ma; pa pe nahpei dage rangdi, “Henanabe ngkieng lu herezi, Ih pecu ngngwa mie zie, iciude pa RAMPAUBE dwaga bam nah cika kelungta lungh dilu kerane.”23Pe nahpei Elkanah pe dage rangdi, “Cet eh yitube tei lulo. Nang pecu nküt ngkienglu kemaktane kwalu; RAMPAUBE de peu n sam de teicang kelube teilo.” Cine mipuibe pena de nepam eh pecu nküt ngkienglu kemaktane bamdi.24Pa pecu nküt ngkienglu ge, pa pecu ngngwalwe ketumseu mmi kecum nage, taktyei ephah ge nah zaula ge si eh punglwe Shiloh ga RAMPAUBE ki ga gwanglu. Nah hena nabe hena bamreu.25Penui ketumseu gilu eh Eli dage hena nabe de ngngwa gwangbeu.26Pa rangdi, “Oh, a mpaubo! Nang ring kela zi gade ranggai la, a mpaubo, Ih aika ntai ga sap eh RAMPAUBE dage kekie ketei puide delie.”27Ih hena aide ziemne kiegai nah RAMPAUBE Ih kie kegaide teibeu delie.28Ih pecu RAMPAUBE de peu dida, pa ring kelatane pa RAMPAUBE gu teizie. Pecai pa cikade RAMPAUBE de recadi.
Bridge Connectivity Solutions Pvt. Ltd.