1 Kings7
1Solomon pe hegwangki ketei mmi kereikecum ge teudi.2Pa Lebanon Gung Hegwangki de teilu. Petie cubit haige, pedi cubit riakngei, nah pehu cai cubit camrei. Hegwangki de cedar tsiadung ria mdai cedar pakdung hetsia reu ga bam eh teilu.3Heki kinim de cedar tsingle teilu nah cidungde hesumdung reu ga bam. Hesumdung aidungde de hetsiadung ne pungpwa bam. Hesumdung riakdai-mengei bam, ria gega kereimengei.4Hebakipak ria cum ge bam, nah hebaki lule ailam kecum cum bam.5Kikam nah hetsiadung pelane tsingpakdung le kai mzuizang pwa bam nah hebaki ria cum kecum cum mcwa bam.6Tsiapum riadung petie cubit riakngei nah pedi cubit camrei ge bam, pedwa lebie kigu nah hetsia nah kinim ge si eh.7Solomon hegwangbam kibung, Tutiak kibung lie qu kelade, pa hetutiak kerane teilu. Cide au pikam ge gade pikam ge kecu cedar tsingle tei pwabam. 8Solomon pa lung kera ki, hegwangki ga kigu keda lebie ge ki kedadung rehi nzwa teilu. Pa pe nau Pharaoh napui ziemne de aikenzwa kige teilu.9Aipau kidungde tangtsu pemi kehungdung reki kelu be le tei hezuyi pwabam, aidung au ndet gap delu delwe cing get le dang nah pezu pelane de le tei mdui. Tangtsu aidungde le ki bangdwa gade kipeu kecang tei nah kigu kedi hegwa lebie de si eh teilu.10Ki bangdwa be tangtsu di süt kecu pemi kehung, petie heset nah kerei cubits le tei.11Aidungde pemi kehung tsupangdung pe mdet gage danggap de keludung nah cedar tsing sumdung de si.12Kigu kedi hegwangki twagwa kebam de tsupang ria cum bam nah RAMPAUBE kerecaki nah kigu ga nzwa ria ge cai cedar tsing sumdung bam.13Hegwangpei Solomon mide lang pwa Huram dage kaigai nah pecu Tyre gade ngngwa gwanglu.14Huram au Naphtali leuhme hemipui ge napei, pepei Tyre ramme pei, hetageu reki kecume ge. Huram au hangkia nah ma cisüt nah hetageu ta kedi tei kereki teilu kebui peciem bam. Pa Hegwangpei Solomon taiga hegwangpei ziemne hetageu tadung tei kerane gwanglu.15Huram hetageu tsiapum kena teilu, kena na de pehu cubit kereieheset nah pedi cubit kereiekena.16Pa hetageu tei mdui kelube tsiapeukang kena hetsia tün reu gage kai kerane teilu. Aipau tsiapeukang kena de pehu cubit mengei.17Hegeuria pwa kelube nah peringoi keteibe tsiapum reu ga tsiapeukang kenade tei hezuyilu, tsiapeukang ge ziemne hena na.18Cine Huram hetsia pelane reuga kebam tsiapeukang de tei hezuyi kerane kuraletsidung kenzwa ria na tei twagwalu.19Kigu ga kebam hetsiadung tün ga tsiapeukang de teizuine padung pehu cubit mdaile tei hezuyilu.20Aipau hetsia kena reuga tsiapeukang kena kebam de ga, petün taiga, kuraletsi ria haina ge pelane tei twagwakelu desi.21Pa tsiapum kenade kerecaki kigu gage pwacuh gailu. Tsiapum zetle kebamde de Jakin lie qulu nah hile kebam tsiapum de de Boaz lie qulu.22Hetsiadung peureu ga teizuinedung rehi nzwa tei hezuyilu. Ainzwa eh tsiapum kenade teicang lu.23Huram hetageu tekwa kengwa ge teilu, pe mdet tuge lamde tuge kecu cubit kerei. Cide pehu cubit mengei, nah pe nggwa cubit camrei.24Jaaidi mungleu twagwa kebam kangga hela rehi ge bam, cubit ket ga kerei ge, cide “Jaaidi,” de ketei dau gage teincüt gai keluge.25Jaaidi de hetageu tumseu kereiekena reu gage dung pwabam, kecum tingpeule pie bam, kecum naimiak kenlütle pie bam, kecum tingpile pie bam nah kecum naimiak kepetle pie bam. “Jaaidi” de aipaudungde reu gage dung pwa bam nah penui caidung pelung lebie bam ciak.26Jaaidi de au mi ba siuge nah pemung au hepiak ge mung nzwa, teizuine pa nzwa. Jaaidi dui bath cangna ge bam lula.27Huram hetageu gari kerei kai kera bam teilu. Ket dung kera bam petie cubit mdai, nah pedi cubit mdai, nah pehu cubit kecum.28Pebamdung ainzwa teilu. Cidungde perak de kakga pe kwadung de kai pwa bam,29nah pe kwadung nah pe rakdungde ga hinghodung, hetumseu nah cherub mie tei pwabam nah hinghodung nah hetumseudung reule nah pe ngkanglebie hegeuria ringgoi mie tei kelube bam.30Pelungbam pelane de hetageu pita mdai bam nah hetageu lwabam, nah pekung mdai kang ga duikwak de tung punglu kera bam. Tung kera pakdung hegeuria pwa keludung pe kungle ge ket ket kai pwabam.31Pemui be dung kera bam nzwa ngwa nah pedi cubit ge eh pempie langge nah hegwang peurwa pehu lung ga cubit ge aide bam. Pemui ga mamiedung heri pwa bam, nah pe kungdung ngwa mene mzui nsam bam.32Pe kungdung kangga pepita mdai de, nah pepita tie bam nah penui kirakelube pe sap bam ga bam. Pe pita pehu de cubit ge eh pempie ge.33Pepitadung hekwen bagi pitadung nzwa teilu. Cidungde kemruilwa, mungleu, pe ringoi, pepita geu hegeule teikap.34Pesap bam kungdung mdai ga hegeu pak mdai pesap bam gage kai remi pwa bam.35Pesap bam reuga kengwa ria ge pempie ge cubit nah pesap bam reu de tung pwa bam nah pe kungdung tei twa pet si bam.36Tungpwa kebam tsiade ga nah pekwak de gage Huram cherubim, hinghodung, nah laira bangdung pebam kebam leu gage heri gailu delwe aidungde hegeu ringoile tei twagwalu.37Ainzwa eh dung kerabam kerei ge pa teilu. Nah cidungde pelane nzwa kap eh teilu, nah cidungde perehi nah pedi nzwa ciak.38Huram hetageule duikwak kerei teilu. Duikwak ge bath riakdai dui bam lubui. Duikwak ket ga cubits mdai pekung sum gade lule ailam bam nah pedung tie kerei reu ga duikwak ket ket kai pwabam.39Pa dung kerabam de kerecaki zetlebie ge mengei kailu nah kerecaki hile bie ge mengei kailu. Nah pa tekwade naimiak kepetle tu, kerecaki tingpile mcwa eh dunglu.40Huram duikwakdung nah hepeidung nah kezin kera kwakdung teilu. Pecai pa hegwangpei Solomon ziemne RAMPAUBE kerecaki ga pa heta ketei pelane tei canglu:41Tsiapum kenade, nah tsiapum kenade reu ga hekwak rehi nzwa tsiapeukang ga kebamde, nah tsiapum kenade reu ga hekwak nzwa kebamde ga heria pwakelu kenzwa ge ne tei hezuyi kelude.42Pa kuraletsi hai mdai ge teilu heria pwa kelu kenzwa kena de tei hezuyilu kerane (tsiapum reu ga kebam hekwak rehi kenzwa tsiapeukang de tei sunglu kerane heria pwa kelu ria de ramcau ziemne kuraletsi ria kena);43pedung kerei, nah hekwak kerei pedung ga bam.44Pa tekwa kedi “Jaaidi” de qu kelade, pekangga hetumseu kereiekena ge bam eh tei gailu;45pecai de lidung, hepeidung, hekwak, nah keu dai mai kesia niadung tei ciaklu. Huram aidungde tei mzai kelu hetageule teilu, hegwangpei Solomon ziemne, RAMPAUBE kerecaki ziemne.46Hegwangpei aidungde Jordan lamkam Succoth nah Zarethan kakga kebam lidei deu ga de tei ciaklu.47Solomon lidung pelane rüt mdet ma kedanemene cika mdet kera kiee hamdi kecune, nah hetageu rüt mdet gai lakdi kecune.48Solomon RAMPAUBE kerecaki lungga maniadung leune kecakle teilu: kecak recabam nah Tinggwang de reca kebeu tangku kekai table.49Helungbe bung dwaga zetle mengei nah hile mengei keba mibung dung kera bam kecakle tei, mapadung keba mibungdung, nah ntau kera tiedung kecakle teiciak.50Solomon hepiakdung, mibung tei kemmüt tiedung, hekwakdung, hepiaktiadung nah mariem kehengui ru kera kwakdung, aidung pelane de kecakle teiciak; pa helungbe bung kikam cap (aide mci tube heni) nah kerecaki bung ditube kikamde kecakle tei.51Ainzwa eh, hegwangpei Solomon Rampaube ki ta pelane tei kera sau kebeu de tei canglu. Cine Solomon pe pei David mania tei mci kedidung keu gwanglu, rangkanggeu, kecak nah kilung niadung delwe cidungde keu gwang Rampaube ki mania bung gage kailu.
Bridge Connectivity Solutions Pvt. Ltd.