1 Kings18
1Cine zie kekiee ge cai RAMPAUBE sam Elijah da gwang, tingrui ta kedi mmi pekecum bekum, ainzwa ranggai “Mie, Ahab dage ncu liagai lulo nah Ih hangdeu gage tingrui langgai beu zie.”2Elijah Ahab dage pecu keulia kerane mie, aipau tingdau Samaria ga herakum siatube gwangdi.3Ahab ne hegwangki kerengei be Obadiah de qu gailu. Cu Obadiah au RAMPAUBE de herüt peu sütla,4Kedanemene Jezebel RAMPAUBE caihakecimedung de teitset kecu dau, Obadiah caihakecime haige de ngngwa delwe penuide riakngei ngei nzi tsam lwe tsupop gage kebailu nah tangku nah dui le penui pok tei beu.5Ahab Obadiah dage rangdi, “Hangdeu duilet nah reuceuna kebam leu ga mie culo. Iciu lucai anui cehei ngau luzie nah hekwendung de kelilu nah gadadung ring lu kera, iciulude anui gu makaune tsai ciak dilak lie.”6Cine penui deu penui kak gade kahpet lu kerane nzilu delwe dui pie mie. Ahab pekatei ket lambie mielu nah Obadiah be keda le pie mielu.7Obadiah lampui ga tet kela dau, cet mezing eh Elijah pecu daulu. Obadiah pecu cilu eh hangdeu ga nkum mie. Pa cu, “aide nang a mpaube Elijah deni?”8Elijah pecu keligai, “Ih delie, mie n mpaube dage rang lialo, ‘Pielo, Elijah aika la delie.’”9Obadiah keli eh, “Ih daipai teimau di eh, nang n kilabe de Ahab ba gage pa acu teitsetdi kera ziemne kaibeu au no?10RAMPAUBE n Tinggwang lung bam kecu nzwa, delwe heleuh mede hegwangram a mpaube minadung de ncu pei kera langgai kemak ket de gah lie. Heleuh ge mede hegwangram keheidau rang eh Ahab penuide peu, ‘Elijah aika galie,’ de penui ncu pei lu melie kecu reset bam dida.11Dede nang cu, ‘Mie, n mpaube Elijah aika bam lie rang beulo.’12Ih n tai gade tetti herizi, RAMPAUBE Rabe ne ncu Ih ci kemak ni gage kai dizie. Pecai Ih cidau mie delwe Ahab dage pau lia kebeu dau, pa ncu peilu ta kedi de, pa acu teitset dizie. Dede Ih, n kilabe Ih rehang dau de RAMPAUBE de reca la dida.13A mpaubo, n dage Ih daipai tei bi rang lia meni, Jezebel ne RAMPAUBE caihakecimedung de teitset kecu dau, dainzwa Ih RAMPAUBE caihakecimedung de hai gede tsupop gage riakngei ngei mzilwe kebaidi delwe tangku nah dui le penui pok tei beu kecu?14Cu nang a dage rang, ‘Mie, delwe n mpaube dage Elijah aika bamlie rang beulo,’ iciu eh pa acu teitset lu kerane.”15Ge Elijah keligai, “Reugwame reu RAMPAUBE ring kebam pe dwaga Ih sap kebam nzwa, Ih henai Ahab dwaga acu keulia bizie.”16Cine Obadiah Ahab de redau kerane mie, nah pe dage Elijah rang kebeu de rang lia beu. Ge hegwangpei Elijah de redau kerane miedi.17Ahab Elijah de ngaulu ge, pa pe dage rangdi, “Aide nang deni? Nang Israelme dage ma kehebwak keu gwang beu kecu be de!”18Elijah keligai, “Ih Israel gage ma kehebwak keu gwang melie, dede nang nah n pei kelak ne ma kehebwak teu gwang kegai delie RAMPAUBE ajadung de gidi delwe Baal caisui kedine.19Ge cu, sam langgai delwe Israelme pelane de Carmel Deutu ga a taiga gwang lulo beulu, Baal gu caihakecime 450 de silu delwe Asherah gu caihakecime hai mdai Jezebel taktyei bam gade matyei kecume de ngngwa gwanglu.”20Cine Ahab Israelme mina pelane dage sam langgai delwe caihakecime de Carmel Deutu gage qu hekwalu.21Elijah mina pelane dwa ga gwang nnalu delwe rang eh, “Dai tie ge nnui nnui lung nreu bam sap lau no? Magade Tinggwang RAMPAUBE lie cai, pecai sui lulo. Dede Baal be Tinggwang lie cai ge pecai sui lulo.” Dede mina samkie gede pecu keli beu ma.22Pecai Elijah mina dage rangdi “Ih, RAMPAUBE caihakeci bang kebeu, Ih rünne delie, dede Baal caihakecime mina 450 ge bamlie.23Cine peu penuide hetumseu kena anuide peulo. Penuide peu penui ziemne hetumseu ge kedetlu, nah cide dang kecailu, delwe tsing reu gage kai gailu, dede mi twagai so. Pecai Ih hetumseu keda de lamlui luzie nah tsing reu gage kai luzie nah mi pekang gage kai so.24Pecai nnui nnui rabe zi qugai zie nah Ih RAMPAUBE zi qugai zie nah mi langgai eh sam keli kegaibe Tinggwang de, peu pecu Tinggwang lulo.” Cine mina pelane keligai eh rangdi, “Aide petau da.”25Cine Elijah Baal caihakecime dage rangdi, “Hetumseu ge nnuikatei ziemne kedet lulo nah lamlui railu, kedanemene nnui mina kiee bamlu. Pecai nnui rabe zi qu gai lulo, dede hetumseu kang gage mi kailak.”26Penuide kepeu ketumseu de keulu eh lamlui lu delwe penui Baal zi tingcang gade tingna kecang qu eh ranggai, “Baal, anui kwa kingnei gailo.” Dede makwa gede siu ma, mede migede penuide keli beuma. Penui recabam tei kelude penui lim twagwa bamdi.27Tingna dige Elijah penuide henui tei eh rangdi, “Sahbak gailo! Pa au rabe ge da! Pa macet bam au zie, mede mtak bam au zie, mede pa beuhla au zie, mede pa au zip bam au zie, cine nkia mraklu maisia da.”28Cine penui sah mtei reu reugai, nah penui penuikatei kiengtie nah hengei le penuide tei rezam, penui reu ga penui jai lwa petti kemaktane penui ainzwa teila kecune.29Tingnari kahdi nah penui tinghegi ratak tei kera ting kemaktane kecang de sah delwe bam, dede makwa gede siu ma nah migede kelibeu ma, migede penui kie kebam kwa de kingnei beu ma.30Pecai Elijah mina pelane dade rangdi, “A taiga gwang nna lulo,” nah minadung peciakne petaiga gwang nnalu. Pecai pa RAMPAUBE recabam de tei msia pwa bam kecu de retak dailu.31Elijah tangtsu kereiekena keulu, tangtsu ge Jacob name leuhme nsam gade, RAMPAUBE sam ainzwa gwang, “Israel au n zi zie” de Jacob dage rang kebeube de.32RAMPAUBE zi gade pa tangtsudung le recabam ge teilu nah pa heleuhdung seahs kena bamlu kera kedi makoiki ge recabam kui twagwalu.33Mi tei kerane ziemne pa tsing danglu, hetumseu de dim takcailu delwe tsing reu gage hetumseu dimtakcai keludung de kailu. Pa rangdi, “Duibung mdai twak puilu delwe keru ratak nah tsing reu gage rui gailo.”34Pecai pa rangdi, “Pia pe kenabe tei dai gailo,” delwe penui pia pe kenabe de teilu. Pa rang dai eh, “Pia pe kecumbe de tei dai gailo,” nah penui pia pe kecumbe de tei daigai.35Duidung recabam lwa twagwa eh makoiki de tei puilu.36Aide tinghegi ratak tei kera ting dauge, caihakecibe Elijah gwang mna lu delwe rangdi, “RAMPAUBE, Abraham, Isaac nah Israelme Tinggwang, nang au Israel ga Tinggwang lie kecu peu henai ci lulo nah Ih au n kilabe lie de kecu, nah Ih ma aidung pelane tei kecu au n sam gade tei kelu lie.37A kwa kingnei gailo, RAMPAUBO, a kwa kingnei gailo, iciulude mina aidungde ci luzie, nang au RAMPAUBE Tinggwang lie kecu, nah nang ne penui lung tei li pwa n da cailigwang dailu delie kecu.”38Pecai RAMPAUBE mi cak mie eh keru ratak tsingdung, tangtsudung nah tangdeidung de si eh rudi, delwe makoiki ga dui pui kebam de tei canghdi.39Minadung ai kenzwa ngau gai ge, penui hangdeu ga nkum mie lu delwe rangdi, “RAMPAUBE, pa au Tinggwang! RAMPAUBE, pa au Tinggwang lie!”40Cine Elijah penui dage rangdi, “Baal caihakecimedung de tuilu. Peu migede de pak diso.” Cine penui penuide tuilu, nah Elijah Baal caihakecimedung de Kishon Reuki ga nzang mie eh penuide cikade teitsetdi.41Elijah Ahab dage rangdi, “Cuhlu, matyei nah saklu, kedanemene tingrui mtei süt kera kwa siu bam dida.”42Cine Ahab matyei nah sak kerane nghanglu. Pecai Elijah Carmel deutu tün ga nghang pa kideu ga keukei mie lu nah pe ngkokpui kak gage pezu kailu.43Pa pe kilabe dage rangdi, “Cu tet nghang delwe duidi le pie gailo.” Pe kilabe tet nghang piegai delwe rangdi, “Lu ga au made gah.” Cine Elijah rangdi, “Pia hena mie dailo.”44Pia hena be pia kilabe rangdi, “Pielo, duidi gade hemwa ceunage miba lang na ge hang zeu delie” debeu. Elijah sam keligai, “Nghang delwe Ahab dage rang gai beulo, ‘Ngu bagi mtei lulo delwe nghung culo tingrui ne ncu kamdi kemak dwa ge.’”45Matie mene tinggim ga hemwadung nah tingkai le gui muiting di nah tingrui mtei sütdi. Ahab bagi teulu delwe Jezreel ga gwangdi,46dede RAMPAUBE ba Elijah reuga bam. Pa pe paile pe kiakang gage keulu delwe Ahab dwa pak rai eh Jezreel kenlüt ga gwanglu.
Bridge Connectivity Solutions Pvt. Ltd.