1 Kings1
1Cu hegwangpei David au pa mmi kekiee ge lunghlu eh cingdi, nah penui pecu hepai bah gai beu, dede pe cide ziemne lumlu tadi.2Cine pe kilame pe dage rangdi, “Penui a mpaube hegwangpei ziemne releipui gede peei bam, kemci pui gede, nah cipau pui de hegwangpei dwa ga sap zie. Iciude pa pecu pie rengei luzie, nah pa n hekarak ga zeu zie iciu eh a kedibe hegwangpei de gum lum lu kerane.”3Penui Israel deu cuikui leune ga relei hezu keyi pui gede peei. Penui Shunamme Abishag de ngaulu delwe penui pecu hegwangpei da ngngwa gwang beu.4Releipui cide pezai yi nah hezuyi süt. Pa hegwangpei de kerengeibepui teilu nah pa pegwa teilu, dede hegwangpei pecu ngngwa nauhepeizai tei ma.5Cipaucai Haggith napei Adonijah, pekatei pecu twa eh ranggai, “Ih ne hegwang tei zie.” Cine pa pe ziemne bagi hekwen maa si eh nah mina hang riakngei peu pedwa ga pak kerane mtei lu.6Peting dau pe pei pecu kesiu ma, rang eh “Nang daitei ainzwa tei dino?” Cipaureude, pa au hezu yisüt kecu kau ge. Pa pecu Absalom cai mnalu.7Zeruiah napei Joab nah cingkupei Abiathar de ngngwa keresiulu. Penui Adonijah caisui eh pecu ngha beu.8Dede cingkupei Zadok, Jehoiada napei Benaiah, caihakecibe Nathan, Shimei, Rei, nah David gu mina kengkingme Adonijah lambie ma.9Adonijah meurün, ketum nah ketumna pelui yitube, En Rogel taiga kebam Zoheleth tangtsu de gage ratak tei gai. Pa pe sinapeidung pelane, hegwangpei namedung nah Judah ga mipei, hegwangpei kilamedung pelane de qugai.10Pa caihakecibe Nathan, kengkingme Benaiah mede pe sinabe Solomon de kugai.11Pecai Nathan Solomon pui Bathsheba dage rangdi, “Nang Haggith napei Adonijah hegwang teikedi siu meni, nah David anui mpaube cide cima?12Cu cine gwanglu, kehereide peu acu ncu maranglia lo! N keringria nah n napei Solomon keringria kelilu!13Hegwangpei David dwa ga lüt delwe mie nang pe dage ranglo, ‘A mpaubo a hegwangpei, nang n kilabe da n sam pet gaibeu meni, “Kesang n napei Solomon ne acai hegwang teizie nah pa a hegwangbam ga bam zie,” de eh. Iciu cai dainzwa Adonijah hegwang tei dino?’14Ainie, nang cika hegwangpei de ngngwa resiu kebam dau, Ih ncai lütlu zie nah Ih n samdung de rang mciliagai beu zie.”15Cine Bathsheba hegwangpei zeubung ga mie. Hegwangpei cu hecing süt dida, nah Abishag Shunamme pui ne hegwangpei gwatei bam.16Bathsheba keumie delwe pa hegwangpei dwa ga koktung mielu. Ge hegwangpei rangdi, “Nang dai luu neula no?”17Pa pe dage rangdi, “A mpaubo, nang RAMPAUBE n Tinggwang zi gade n kilabe da nsam pet gai da, ‘Solomon n napei ne acai hegwang teizie, nah pa a hegwangbam ga bamzie,’ de eh.18Dede cu, ainie, Adonijah hegwang tei dida, dede a mpaube hegwangpei, nang cide ci ma.19Pa ketum, ketumna pelui keyidung nah meurün kekiee ge teu ratak teigai da, nah hegwang namedung pelane, cingkupei Abiathar, nah reugwame reu kedibe Joab de kugai, dede pa Solomon n kilabe de ku ma.20Nang, a mpaube hegwangpei, Israelme pelane ncu pie bam, penuide caune a mpaube hegwangpei cai hegwangbam leu zie bi rangbeu kera.21Ciciulu maige cide gwang zie da, A mpaube hegwangpei pe paume de nggnwa mtak kedidau, Ih nah a napei Solomon de hezai mzaikemakme tei dizie.”22Pa hegwangpei da marang kebam dau, caihakecibe Nathan lütlu.23Penui hegwangpei de rangbeu, “Ainie, caihakecime Nathan gwangla.” Pa hegwangpei dwa ga kelüt dau, pa hegwangpei dwa ga koktung mie pe zu hangdeu tunglu.24Nathan rangdi, “A mpaube hegwangpei, nang, ‘Adonijah acai leu zie, nah pa a hegwangbam ga bam zie,’ de rang ni?25Kedanemene henai pa mie, ketum, ketumna pelui yitubedung, nah meurün kekiee ge ratak teigai, nah hegwangme namedung pelane, reugwame reu kedibe, nah cingkupei Abiathar de kugai. Ainie, penui pe dwa gade tyei nah sak bam, nah rang eh, ‘Hegwangpei Adonijah Ringtielo!’26Dede Ih, n kilabe, cingkupei Zadok, Jehoiada napei Benaiah, nah n kilabe Solomon anuide pa ku ma.27A mpaube hegwangpei anui da rang mene ma aidung de tei di deni, n kilamedung, caune a rampaube hegwangpei hegwangbam ga pecai leu eh bam kerabe no?”28Ge hegwangpei David sam keli eh rangdi, “Bathsheba de a taiga ku caili gwang.” Pa hegwangpei taiga gwanglu delwe hegwangpei dwa ga saplu.29Hegwangpei sampet gai eh rangdi, “RAMPAUBE a teilung kehung leu gade teu mpet kebeube ring kela nzwa,30RAMPAUBE, Israel Tinggwang zi gade Ih nda ge sampet gai eh, ‘Solomon n napei acai leu zie, nah pa a hegwangbam a ni ga bam zie,’ de eh rang kegai nzwa, Ih henai aide tei bi beuzie.”31Ge Bathsheba keumie hangdeu ga pezu tunglu delwe pa hegwangpei dwaga koktung mie eh rangdi, “Peu a mpaube hegwangpei David de kelungta ring kelube teilo!”32Hegwangpei David rangdi, “Cingkupei Zadok, caihakecibe Nathan nah Jehoiada napei Benaiah de a taiga ge ku teu gwang.” Cine penui hegwangpei dwa ga gwanglu.33Hegwangpei penui dage rangdi, “Nnui mpaube kilame de nnui ngngwa lwe tetcu, nah a napei Solomon de agu gada reuga peu cwalu delwe pecu Gihon ga ngngwa hunglu.34Peu Zadok cingkupei nah Nathan caihakecibe de cika pecu Israel reu hegwang tei kera keniak lu nah telui kwa gai eh rang eh, ‘Hegwangpei Solomon ringtielo!’35Cipaucai nang pecai sui nghang zie, nah pa gwang lwe a hegwangbam ga bam luzie, kedanemene pa a bam ga hegwang tei zielu, Ih ne pecu kedet lu da Israel nah Judah reu kedi tei kera.”36Jehoiada napei Benaiah hegwangpei sam keli eh rangdi, “Cine peu ge cinzwa lu! Peu RAMPAUBE, Tinggwang a mpaube hegwangpei kerang de.”37RAMPAUBE a mpaube hegwangpei da kela de nzwa, peu Solomon da de la kelube teilu, nah peu pe hegwangbam tei mdi lu, a kedibe hegwangpei David hegwangbam swa de.38Cine cingkupei Zadok, caihakecibe Nathan, Jehoiada napei Benaiah, nah Kerethme nah Pelethme tet nghung, nah peu Solomon de hegwangpei David gu gada reu gage kailwe; penui pecu Gihon ga ngngwa gwang.39Cingkupei Zadok maca bung ramzeuki gade keu mpet delwe Solomon de keniak lu. Cipaucai penui telui be kwa gai, nah mina pelane rangdi, “Hegwangpei Solomon ringtielo!”40Cipaucai mina pelane pecai sui nghangdi, nah mina nrina kwa nah penui sui yi süt di, nah penui kwa le kideube mlai di.41Adonijah nah pe giame, penui pecu ngngwa kebammedung hengyi cangdi lai eh kebam dau cide siulu. Joab telui kwa kebam siulu ge, pa rangdi, “Namdi ga makwa tu kebam de dai kwa no?”42Pa marang kebam dau cingkupei Abiathar napei Jonathan gwanglu. Adonijah rangdi, “Gwanglu, kedanemene nang au mina keyi ge nah samlia keyi teugwang lalu.”43Jonathan sam keli eh Adonijah dage rangdi, “Ma! Anui mpaube hegwangpei David Solomon de hegwang tei luda,44nah, hegwangpei cingkupei Zadok, caihakecibe Nathan, Jehoiada napei Benaiah nah Kerethme nah Pelethme de pecu ngngwa langgai. Penui peu pecu hegwangpei gada reuga cwala.45Cingkupei Zadok, nah caihakecibe Nathan pecu hegwang tei kera Gihon gade keniak luda, nah cika de suiyi sah eh hang dida, cine namdibe ga makwa tu bam. Cipau kwa de nnui siu bam.46Nah Solomon de hegwangram hegwangbam ga bam dida.47Cipau reude, hegwangpei kilamedung anui kedibe hegwangpei David de samlam kera gwang eh, ranggai, ‘Peu nnui Tinggwang de n zi swa de Solomon zi be tei mdi kelube teilo, nah pe hegwangbam de n hegwangbam swa de tei ndi kelube teilo.’ Cipaucai hegwangpei zeu gade keu mielu.48Hegwangpei ainzwa de rang si, ‘RAMPAUBE, Israel Tinggwang dede twa lugo, henai a leuhme gede peu a hegwangbam ga bam kera peuda, nah cide a miak le ngaulu da.’”49Cipaucai Adonijah giame pelane ngngi di. Penui cuh lwe penui katei penui lampui lege tet gai kapdi.50Adonijah Solomon zu ngau gai kera ngngi di nah cuhlu delwe nlüt recabam kimiakdung pinglu.51Pecai Solomon dage ainzwa rangbeu, “Pielo, Adonijah hegwangpei Solomon de ngngi bam dida, kedanemene pa recabam kimiakdung pinglu eh ranggai, ‘Peu hegwangpei Solomon de henai, pa pe kilabe de pe kiengtie le teitsetdi laklie kecu ada pesam pet gai beulo.’”52Solomon rangdi, “Pa ma kesangme ge teilu zie cai, petam lie gede peu hangdeu ga kaumiedi lak, dede peda kesia ngaulu cai, pa tsai zie.”53Cine hegwangpei Solomon langgai, nah penui pecu recabam gade ngngwa nghunglu. Pa gwanglu delwe hegwangpei Solomon da keumielu, nah Solomon pe dage rangdi, “N kilung ga gwang cu.”
Bridge Connectivity Solutions Pvt. Ltd.