Corinthiame Keraibe10
1Ih nnuide peu ci mene bamneu ma, sinamedung, anui peime pelane de hemwa ne gumteu gwang nah pelane de Jaaidi Kegie de kahgwang lie kecude,2nah hemwa gade nah jaaidi gade penui pelane de Moses caisuime tei eh duipum tei kaplu,3nah penui pelane de rabe taktyei de tyei,4nah penui pelane de rabe kesakbe duide sak, kedanemene penui tsura rabe penui caisui kelade gade sak, nah tsura cide au Khrista.5Dede Tinggwang mi kekiee ge de pesui tadi nah penui paaudung hetaideu gage teizang gaidi.6Cu aidungde anui ziemne saukelia ge da, iciu eh anui ma kesiabedung, penuide hengin kela nzwa hengin melu kerane.7Penui mina kangge nzwa mamie kerecame tei diso; kesanglaisiu ga raupwakela nzwa, “Minadung matyei masak kera ntum bamlu, delwe helim lim kera cuhdi.”8Penui kekiee ge nzwa anui kemmha ta tei buima, penui cikenzwa tei eh tingnaige gage mina cang ngkai eh kecum tsaidi.9Penui kekiee ge nzwa anui Khrista de kedak kerabe ma, penui pecu kedak pie eh penuide heneidung ne tei ngkapdi.10Penui kekiee ge nzwa anui ncam kerabe ma, penui ncam gai eh penuide kengkappe ne ngkapdi.11Cu ma aidungde penuida teikegai de au saulia kegai ge. Cidungde au anuide rang mriaklu kerane raupwa bam, kedanemene anui peting penlibe ga lungh kebam ziemne.12Ciziemne mige pa saplu delie cet kelabe de peu sünne lu, ciu eh pa kaudi melu kerane.13Mdakkepie gede nnuida gwang mereu, mina da gwangla kela de gwale. Dede, Tinggwang au samsang, pa nnui liagai kelak nreu pwa nnuide kedei lak, dede mdakkepie de si eh pa mbai lukera lampui de peuzie, iciu eh nnui cide lialu kerane.14Cine, akumedung, mamie kereca gade mbai lulo.15Ih kemriakme dage nzwa eh rangla; Ih kerang de nnuikatei tiak lulo.16Anui samlam kebeu piak pwa samlam kelade, Khrista jai ga bamde meni? Anui tangku teipang kelade, Khrista pumbe ga ngngwa ncüt bamde meni?17Tangkukwak ket rünne kecune, anui kekiee ge liede ngngwa pum ge, kedanemene anui pelane de tangkukwak ket de gade ngngwa tyei kelane.18Israelme ha cetgai pielo. Ratak teibeu kedibe pwa ketyeime recabam ga heta keteime de ngngwa kemacüt bamde meni?19Ciucai Ih dai rangzeu no? Ketyeipok mamie de pwa ratak tei kedibe au pe kemlang bamlie rangla ni, mede mamiedung au kesanglie rang lani?20Ma, Ih rang kelade kiecai, Gentileme ratak tei kelade penui herakesiadung de ratak tei beula nah Tinggwang de ma. Dede Ih nnuide peu herakesiabe de ngngwa kemacüt kecume teineu ma.21Nnui Rampaube piak nah herakesiabedung piak gade ngngwa sak gailak. Nnui Rampaube taktyeibam nah herakesiabedung taktyeibam gade ngngwa tyei gailak.22Mi anui Rampaube rata teigai neu lano? Anui pe swa ngkiengki ni?23“Ma pelane tei lubui,” dede ma pelane pe kemmi gah. “Ma pelane tei lubui,” dede ma pelane mide tei mmi lu lama.24Peu migede de pekatei pe ziuyibe peei so, dede mi kedame ziuyibe peei lu.25Nnui lungcet gade magede keteu mene, litakni ga zwa kebambe pelane tyei lubui.26Kedanemene, “Kideube nah cika kebam keheibe de Rampaube gulu.”27Nlum kemakme keheibede nnuide matyei kera qucai, nah nnui mie neucai, nnui lungcet gade magede keteu mene nnui dwa gage kai kebeube pelane tyei lulo.28Dede mige nnui dade, “Aide pwa ratak teibeu dida,” de eh rang cai, cide tyei so, nnui dage rang kebeube de ziemne nah lungcet de ziemne,29cu Ih n lungcet de rangbam ma, dede pe lungcet de rangbam. Kedanemene daitei kedabe lungcet le a suirang ketei tiak lai?30Ih Tinggwang de twagai eh ngngwa matyei cai, daitei Ih twa kegai de ziemne acu kii lano?31Ciziemne, nnui tyei mede sak liede, mede nnui ma keheibe tei liede, pelane Tinggwang kendu ziemne tei lulo.32Jewme mede Greekme, mede Tinggwang ngqwabe suisiet teiso.33Ih de ma pelane gade mina leune suiyi tei kera teila. Ih akatei a ziuyi peei lama, dede mi kekiee ziuyi peeila, iciu eh penuide kelilu kerane.
Bridge Connectivity Solutions Pvt. Ltd.