1 Heleuhha23
1David cing di nah pe teilung kekam lebie nna gwang dige, pa pe napei Solomon depeu Israel reu hegwang teilu.2Pa Israel muiteume pelane, cingkumedung nah Levime de si eh qu hekwalu.3Levimedung mmi camrei nah ciswa kecingme pum peilu. Penui pelane ge cang camreieheset.4“Aidungde gade, cang ngkaiehmdai cai RAMPAUBE kerecaki ga bata pie rengei kerame, nah cang herok cai kedimedung nah tutiakmedung.5Cang mdai cai kirie kekwamedung, nah cang mdai cai ketwa peu kera lei ketei netdung Ih ne tei kelu de pwa RAMPAUBE de ketwa peu kerame,” de eh David ranggai.6David penuide mzi pwa maa cum teilu Levi pautsa rehi gade: Gershon, Kohath, nah Merari.7Pautsa Gershon pautsa gade cai, Ladan penai Shimei.8Ladan napeime hangcum bam: muiteube Jehiel, Zetham, nah Joel.9Shimei napeime hangcum bam: Shelomoth, Haziel, nah Haran. Aidungde Laban pautsa muiteumedung.10Shimei napeime hang mdai bam: Jahath, Ziza, Jeush, nah Beriah.11Jahath cai cingtube, nah pekenabe cai Ziza, dede Jeush penai Beriah penai napeidung kiee ma, cine penui tadung nzwa eh penuide pautsa ge peidi.12Kohath napeime hang mdai bam: Amram, Izhar, Hebron, nah Uzziel.13Aidungde Amram napeidung: Aaron penai Moses. Aaron de peu mcitube niadung keuntsam lu kerane kedetlu, pa nah pe leuhmedung RAMPAUBE dwa perim kehengui ru gai kera, pe gwatei kera nah pezi gade kelungta samlambeu kerane.14Dede Tinggwang minabe Moses name de Levime pautsa ga silu.15Moses napei kena cai Gershom penai Eliezer.16Gershom leuh cai cingtube Shubael.17Eliezer leuh cai Rehabiah. Eliezer pe na keda gah, dede Rehabiah leuh mina kiee süt.18Izhar napei cai Shelomith muiteube.19Hebron leuhme cai cingtube Jeriah, pekenabe Amariah, pekecumbe Jahaziel, nah pemdaibe Jekameam.20Uzziel napeime cai cingtube Micah, nah pekenabe Ishijah.21Merari napei kena cai Mahli penai Mushi. Mahli napei kena cai Eleazar penai Kish.22Eleazar pe napei kette gah eh tsaidi. Pa pe napui rünne bam. Kish napeidung penuide ngngwa lungh di.23Mushi napei hangcum cai Mahli, Eder, nah Jerimoth.24Aidungde Levi leuhme penui pautsa rehi gade. Penui au muiteumedung, penuide pei nah penui zi rau kelume, mmi ngkai gade nah penreu lebie gade, RAMPAUBE kerecaki reca ga bata ketei pautsame.25Kedanemene David rangdi, “RAMPAUBE, Israel Tinggwang, pe minadung de lungciep peu da. Pa kelungta Jerusalem de pe ki tei zie.26Levime RAMPAUBE kebam paiki de nah kereca ga teu kela pe netdung pelane teupwa si dai lakta.”27Kedanemene David sam ranglia kamtube gade Levime mmi ngkai nah pe nreu lebieme de peilu.28Penui tadung cai, Aaron leuhme de RAMPAUBE kerecaki reca ga ngha kera. Penui cai kigudung, kibungdung rengei kera, RAMPAUBE gu kemci netdung pelane tei mci kera, nah Tinggwang kerecaki ga heta keda rengei kerane.29Penui reca kebeu tangku de, mei reca ziemne teu kela tokkui de, tsehi kai kemak tangkudung de, ru kelu recadung, maca le haikelu recadung de, nah reca kebeudung pelane rüt teu nah petie pedi leune mdet de de pie rengei la.30Penui RAMPAUBE de tingcang ramsangne twa nah tei ndu kera de sapla. Penui tinghegi de aide teila31nah Sabbath benai, keici ngyidung ga, nah hengyi tingdau RAMPAUBE de keru recadung keheidau ketei dau teila. Hezai gade nlum kebeu, riem kelu mina riak de RAMPAUBE dwa ga heta tei mui maisia.32RAMPAUBE kebam paiki, kemci ni rengei kera nah RAMPAUBE kerecaki ga penui kibaume Aaron leuhme de heta ga ngha kera penui de nlum beudi.
Bridge Connectivity Solutions Pvt. Ltd.