1 Heleuhha14
1Pecai Tyre ga hegwangpei Hiram samgwame, nah cedar tsingdung, tsing ta keteime nah tangtsu ta keteimedung de David dage lang gaibeu. Penui pe ziemne ki ge teibeu di.2David RAMPAUBE pecu Israelme reu hegwang teilu delie kecu nah pe hegwangram pe mina Israelme ziemne tei ngkieng beu delie kecu cibam.3Jerusalem gade, David pe nau tei dailu, delwe pa pe na mipeinadung nah mipuinadung lung si dailu.4Aidungde cai Jerusalem gade pe name mna kelume zidung: Shammua, Shobab, Nathan, Solomon,5Ibhar, Elishua, Elpelet,6Nogah, Nepheg, Japhia,7Elishama, Beeliada nah Eliphelet.8Philistinme David de peu Israel pelane reu hegwangpei tei kera keniaklu delie kecu siulu ge, penui pelane pecu pei miedi. Dede David aipau ha de siulu nah penuide regi kera tet petdi.9Philistinmedung gwang delwe Rephaim chabak ga mie hema tui ladi.10Pecai David Tinggwang dade kengha kiedi. Pa rangdi, “Ih Philistinme de gwaketang zie ni? Nang penui reu ngkieng kelu peu zie ni?” RAMPAUBE pe dage rangdi, “Gwaketang cu, kedanemene Ih penuide ncu peu bi zielu.”11Cine penui Baal Perazim ga mielu, nah cikade David penuide ngamlu. Pa ranggai, “Tinggwang ne a ba gade a ngauraumedung kakga dui kedi pangpop mie kecu nzwa teipang pop luda.” Cine cipau heni zi de Baal Perazim de qudi.12Philistinme penui rabedung de cika ge gidi, nah David cidungde rudi lo eh aja kaigai.13Pecai Philistinme langkam de mie hema tui bam daidi.14David cine Tinggwang dade kengha kie daigai. Tinggwang pe dage rangdi, “Nang penui dwa lede gwaketang helo, dede penui caile twagwa gwang eh balsam tsingdung kak gade penuide gwa lüt lulo.15Nang Balsam bang tündung gade tingkai gui kebam ga tet kegwang kwa siu keludau, kengkieng teu gwaketang lulo. Aide tei lulo kedanemene Tinggwang au Philistinme reugwame de gwaketang kera n dwa tet rai gwang zielu.”16Cine David Tinggwang pecu rang kebeu nzwa teilu. Pa Philistinme reugwame de Gibeon gade gwang Gezer kecang ngamlu.17Pecai David keyi ha kideu pelane ga ci gwang di, nah RAMPAUBE heleuh pelane de peu pecu hing di.
Bridge Connectivity Solutions Pvt. Ltd.