लेव्य8
1ओवतो यहोवा मुसाह केयो,2“तु हारून एने तान सोरान फाड़का, एने अबिषेक ने तेल, एने पापबोलीन वासड़ो, एने दुय मेंडा एने अखमीरी रोटान टोपलीह ले,3एने मिलापवाला तोम्बुन बायणा हिऱ्यो लीयाव, एने ताहरीस आखी मोंडलीह टुलो केर।”4यहोवान ज्या उकुमान गेत मुसो किऱ्यो; एने मोंडली मिलापवाला तोम्बुन बायणा हेऱ्यी एकठी एनी।5तेवी मुसो मोंडलीह केयो, “जो काम केरनेन उकुम यहोवा आपेल हे, तो ज्यो हे।”6ओवतो मुसा हारून एने तान सोराह आहने ली जाएन पाण्या केरीन उंगलायो।7तेवी मुसो हारूनाह फाड़का पेरायो, एने पुट्टो वेटालीन चोगा पेराव दिनो, एने एपोद लागाड़ीन एपोद ने गुथील पोट्टा से एपोदाह खेचीन बांद दिनो।8तेवी मुसो सातीह ढापण्यो फाड़को बांद्यो एने खीसाम उरीम एने तुम्मीम मिल्यो।9तेवी मुसो हारूनान मुंडी पोर पागड़ी बांदिन पागड़ीन सामने होनान पोट्टीह, मतलब चोखाला मुकूटाह लागाड्यो, जिह केरीन यहोवा मुसाह उकुम आपेल इतो।10तेवी मुसो अबिषेक ने तेल लेन रेणेन जागो एने जी बी चिज ता माय एत्यु, त्यु आख्यु चिजु पोर सेड़कीन त्युह चोख्यु किऱ्यो।11एने मुसो अबिषेक ने थोड़ोक तेल लेन वेदी पोर हात वार सिड़क्यो, एने आखो सामान बेल वेदीन एने पाया बेल डेचक्यान अबिषेक केरीन ताह चोखो किऱ्यो।12एने तो अबिषेक ने तेलाम रेन थोड़ोक हारूनान मुंडी पोर रोचवीन तान अबिषेक केरीन ताह चोखो किऱ्यो।13ओवतो मुसो हारूनान सोराह आहने लावीन फाड़का पेरायो, एने कोमेर पुट्टो बांदिन तान मुंडी पोर टोपी मेल दिनो, जिह केरीन यहोवा मुसाह उकुम आपेल इतो।14तेवी मुसो पापबोलीन बोयलाह आहने ली गीयो; एने हारून एने तान सोरा तान आथ पापबोलीन बोयलान मुंडी पोर मेल्या।15तेवी मुसो ताह बोली किऱ्यो, एने मुसो लुय लेन आंगली केरीन वेदीन चारू हिंगा पोर लागाड़ीन चोखो किऱ्यो, एने लुयीह वेदीन पाया पोर रोचीव दिनो, एने तानकेरता पासतावो केरीन ताह चोखो किऱ्यो।16एने मुसो आतड्या पोर वाली आखी चेरबी, एने कालजाह डापण्यी कातली लिदो, एने चेरबी बेल दुयू बुकाह लेन वेदी पोर हेलगाड्यो।17पुण मुसो बोयला माय रेन जो काय रेय गीयो ताह, मतलब चामड़ो, माह एने साणाह पाड़ावान बाहेर आक्ठाम हेलगाड्यो, जिह केरीन यहोवा मुसाह उकुम आपेल इतो।18ओवतो मुसो होमबोलीन मेंडाह लावो, हारून एने तान सोरा तान आथ मेंडान मुंडा पोर मेल्या।19तेवी मुसो मेंडाह बोली किऱ्यो, एने तो वेदीन कावदेन लुय सिड़क्यो।20तेवी मेंडो टुकड़ा टुकड़ा केराय गीयो, एने मुसो मुंड एने चेरबी बेल टुकड़ाह हेलगाड्यो।21तेवी आते एने पाय पाण्या केरीन दोवाय गीया, एने मुसो पुरा मेंडाह वेदी पोर हेलगाड्यो, ज्यी आक्ठा माय बेट किरेल होमबोली एती। ज्यी यहोवान केरता हाजी गेंद एती, मुसो यहोवान उकुमान गेत आखा काम किऱ्यो।22तेवी मुसा दिहरा मेंडाह जो अबिषेक बोलीन मेंडो एतो ताह आहने लावो, हारून एने तान सोरा तान आथ मेंडान मुंडी पोर मेल्या।23तेवी मुसो मेंडाह बोली किऱ्यो, एने तान लुयीम रेन थोड़ीक लेन हारूनान जीवड्या कानान सेवटा पोर एने तान जीवड्यो आथ एने जीवड्या पायान आंगठा पोर लागाड्यो।24तेवी तो हारूनान सोराह आहने ली गीयो, एने लुयीम रेन थोड़ीक एक एकान जीवड्या कानान सेवटा पोर एने जीवड्यो आथ एने जीवड्या पायान आंगठा पोर लागाड्यो; एने मुसो लुयीह वेदी पोर कावदेन सिड़क्यो।25एने तो चेरबी, एने चेरबी वाली सेमटी, एने आतड्या पोर वाली आखी चेरबी, एने कालजाह डापण्यी कातली बेल दुयू बुका एने जिवड़ी जांग, ज्य आखो लेन आलेग मेली।26एने अखमीरी रोटान टोपली जी यहोवान ओंगाण मेलायेल एती, ताम रेन एक अखमीरी रूटो, एने तेला माय कुहणायेल मोयदान एक रूटो, एने एक रूटो लेन चेरबी एने जिवड्यी जांगी पोर मेल दिनो;27एने मुसा ज्यु आख्यु वोस्तुह हारून एने तान सोरान आथाम मेल दिनो, एने आलाड़नेन बेटीन केरता यहोवान ओंगाण आलाड़ाय गियी।28तेवी मुसो ज्यु चिजुह हारून एने तान सोरान आथाम रेन लिदो, ताह वेदी पोर होमबोलीन उपेर हेलगाड्यो, ज्य यहोवाह केरता हाजी गेंद आपणेन केरता अबिषेक ने बेट एने यहोवान केरता आक्ठान बोली एती।29तेवी मुसो ता मेंडान सातीह लेन आलाड़नेन बेटीन केरता यहोवान ओंगाण आलाड्यो; एने अबिषेक ने मेंडा माय रेन मुसान ईसो ज्योस इनो, जिह केरीन यहोवा मुसाह उकुम आपेल इतो।30तेवी मुसो अबिषेक ने तेल एने वेदी पोर वाली लुय, दुयूम रेन थोड़ीक लेन हारून एने तान फाड़का पोर एने तान सोरा एने तान फाड़का पोर बी सिड़क्यो; एने तो फाड़का बेल हारूनाह बी चोखो किऱ्यो।31तेवी मुसो हारून एने तान सोराह केयो, “माहाह मिलापवाला तोम्बुन बायणा पोर रांदो, एने ता रोटाह जो अबिषेक बेटीन टोपली माय हे तोस खावो, जीह मी उकुम आपेल हे काय हारून एने तान सोरा ताह खाय।32केदी माह एने रूटो वोच जाय, ताहार ताह हेलगाड़ दिज्यो।33एने जाह वोर तुमरा अबिषेक ने दिह पुरा नाय एती ताह वोर, मतलब हात दिह वोर मिलापवाला तोम्बुन बायणान बाहेर मा जाहो, काहाकाय तो हात दिह वोर तुमूह अबिषेक केरते रेय।34जिह केरीन आज केरायेल हे, तिहेच केरीन केरनेन उकुम यहोवा आपेल हे, जा केरीन तुमरा पाप डापाय जाय।35केरीन तुमू मिलापवाला तोम्बुन बायणा पोर हात दिह वोर रात दिह रोकाय रिज्यो, एने यहोवान उकुमाह मानज्यो, ताहार तुमू मोर नाय जाहो; काहाकाय ओहलोच उकुम माहु आपायेल हे।”36तेवी यहोवा कियेल ता आखा उकुमान गेत जो तो मुसान द्वारा आपेल इतो, हारून एने तान सोरा केऱ्या।
The Word for the World International