लेव्य5
1केदी एगदो माणुह कोरटाम गोवाय देणेन केरता हादाड़ाय जाथे, एने जो काय तो दिखेल हे नाहते होमलेल हे, ताह नाह केत ताहार तो पाप किरेह, ताह तान गुनान केरता देन्ड बोगणे पोड़ी।2पुण केदी इखेह माणुह एगदी एठी चिजीह बुल माय सापली लेय, ताहार तो एठा जेंगली जेनवेरान नाहते पालन्या जेनवेरान नाहते लोलनारा एगदा एठा जेन्तुन देड़ रेय, ताहार तो एठो एन दोसी ठेराय।3पुण केदी एगदो माणुह एगदी एठी चिजीह बुल माय सापील लेय, केदी ती एठी चिज काल्ली बी रितीन काहा नाय रेय, जी केरीन माणहे एठा एय जातेह, ते जेवी तो ती वातीह सोमजी लेय, तेवी तो दोसी ठेराय।4पुण केदी एगदो बुरो नाहते हाजो केरनेन बिगेर सोची, सोमजीन सुगोण खाय, केदी काल्ली बातीन वात तो बिगेर सोच विचारीन सुगोण खाएन केय, ताहार ओहली वातीम तो दोसी ती टेम ठेराय, जेवी ताह मालुम एय जाय।5एने जेवी तो ज्यु वातु माय रेन काल्ली बी वातीम दोसी रेय, तेवी तो तान पाप स्वीकार केर लेय, जाह तो किरेल हे,6एने तो यहोवान सामने तान दोसबोली लियावो, मतलब ता पापान कारेण तो एक मेंड्रो नाहते बोकड्यो पापबोली केरनेन केरता लियावो; तेवी चाकर्यो तान पापान बाराम पासतावो किरे।7पुण केदी एगदा माणहाह मेंड्रो नाहते बोकड्यो आपणेन ताकेत नाय रेय, ताहार तान पापान कारेण दुय ओला नाहते पेरवान दुय पिला दोसबोली चेड़ावणेन केरता यहोवा फाय लियावो, ताम रेन एक पापबोलीन केरता एने दिहरो होमबोलीन केरता।8तो ताह चाकऱ्या फाय लियावो, एने चाकर्यो पापबोली वालाह पेल चेड़ावे, एने तान मुंड गेलाम रेन पेंदिल देय, पुण आलेग नाय किरे,9एने तो पापबोली चिड़ान लुयीम रेन थोड़ीक वेदीन आहने सिड़के, एने जी लुय वोच रेय ती वेदीन पाया पोर रोचवाय जाय; ती पापबोली ठेराय।10तेवी दिहरा चिड़ाह तो नेमान गेत होमबोली किरे, इह केरीन चाकर्यो ता माणहान पापान केरता पासतावो किरे, एने यहोवा ता माणहाह माफ केरी।11पुण एगदा माणहाह दुय ओला नाहते पेरवान दुय पिला बी नाय आप सेकी, ताहार तो तान पापान कारेण तान चेड़ावणो एक किलो मोयदान दोहवो ईसो पापबोली सोमजीन लियावो; ता पोर नाहते तो तेल टाके, एने नाह हालयान ढिक मेली, काहाकाय तो पापबोली रेय।12ता माणहाह फिट चाकऱ्या फाय लावणे जुवे, चाकर्यो ज्याम रेन मुठबोर फिट निकाली, ज्यी एर केरावणी बेट रेय, चाकर्यो यहोवाह आक्ठान द्वारा किरेल बेटी पोर वेदीन उपेर फिटाह हेलगाड़े, ती पापबोली ठेराय।13इह केरीन चाकर्यो माणहान गुनान केरता पासतावो किरे, एने यहोवा ता माणहाह माफ केरी, एने ज्यी पापबोलीन वुचेल बाग एन बोलीन वुचेल बाग ने गेत चाकर्यान रेय।14यहोवा मुसाह केयो,15केदी एगदो यहोवान चोखी किरेल चिजीन बाराम बुल माय गेलती केरी एने पापी ठेराय, ताहार तो यहोवा फाय एक हाजो मेंडो दोसबोलीन केरता लियावो; तान किमोत चोखाला जागान शेकेलान गेत तोलोस तोलाय जाय, जोलोक चाकर्यो ठेरावी।16एने जी चोखाली चिजीन बाराम तो पाप किऱ्यो एय, ताम तो पाचवो ईसो उंजु वोदाड़ीन चाकऱ्याह आपी; एने चाकर्यो दोसबोलीन मेंडो चेड़ावीन तानकेरता पासतावो किरे, तेवी तान पाप माफ केराय जाय।17केदी एगदो ओहलो पाप किरे, जाह कामाह यहोवा नाह केरने कियेल हे, एगदा कामाह किरे, ताहार केदी ताह बुल माय ईयेल एय, तीबी तो दोसी ठेराय, एने ताह तान गुनान बार विसणे पोड़ी।18केरीन तो एक हाजो मेंडो दोसबोली केरीन चाकऱ्या फाय लियावो, तो तोलीस किमतीन रेय, जोलीक चाकर्यो ठेरावी, एने जी गेलती तो बुल माय किरेल हे चाकर्यो तान केरता पासतावो किरे, एने ताह माफ केराय जाय।19ज्यी दोसबोली ठेराय, काहाकाय तो माणुह पाक्को यहोवान ओंगाण दोसी ठेराय।
The Word for the World International