यहोशु18
1ओवती इस्राएलीन आखी मोंडली शिलो गावा माय एकठी एन ताहरी मिलापवाला तोम्बुह उब राखाड्या; काहाकाय देस तान ताबाम आव जायेल इतो।2पुण तुलबुखे बी इस्राएल ने हात कुटूमे ओहला एता, जाह बोगवानान द्वारा वचन आपाणेन पोर बी ताह आपेल जागो नाह जुड़नो।3केरीन यहोशु इस्राएल ने माणहाह केयो, “जो देस तुमरा डायडायान बोगवान यहोवा तुमूह आपेल हे, ताह तुमरे आदिकार माय केर लेणेम तुमू केवीह वोर डिल्लाय केरते रिहो?4एवी एक एक कुटूमाम रेन तीन माणहे निवाड़ो जाह मी मोकलु काय ता देसान एक एक ईलाकाम जाय जाएन देखी, एने तान ईसान पारमाणे तान हाल लेख लेखीन मार फाय आवी।5ता देसाह हात ईसाम वाट लेय, यहुदान माणहे देक्षिण उगे तान ईसाम रेती एने युसूफ ने गेराणान माणहे उत्तर उगे तान ईसाम रेती।6एने तुमू देसान हात ईलाकान जाणकारी लेखीन मार फाय लेन आवो; एने मी न्याहरी तुमरी केरता आपणो बोगवान यहोवान सामने चिट्ठी टाकुह।7एने लेवीन तुमरे विचीम काल्लो ईसो नाय रेय, काहाकाय यहोवान आपेल चाकर्यान पोदुस तान ईसो हे; एने गाद, रूबेन, एने मनश्शेन आदा गेराणान माणहे बी यरदन ने पुर्व उगे यहोवान सेवक मुसान आपेल तान तान ईसो सापड़ाव लियेल हेते।”8तेवी ता एदमी उठीन चाल देना एने जा ता देसान हाल लेखणेन जाताला, ताह यहोशु ज्यो उकुम आप्यो, “देसान एक कोपरे रेन दिहरे कोपरे वोर जाय जाएन तान हाल लिखो; ओवता मार फाय पोशा आवज्यो; एने मी न्याहरी शिलो माय यहोवान सामने तुमरी केरता चिट्ठी टाकुह।”9तेवी ता एदमी देसान एक कोपरे रेन दिहरे कोपरे वोर फिरना, एने तान हेयरान हात ईसा केरीन तान हाल पुस्तेक माय लेखीन शिलोन पाड़ावाम यहोशु फाय आवा।10तेवी यहोशु शिलो माय यहोवान सामने तान केरता चिट्ठ्यु टाक्यो; एने यहोशु ताहरी इस्राएल ने माणहाह तान ईसा पारमाणे देस वाट दिनो।11बिन्यामीन कुटूमान चिट्ठी तान गेराणान पारमाणे निकल्यी, एने चिट्ठीन पारमाणे तान ईसो यहुदान वोसीन एने युसूफ वोसीन ईसान विचीम पोड़नो।12एने तान उत्तर उगेवाली एद्दी यरदन रेन सुरवात एनी, एने यरीहोन उत्तर उगे रेन चेड़तेन पश्चिम ने उगे बोयड़ावाला देसाम लागती बेतावेन ने जेंगलाम निकेलनी;13तारेन एद्दी लुज ने देक्षिण उगे मतलब बेतेल पोचनी, ओवती ता बोयड़ान आहने अत्रोतदार पोर उतेरनी जो नेचाला बेथोरोनान देक्षिण माय हे।14ओवती पश्चिम उगेवाली एद्दी वोलीन बेथोरोनान सामने एने तान देक्षिण उगेवाला बोयड़े लागती, किर्यतबाल मतलब किर्यत्यारीम नावान यहुदान एक हेयराम निकल्यी; पश्चिम ने एद्दी ज्यीस एती।15ओवती देक्षिण ने उगेवाली एद्दी पश्चिम रेन सुरवात एन किर्यत्यारीम ने सेवटे रेन निकलीन नेप्तोह ने पाण्यान जिरा पोर पोचनी;16एने ता बोयड़ान सेवटा पोर उतेरनी, जी हिन्नोमान बेटाख ने गाटान सामने एने रपाईम नावान गाटान उत्तर उगे हे; ता रेन ती हिन्नोमान गाटाम, मतलब यबूसीन देक्षिण उगे लागती एनरोगेल जिर वोर जात रेनी।17ता रेन ती उत्तर उगे वोलीन एनशेमेश रेन निकलीन ता गलीलोत ने उगे गियी, जी अदुम्मिम चेड़तीन सामने हे, ओवती ता रेन ती रूबेन ने बिटोख बोहन ने देगड़े वोर उतेर गियी;18एने ता रेन ती उत्तर उगे जाएन यरदन नेदीन सामनेवालो बोयड़ान उगे लागती अराबा माय उतेरनी;19तेवी ज्यी एद्दी बेथोगलान उत्तर ईसाम जाएन खारा देरीयान उत्तर ने खाड़ी पोर, मतलब यरदन नेदीन देक्षिण ने मुयाला पोर निवरी गियी, देक्षिण ने एद्दी ज्यीस एती।20एने पुर्व उगे यरदन नेदीन एद्दी एती, इहकेरीन ज्यी बुय एती जी बिन्यामीन ने कुटूमाह आपेल; ज्यु कावदेन वाल्यु एद्दयु एत्यु।21बिन्यामीन ने कुटूमाह तान वोचीन पारमाणे ज्या हियोर जुड़ना, यरीहो, बेथोगला, एने एमेक्कसीस,22बेतराबा, समारेम, बेतेल,23अव्वीम, पारा, ओप्रा,24कपरम्मोनी, ओफनी एने गेबा; ज्या बारा हियोर एने तावाला गाव जुड़ना।25ओवतो गीबोन, रामाह, बेरोत,26मीस्पा, कपीरा, मोसा,27रेकेम, यिर्पेल, तरला,28सेला, एलेप, यबूस मतलब यरूशलेम, गीबा एने किर्यत; ज्या चोवदा हियोर एने तावाला आखा गाव, बिन्यामीन ने ईसो तान कुटूमा पारमाणे ज्योस एतो।
The Word for the World International