यहेजकेल31
1इग्यारवा वोरह्यान तीसरा मोयनान पेल्ले दिह बोगवानान ज्य वचन मार फाय पोचनो।2एय माणहान सोरा, मिस्र देसान राजा फिरोन एने तान बिड़ीन माणहाह के,“तारी बोड़ाय माय तु कुणीन गेत हे।3देख, अश्शुर लबानोन ने देवदार इतोज्यान होबात्यु होबात्यु डाल्यु, मोटलो सावलो आपतालो एने जुलूम उच्यु एत्यु;एने तान डाल वादलाम वोर पुचेल एती।4पाणी तीह वोदाड्यो,एने उंडाला पाण्यान कारेण तो उचो वोदनो।ता माय नेद्यु तान जागे रेन कावदेन वोयताल्यु;एने तान खोदऱ्यु निकलीन मोयदानान आखा जाड़ा फाय पोचताल्यु।5केरीन तान उचाय मोयदानान आखा जाड़ाह रेन जुलूम वोदार एनी,तान डालख्यु जुलूम एन्यु,एने तान डाल्यु लांब्यु एय गीयु, काहाकाय जेवी त्यु निकेलन्यु तेवी त्युह जुलूम पाणी जुड़नो।6तान डाल्यु माय जुगावाला आखी बातीन चिड़ा वोहती केरताला,एने तान डालख्यु बुंदे मोयदानान आखी बातीन जेनवारे एता;एने तान सावलाम मोटल्यु जात्यु रेताल्यु।7तो तान बोड़ाय एनेतान डालख्युन लांबायीन कारेण होबातो इनो;काहाकाय तान मुले जुलूम होवटा पाण्यान आहने एता।8बोगवानान वाड़ान देवदार बी ताह नाह लिकाड़ सेकताला,सनोवर तान डालख्युन गेत बी नाह एता, एने नाह अर्मोन जाड़ तान डालख्युन बाराबोर एता,बोगवानान वाड़ान बी काल्लो जाड़ होबाय माय तान बाराबोर नाह इतो।9मी ताह डालख्युन जुलूम होबातो बाणायेल इतो,ओलो वोर काय एदेनान आखा जाड़े जा बोगवानान वाड़ाम एता, ताह एतखाताला।”10केरीन बोगवान यहोवा इही कियेल हे, “तान लांबाय जी वोद गियी, एने तान डाल जी वादलाम वोर पुचेल हे, एने तान उचायीन कारेण तान मोन फुल उठेल हे,11केरीन देसाम जो ताकेतवालो हे, मी ताच ने आथाम ताह होप देह, एने तो जोरूर ता हिऱ्यो खाराब वेवारो केरी, तान खाराब कामान वोजेसे मी ताह काड़ दियेल हे।12पाराया जो देसाम बिवाड़े ओहला माणहे हेते, ता ताह काटीन सोड़ देती, तान डालख्यु बोयड़ा पोर, एने सोब खोयरा माय पाड़ाय जाती, एने तान डाल्यु देसान सोब खोदराम टुटीन पोड़ रेती, एने देसा देसान आखा माणहे तान सावलाह सोड़ीन जात रेती।13ता पुड़ेल जाड़ा पोर जुगावाला सोब चिड़ा वोहती केरतेह, एने तान डालख्युन उपेर मोयदानान सोब जेनवारे चेड़ सेकतेह।14ज्य ज्यानकेरता एनो, काय पाण्यान जागे वाला सोब जाड़ाम रेन काल्लो तान उचाय नाय वोदाड़े, एने नाय तान डाल वादलाम वोर पोचाड़ी, ता माय रेन जोला पाणी सापड़ावीन मोजबुत एय जायेल हेते, ता उचा एता ता माय मुंड उचो नाह केऱ्या; काहाकाय ता आखान आखा माहणाम बुजायेल माणहान गेत मोतीन ताबाम केरायीन आंदारकेली माय टाकाय जाती।”15बोगवान यहोवा इही किथे, जे दिह तो आंदारकेली माय उतरी गीयो, ते दिह मी रेड़ायो एने उन्डाला देरीयाह डाप दिनो, एने नेद्युन जुलूम होवटो पाणी रोकाय गीयो; एने तान केरता मी लबानोन पोर नाराजगी साव दिनो, एने मोयदानान आखा जाड़े हुक गीया।16जेवी मी ताह माहणाम बुजायेल माणहान जागे आंदारकेली माय टाक दिनो, तेवी तान पोड़नेन आवाज होमलीन देस देसान माणहे बिय गीया, एने अदनान सोब जाड़े मतलब लबानोन ने हाज हाजा जाड़े, जोला ता माय पाणी सापड़ावतेह, ता सोबाह आंदारकेली माय हुक जुड़नो।17ता बी ता हेऱ्या तालवारी केरीन मारायेल माणहा फाय आंदारकेली माय उतरी गीया, मतलब ता जा तान खांद एता, एने देसा देसान विचीम तान सावला माय रेताला।18केरीन बोड़ाय एने मोठायीन बाराम एदेनान जाड़ाम रेन तु कुणीन गेत हे? तु ते एदेनान बाकीन जाड़ा हिऱ्यो आंदारकेली माय उताराय जाहे, एने बिगेर खेतनान माणहान विचीम तालवारी केरीन मारायेल माणहा हिऱ्यो पोड़ रिहे, फिरोन एने तान आखी बिड़ी हेऱ्यो ओहलोच एय, बोगवान यहोवान ज्योच बोल हे।
The Word for the World International