यहेजकेल2
1तो माहु केयो, “एय माणहान सोरा उबरेय जा, मी तार हिऱ्यो वातु केरूह।”2जीहे तो मार हिऱ्यो वातु किऱ्यो, तिहेच जीव मार माय रिग गीयो एने माहु पायान बोरहे उबो केर दिनो; एने जो मार हिऱ्यो वातु केरतालो तान वातु हुमल्यो।3तो माहु केयो, “एय माणहान सोरा, मी तुवाह इस्राएली माणहा फाय मोकेलथु, जो मारी वातीह नाकार केरनार देस हे; एने ता मारा उकुमाह तुड़ेल हेते; ता एने तान डायडाया आज वोर मारा उकुमाह तोड़ते आयेल हेते।4जा माणहा फाय मी तुवाह मोकेलने बाज रिनोह, तान पिढीन माणहे विणलाज्या एने एकएट्या हेते।5एने तु ताह किज्ये, मालीक बोगवान इही केरीन किथे, ता माय जा लेड़ाय केरनारा गेराणान हेते, ता होमली नाहते ते नाय होमली, तीबी ता ओलोक सोमजी लेती काय आपणी विचीम एक जाणकार आयेल हे।”6“एय माणहान सोरा, तु ताह नाहते तान वातीह बिहे मा; ज्य खेरो हे काय ता तार विरूद एय जाती एने तुवाह दुख देणे होद्ती, ता काटाल्या जुरखेल्या एने विचान विचीम बी रेणे पोड़ी, पुण ता जो काय केती, त्यु वातुह मा बिहे, तान मुय देखीन तारो मोनाह कमजोर मा किरहे।7तु ताह मारी वातु जोरूर किज्ये, ता होमली नाहते नाय होमली, काहाकाय ता ते राड़कुट्या हेते।”8“पुण एय माणहान सोरा, जो मी तुवाह केथु, तो होमली ले, ता राड़कुट्या माणहान गेत मा किरहे; एने जो मी तुवाह आपथु, ताह मुय उगाड़ीन खाय ले।”9तेवी मी निजेर टाकीन दिख्यो, काय मार उगे एक आथ आवणे बाज रिनोह एने ता माय एक पुस्तेक हे। 10जाह तो मार सोमोर उगाड्यो, ती पुस्तेकीन दुयू उगे काहणो, रेड़नो, एने दुखान वातु लेखायेल एत्यु।
The Word for the World International