निर्गमन39
1पोशा ता निल्ला, जामण्या एने रातला रेंगान गुथील फाड़का चोखाला जागान सेवा केरनारे चाकर्यान केरता, एने हारूनान केरता बी चाकर्यान फाड़का बाणाया; जीह केरीन यहोवा मुसाह उकुम आपेल इतो।2एने तो एपोद ने फाड़काह होनो, एने निल्ला, जामण्या एने रातला रेंगान फाड़कान, एने बारीक होणीन फाड़का बोणाया।3एने ता होनो ठोकी ठोकीन तान पात्रो बाणाया, पोशा पात्राह काटीन तार बाणाया, एने ता तारान द्वारे पातला हुतान बुणेल निल्ला, जामण्या एने रातला रेंगान फाड़का माय बारीक होणीन फाड़का माय कारागिरान कामा माय बेल देना।4एपोदाह जोड़नेन केरता ता तान खांदा पोर गाठ बाणाया, एने तो तान दुयू बी सेंंडा पोर जोड़ाय गीयो।5एने ताह आपेकणेन केरता जो काड़ेल पुट्टो ता पोर बुणेल इतो, तो ता हिऱ्यो बिगेर जुड़ेल इतो, एने तान बाणावोट ने होस, मतलब होनो एने निल्ला, जामण्या एने रातला रेंगान फाड़कान, एने बारीक वाटेल होणीन फाड़कान बुणील एतो; जिहकेरीन यहोवा मुसाह उकुम आपेल इतो।6ता सुलेमानी मोणी काटीन ता माय इस्राएली बारा गेराणान नावे, जिहकेरीन साप खोदणु तिहेस केरीन खुदेल, एने होनान खाचा माय लागाड़ देना।7तो ताह एपोद ने खांदान गाठी पोर लागाड्यो, ता केरीन इस्राएली माणहान केरता एर केरावणार मोणी ठेराना; जिह केरीन यहोवा मुसाह उकुम आपेल इतो।8एने तो सातीन पुट्टो एपोदान होस होनान, निल्ला, जामण्या एने रातला रेंगान फाड़कान एने बारीक वाटेल होणीन फाड़का माय दोयड़ीन काम किरेल बाणाया।9सातीन पुट्टो ते चोवकोट बोणनो; एने ता ताह डोबेल बाणाया, एने तो डोबेल इन एक बिलास लांबो एने एक चोवड़ो बोणनो।10एने ता ता माय चार मोणी, पेल्ली आरी माय माणिक्य, पद्मराग, एने लालड़ी गुथ्या;11एने दिहरी आरी माय मरकत, निलमोणी एने हिरा,12एने तीसरी आरी माय लशम, सुर्यकांत, एने निलम;13एने चोवथी आरी माय फिरोजा, सुलेमानी, मोणी, एने यशब गुथ्या; ज्या सोब आंगे आंगे होनान खाना माय गुथ्या।14एने ज्यु आख्यु मोण्यु इस्राएली माणहान बेटाख ने नावान गेणती पोर रेन बारा एत्यु; बारा गेराणाम रेन एक एकान नाव जिहकेरीन साप कोरीन बाणायेल तिहेस केरीन कोऱ्या।15एने ता सातीन पोट्टा पोर दोयड्युन होस गुथील चोखाला होनान हाकोल बाणावीन लागाड्या;16पोशा ता होनान दुय खाचा, एने होनान दुय आकड़ा बाणावीन दुय आकड़ाह सातीन पोट्टान दुयू सेंडा पोर लागाड्या;17तेवी ता होनान दुय गुथील हाकलीह सातीन पोट्टान सेंडा पोर वाला दुय आकड़ा माय लागाड्या।18एने गुथील दुय हाकलीन दुय बाकीन सेंडाह ता दुयू खाचा माय लागाड़ीन, एपोदान ओंगाण दुय खांदान गाठ पोर लागाड्या।19एने ता होनान उंजु दुय आकड़ा बाणावीन सातीन पोट्टान दुय सेंडा पोर तान ती कुर पोर, जी एपोदान माय वाला खाचाम एती, लागाड्या।20एने ता होनान दुय उंजु आकड़ा बोणावीन एपोदान दुय खांदान गाठी पोर बुंदे रेन तान ओंगाण, एने लागाड़ीन, एपोदान काड़ेल पोट्टान उपेर लागाड्या।21एने ता सातीन पोट्टाह तान आकड़ा केरीन एपोदान आकड़ा माय निल्ला दोयड़ी केरीन ओहलो बांद्या, काय तो एपोदान काड़ेल पोट्टान उपेर रेय गीया, एने सातीन पुट्टो एपोदाह रेन आंगे नाय एणे जुवे; जीह केरीन मुसाह यहोवा उकुम आपेल इतो।22ओवतो एपोदान डेगलो आखो निल्ला रेंगान बाणाया।23एने तान बाणावोट ओहली एती काय तान विच माय कालेर ने डोसान होस एक डुसो बाणाया, एने ता डोसान कावदेन एक कुर बोणाया, काय तो फाटणे नाय जुवे।24एने ता तान बुंदे वाला मिऱ्या माय निल्ला, जामण्या एने रातला रेंगान फाड़कान दाड़ीम बाणाया।25एने ता चोखाला होनान गेंट्यु बी बाणावीन डेगलान नेचला मिऱ्यान कावदेन दाड़ीम विचीच माय लागाड्या;26मतलब डेगलान नेचला मिऱ्यान कावदेन एक होनान गेंटी, एने एक दाड़ीम पोशा एक होनान गेंटी, एने एक दाड़ीम लागाड्या काय तो पेरीन सेवा केरी; जीह केरीन यहोवा मुसाह उकुम आपेल इतो।27पोशा ता हारून एने तान बेटाख ने केरता गुथील बारीक होणीन फाड़कान डेगलो,28एने बारीक होणीन फाड़कान पागड़ी, एने बारीक होणीन फाड़कान हाजाल्यु टोप्यु, एने बारीक वाटेल होणीन फाड़कान चोड्डी,29एने बारीक वाटेल होणीन फाड़कान एने निल्ला, जामण्या एने रातला रेंगान कारागीरा फाय रेन काम किरेल कोमरान पुट्टो; न्या आखो यहोवा मुसाह उकुम आपेल इतो, तिहेस केरीन बाणाया।30पोशा ता चोखाला मुकूट ने पाट चोखाला होनान बाणाया; एने जिहकेरीन सापा पोर तिहेस केरीन ता माय ज्या आक्षर कोऱ्या, “मतलब यहोवान केरता समर्पित।”31एने पोशा ता ता माय निल्लो दोयड़ी लागाड्या, ता केरीन तो उपेर पागड़ी पोर रेय, जीह केरीन यहोवा मुसाह उकुम आपेल इतो।32एने जीह केरीन मिलापवाला तोम्बुन रेणेन जागान सोब काम निवरी गीयो, एने जा जा कामान उकुम यहोवा मुसाह आपेल इतो, इस्राएली माणहे तिहेस केरीन केऱ्या।33तेवी ता तोम्बुह मुसा फाय लावा, मतलब केड्यु, खासा, आकड़ा, खांबा, पाया आखा सामाना हेऱ्यो;34एने रातला रेंगा केरीन रिंगेल मेंडान खालड़ान डेगलो, सुइसो मासान खालड़ान डेगलो एने विच माय वालो पुड़दो;35डांडी हेऱ्यी गोवायीन पेटी, एने पासतावान डापोण;36एने आखा सामाना हिऱ्यो टेबल, एने बेटीन रूटो;37एने आखा सामाना हिऱ्यो हाजो होनान दिवो, एने ताह हिंगारनेन केरता दिवो एने उजालो केरनेन केरता तेल;38एने होनान वेदी, अबिषेक ने तेल, एने गेंदाण्यो दुणी, एने तोम्बुन बायणान केरता पुड़दो;39एने पितलान जारो, डेंगा एने आखा सामाना हेऱ्यी पितलान वेदी; एने पाया हेऱ्यो तोपल्यो;40खांबा एने पाया हेऱ्यी खोलीन पोड़दा, दोयड़ा, पाटड्या एने मिलापवाला तोम्बुन रेणेन जागान सेवान आखो सामान;41चोखाला जागाम सेवा केरनेन केरता दोयड़ीन बाणायेल फाड़का, एने हारून चाकऱ्यान चोखाला फाड़का, एने तान बेटाख ने फाड़का जाह पेरीन ताह चाकऱ्यान काम केरनु एतो।42मतलब जो जो उकुम यहोवा मुसाह आपेल इतो तिहेस केरीन इस्राएली माणहे सोब काम केऱ्या।43तेवी मुसा आखा कामाह हास केरीन देख्यु, काय ता यहोवान उकुम माय रेन आखो काम किरेल हेते। एने मुसा ताह बोरकेत आप्यो।
The Word for the World International