निर्गमन29
1“एने ताह चोखालो बाणावणेन केरता जो काम तुवाह ता फाय रेन केरनु हे काय ता मार केरता चाकऱ्यान काम केरती, तो ज्य हे : निर्दोस वासड़ो एने दुय निर्दोस मेंड्रा लावज्ये,2एने बिगेर खमीर चोपड़ेल रूटो, एने तेलाम कुहणेल मोयदान बिगेर खमीर चुपड़ेल रोटा, एने तेल चुपड़ेल बिगेर खमीर वाला पापड़ बी लावज्ये। एने ज्य आखो गोवान मोयदान बाणावज्ये।3न्याह एक टोपली माय मेलीन ती टोपली ता वासड़ाह एने ता दुय मेंड्रा हेऱ्या मार ओंगाण लेन आवज्ये।”4ओवतो हारून एने तान सोराह तोम्बुन जागे बायणा पोर लावीन पाण्या केरीन उंगलावज्ये।5तेवी ता फाड़काह लावीन हारूनाह डेगलो एने एपोदान लांबालो चोगो पेरावजी, एने एपोद एने सातीन पुट्टो बांदज्यी, एने एपोदान बाणायेल पुट्टो बी बांदज्ये;6एने तान मुंडी पोर पागड़ी बांदज्ये, एने पागड़ी पोर चोखालो मुकूट मिलज्ये।7तेवी चोखालो तेल लेन तान मुंडी पोर रोचविन ताह अबिषेक किरज्ये।8ओवतो तान सोराह आहने लावीन ताह डेगला पेरावज्ये;9एने तान मतलब हारून एने तान सोरान कोमेर बांदज्ये, एने तान मुंडी पोर टोप्यु पेरावज्ये; तिह केरीन चाकऱ्यान जागा पोर जेलेमक्योस तान आदिकार रेय। केरीन हारून एने तान सोराह समर्पण किरज्ये।10तेवी वासड़ाह तोम्बुन सोमोर आहने लावज्ये। एने हारून एने तान सोरा वासड़ान मुंडा पोर जान तान आथ मेलती,11तेवी ता वासड़ाह बोगवानान ओंगाण देरसेन आपण्या तोम्बुन बायणा पोर बोली चेड़ावज्ये,12एने वासड़ान थोड़ीक लुय तार आंगल्याम लेन वेदीन हिंगा पोर लागाड़ज्ये, एने वुचेल आखी लुय वेदीन पाया पोर रोचवी दिज्ये,13एने जी चेरबी केरीन आतड्या डापाय रेणु, एने जो चिलतो कालजान उपेर रेणे, तो एने दुयू बुको तान उपेरवाली चेरबी हेऱ्यी बेचकीन आखो वेदी पोर हेलगाड़जी।14पुण वासड़ान माह, एने चामड़ो, एने साण, पाड़ावाह रेन सिटो आक्ठा माय हेलगाड़ दिज्ये; काहाकाय ज्यो पापबोली रेय।15पुशो एक मेंडो ली यावजी, एने हारून एने तान सोरा तान मुंडी पोर जान तान आथ मेलती,16तेवी ता मेंडाह बोली चेड़ावज्यो, एने तान लुय वेदी पोर कावदेन हितड़ी दिज्ये।17ता मेंडान टुकड़ा टुकड़ा केरीन काटज्ये, एने तान आतड्या एने पाये दोवीन तान टुकड़ा एने मुंडा हेऱ्यो मिलज्ये,18तेवी ता आखा मेंडाह वेदी पोर हेलगाड़ज्ये; तो बोगवानान केरता होमबोली हे; ज्य बोगवानान केरता हुक आपी ओहलो गेंद हे।19पुशो दिहरा मेंडाह लावज्ये; एने हारून एने तान सोरा तान मुंडा पोर जान तान आत मेलती,20तेवी ता मेंडाह बोली चेड़ावज्यो, एने थोड़ीक लुय हारून एने तान सोरान जीवड्या कानान सेंडा पोर, एने तान जीवड्या आथा पोर एने जीवड्या पायान उमठा पोर लागाड़ज्ये, एने लुय वेदी पोर कावदेन हितड़ी दिज्ये।21पुशो वेदी पोर वाली लुय, एने अबिषेक वालो तेल, ज्यी दुय वोस्तु माय रेन थोड़ोक थोड़ोक लावीन हारून एने तान फाड़का पोर, एने तान सोरान एने तान फाड़का पोर बी हितड़ी दिज्ये; तेवी तु तार फाड़का बेल एने तान सोरा बी जान तान फाड़का हेऱ्या चोखा एय जाती।22तेवी मेंडाह अबिषेक वालो सोमजीन ता माय रेन चेरबी एने मोटली सेमटीह, एने जी चेरबी केरीन आतड्या डापाय रेणु, एने कालजान उपेर वालो चिलतो, एने चेरबी हेऱ्या दुयू बी बुकाह, एने जीवड़े उगेवाली जांग लावज्ये,23एने बिगेर खमीर लागाड़ेल रोटान टोपली जी बोगवानान सामने दिरेल एय तीम रेन बी एक रूटो, एने तेलाम कुहणेल मोयदान बी एक चापाती, एने एक पापड़ लेन,24न्यो सोब हारून एने तान सोरान आथाम मेलीन वोंदावणेन बेट सोमजीन बोगवानान ओंगाण वोंदावते रिज्ये।25एने तेवी ती वोस्तु तान आथाम रेन विसीन होमबोली पोर हेलगाड़ दिज्ये, तीह केरीन तो बोगवानान ओंगाण हुक आपी ओहलो गेंद ठेराय; तो बोगवानान केरता बेट रेय।26एने हारूनान अबिषेकाह जो मेंडो रेय तान सातीह वोंदावण्यी बेटीन केरता बोगवानान ओंगाण आलेवज्ये; एने तो तारो ईसो केवाय।27एने हारून एने तान सोरान अबिषेक ने जो मेंडो रेय, ता माय रेन वोंदावण्यी बेटीम वाली साती जी आलवाय एने उखेलण्यु बेट वालो जांग जो उखलाय जाय, ज्यी दुय वोस्तु चोखाली ठेरावज्ये।28एने ज्यी जेलेमक्यीस विदीन रितीम इस्राएली माणहान उगे रेन हारून एने तान सोरान ईसो केवाय, काहाकाय ज्यु उखेलन्यु बेट केवायेल हेत्यु; एने ज्यो इस्राएली माणहान उगे रेन तान मेल मिलाप बोली माय रेन बोगवानान केरता उखेलन्यु बेट रेय।29एने हारूनान जा चोखाला फाड़का रेती, ता तान पासाण तान सोरा पोऱ्याह जुड़ती रेती, ता फाड़का ताच पेरीन तान अबिषेक एने नियुक्त केराय जाय।30एने तान सोरा जा तान जागा पोर चाकऱ्यो रेय, एने तो जुलबुखे चोखाला जागा पोर सेवा केरनेन तोम्बुम पेल आवी, ताहार ता फाड़काह सात दिह वोर पेरीच ने रेय।31ओवतो चाकऱ्यो अबिषेक ने मेंडो रेय तो लावीन तान माह एगदा चोखाला जागा पोर चुड़ावज्ये;32तेवी हारून तान सोराह हिऱ्यो ता मेंडान माह एने टोपलीम रूटो, दुय वोस्तुह मिलापवाला तोम्बुन बायणा पोर खाय।33जी वोस्तु केरीन तान देरमान काम एने ताह चोखालो बाणावणेन केरता पासतावो केराय जाय, तो ते ता खाती, पुण पारका गेराणान माणहाम रेन कुण बी तो खाय नाह सेकते, काहाकाय ता चोखाला रेती।34केदी अबिषेक ने कामावालो माह नाहते रोटा माय रेन जारीक बी वेगोच वोर वोच जाय, ताहार वुचील तो आक्ठाम हेलगाड़ दिज्ये, तो खाहो मा; काहाकाय तो चोखालो हे।35मी तुवाह जो जो उकुम आपेल हे तो आखो तिहेच केरीन तु हारून एने तान सोरा हिऱ्यो किरज्ये; एने सात दिह वोर तान विदी किरते रिज्ये,36मतलब पापबोलीन एक वासड़ो पासतावान केरता दाड़ीन दिह चेड़ावज्ये। एने वेदीह बी पासतावो केरने बुखीत चोखालो किरज्ये, एने ताह चोखालो केरनेन केरता तान अबिषेक किरज्ये।37एने सात दिह वोर वेदीन केरता पासतावो केरीन ताह चोखालो बाणावज्ये, एने वेदी मोटली चोखाली केवाय; एने जो कुण बी तो आथली तो बी चोखालो एय जाय।38“एने जो तुवाह वेदी पोर दाड़ीन चेड़ावणु हे तो ज्य हे; दाड़ीन दिह एक एक वोरह्यान दुय मेंड्रान पिला।39एक पिलाह विगोस, एने दिहरा पिलाह हांज पोर चेड़ावज्ये।40पेल्ला मेंड्रान पिला हेऱ्यो जेतुनान एक किलो तेलाम कोहणेल एक किलो मोयदो, एने पिणेन बेटीन केरता दुय लिटेर अंगुरान रोह चेड़ावज्ये।41एने दिहरा पिलाह हांज पोर चेड़ावज्ये, एने ता हेऱ्यो विगोस ने गेत खाणान बोली एने पिणेन बेट दुय आपजी, तीह केरीन बोगवानान केरता दुणी ठेराय।42तुमरी पिढीन पिढ़ी माय बोगवानान सामने मिलापवाला तोम्बुन बायणा पोर जेलेम ओहलीच बोली इती रेय; ज्यो तो जागो हे जाहरी मी तुमू हिऱ्यो मिलीन वातु केरूह।43एने मी इस्राएली माणहा हिऱ्यो ताच मिलाते रेह, एने तो तोम्बु मार उजोड़ माय चोखालो एय जाय।44एने मी मिलापवाला तोम्बु एने वेदीह चोखाली केरूह, एने हारून एने तान सोराह बी चोखालो बाणावुह, काहाकाय ता मार केरता चाकऱ्यान काम केरती।45एने मी इस्राएली माणहान विच माय रेह, एने तान बोगवान केवाह।46तेवी ता सोमजी जाती काय मी यहोवा तान बोगवान हे, जो ताह मिस्र देसाम रेन ज्यान केरता काड़ लायेल काय तान विच माय रेह; मीच तान बोगवान यहोवा हे।
The Word for the World International