निर्गमन17
1पोशा इस्राएली माणहान आखी मोंडली सीन नावान जेंगलाम रेन निकलीन चाल पोड़नी, एने यहोवान उकुमान गेत थोड़ाक ओंगाण चालीन रपीदीम माय ता पाड़ावो टाक्या; एने ता ता माणहाह पिणेन पाणी नाह सापेड़नो।2केरीन ता मुसा हेऱ्या बोलाचाल केरीन केणे बाज गीया, “आमुह पिणेन पाणी लाव।” तेवी मुसा ताह केयो, “तुमू मार हेऱ्या काहा बोलाचाल केरतेह? एने यहोवान पारेख काहा केरतेह?”3पुण ताहरी माणहाह जुलूम तीह लागनी, तेवी ता इह केरीन केन मुसा पोर कुर कुर केरने बाज गीया, “तु आमुह आमरा सोरा पोऱ्या एने जेनवारा हिऱ्यो तीहल्या मारनेन केरता मिस्र माय रेन लियावोह काय?”4तेवी मुसा यहोवा फाय विन्ता किऱ्यो एने केयो, “न्या माणहाह मी काय केरू? न्या सोब माणहे देगड़ाठीन माहु मारनेन केरता तियार एय रेनाह।”5तेवी यहोवा मुसाह केयो, “इस्राएलान डावाला माणहाम रेन थोड़ाक जाणाह तार हिऱ्यो लेय लिज्ये; एने जी डेंगा केरीन तु निल नेदीम दियेल इतो, तो तार आथाम लेन माणहान ओंगाण चाल पोड़।6होमेल मी तार ओंगाण जाईन होरेब बोयड़ान एक सापरा पोर उब रेह; एने तु ता सापरा पोर डेंगी केरीन दिज्ये, तेवी ताम रेन पाणी निकली एने तो पाणी न्या माणहे पिती।” तेवी मुसा इस्राएली डावाला माणहान देखता तिहेस केरीन किऱ्यो।7एने मुसा ता जागान नाव मस्सा एने मरीबा मिल्यो, काहाकाय इस्राएली माणहे ता बोलाचाल किरेल एता, एने यहोवान पारेख इही केरीन किन केऱ्या, “काय यहोवा आपणी विचीम हे काय नाह?”8तान पासाण अमालेकी रपीदीम माय आवीन इस्राएली माणहा हेऱ्या लेड़ाणे बाज गीया।9तेवी मुसा यहोशुह केयो, “आपणी केरता एकेक एदम्याह निवाड़ ले, एने बाहेर जाएन अमालेकी हिऱ्यो लेड़ी; एने मी हेकाले बोगवानान डेंगी आथाम देरीन बोयड़ान चुटी पोर उब रेह।”10जीह केरीन मुसान उकुमान गेत यहोशु अमालेकी हिऱ्यो लेड़ाणे बाज गीयो; एने मुसा एने हारून हुर बोयड़ान चुटा पोर चेड़ गीया।11जाह वोर मुसा तान आथ उचो केरतालो, ताह वोर इस्राएली माणहे जिकताला; पुण जुलबूखे तो आथ बुंदे केरतालो तुलबूखे अमालेक जिक लेतालो।12जेवी मुसान आथ थाक गीया, तेवी ता माणहे एक दिगोड़ विसीन मुसान बुंद्याम मेल देना एने तो ता पोर बोह गीयो, हारून एने हुर एक एक उगे तान आथ दिर रियेल एता; एने तान आथ दिह बुड़नो ताह वोर थोब रियेल एता।13इहकेरीन यहोशु अमालेकीह तालवारी केरीन आरवी दिनो।14तेवी यहोवा मुसाह केयो, “ज्यी वात एर मेलनेन केरता पुस्तेक माय लेख ले, एने यहोशुह होमलाव दे काय मी जुगान बुंदे रेन अमालेकी जातीन नामो निशाण मिटाड़ देह।”15तेवी मुसा एक वेदी बाणायो, एने तान नाव “यहोवा निस्सी मिल्यो,” मतलब बोगवान मारो जिंडो हे।16एने तो केयो, “बोगवान यहोवान जेंडो देर रिवो। एने अमालेकी हिऱ्यो मालीक ने केरता पिढीन पिढ़ी वोर लेड़ाय एती रेय।”
The Word for the World International