एस्तेर3
1थोड़ाक दिह्या बाद राजा क्षयर्ष अगागी हम्मदात ने सोरो हामानाह पोरदान मोंत्री बाणायो, एने तान हाती हिऱ्यो ताह राजगादी बी आप्यो।2राजान सोब काम केरनारे जा राजवाड़ान फाटेक पोर रेया केरताला, ता हामानान सोमोर नेचा इन वोंद्या केरताला काहाकाय राजा तान बारा माय ओहलोच उकुम आपेल इतो; पुण मोर्देक नाह ते निचो एतालो एने नाहते ताह वोन्दतालो।3तेवी राजान काम केरनारे जा राजवाड़ान फाटेक पोर रेया केरताला, ता मोर्देकाह फुशा, “तु राजान उकुमाह काहा तुड़ेह?”4जेवी ता ताह दाड़ीन इहीच केरीन किते रेना, एने तो तान एक बी वात नाह हुमल्यो, तेवी ता ज्य देखणेन मोरजी माय काय मोर्देकान ज्यी वात चाली काय नाय, हामानाह केय दियेल एता; तो ताह केय दियेल इतो, “काय मी यहूदी हे।”5जेवी हामान दिख्यो काय मोर्देके निचो नाह वुलेद, एने नाह माहु वुन्देत, तेवी हामान जुलूम रागानो।6तो निस्तो मोर्देकाह देणे काईच नाह सुमज्यो। काहाकाय ता हामानाह ज्य किय दियेल एता काय मोर्देक काल्ली जातीन हे, केरीन हामान क्षयर्षान राज माय रेणारे आखा यहुदिह बी मोर्देकान जात जाणीन खेतेम केर देणेन हुमच्यो किऱ्यो।7राजा क्षयर्षान बारावा वोरह्या माय नीसान नावान पेल्ला मोयना माय, हामान अदार नावान मोयने वोर वाला एक एक दिह एने एक एक मोयनान केरता पुर मतलब चिट्ठी आमने सामने काड़ायो।8तेवी हामान राजा क्षयर्षाह केयो, “तारा राज ने सोब ईलाका माय रेणारे देस देसान माणहान विचीम आलेग आलेग जागे टाकायेल माणहे हेते, जीन नेम एने सोब माणहाह नेमाह रेन आलेग हे; एने ता राजान कानुना पोर नाह चालते, केरीन ताह रेणे देणे राजाह फायदो नाय मिले।9केदी राजाह पोटतेय ते ताह खेतेम केरनेन उकुम लेखाय जाय, एने मी राजान सेवक ने आथा माय राजबान्डारा माय पोचाड़नेन केरता, दोह एजार चांदीन सिक्का आपुह।”10तेवी राजा तान मुहर वाली मुंदी तान आथा माय रेन काड़ीन अगागी हम्मदात ने सोरो हामानाह, जो यहुदिन दुसमोन इतो आप दिनो।11एने राजा हामानाह केयो, “ती चांदी तुवाह आपाय जाईल हे, एने ता माणहे बी काय तु ता हिऱ्यो जीहे तारा मोनाह पुटे तिहेच वेवारो केर।”12ओवतो ताच मोयनान तेरावी दिह्याह राजान लेखणारे हादाड़ाय गीया, एने हामानान उकुमीन गेत राजान सोब आदिकारीह, एने सोब ईलाकान मुखी, एने देस देसान माणहान आदिकारीन केरता चिट्ठयु, एक एक ईलाकान अक्शोरा माय, एने एक एक देसान माणहान बाषा माय राजा क्षयर्षान नावा माय लेखाय गियी; एने त्यु माय राजान मुंदीन साप लागाड़ाय गियी।13राज ने आखा ईलाका माय राजान उगे रेन ज्यी आसान चिट्ठयु आखा टोपाल्या उगे रेन मोकलाय गियी काय एकुच दिह्या माय, मतलब अदार नावान बारावा मोयनान तेरावी दिह्याह, काय जुवान, काय डावाला, काय बायकु, काय सोरा, सोब यहूदी माराय एने खेतेम केराय जाय; एने तान मालदेन लुट लेवाय जाय।14ता उकुमान लेख्यान नेकेल आखा ईलाका माय उगाड़लोच मोकलाय गीयो काय सोब देसान माणहे ता दिह्यान केरता तियार एय जाय।15ज्यो उकुम शूशन गेढ़ माय आपाय गीयो, एने टोपाल्या राजान उकुमा माय चालुच निकली गीया। राजा एने हामान ते अंगुरान रूह पिणे बोह गीया, पुण शूशन हेयरा माय बिय पोसरी गियी।
The Word for the World International