LOME10
1Andoo, ndɔɔ yi nzii mɛ̃ m'ɔ̃kwal a mɛ̃ ndyam wueel bvool yi esɔɔ mɛ̃ ola Nziã, obvuul b'Ayuda.2Ke ngwel wɛ, mɛ̃ bam etsweel bɔ wɛn bɔ ali y'ɔ̃tio a Nziã, kɛn ɔ̃tio ondɛ k'afa m'oyɛɛ bo ngwanya wɛ.3Ke ngwel wɛ, bɔ k'ayɛɛ emfa ki esuul Nziã baal dzu ke mviil ã ndɛ wɛ. Bɔ abii emfa ki bam ki akal dzu. Bɔ ŋ'abee nkuul yi esueel Nziã m'osuul o baal dzu.4Ke ngwel wɛ, Mãsia obiri Ngel k'otsɛn o yɔ, kwɛn mbuul wueel wu akiool ndɛ akal dzu ke mviil ã Nziã.
Endɔɔ, okiool, obvuul
5Ke ngwel wɛ, Moyize ákel bubu me ndɔɔ a mbuul wu odzii k'akal dzu m'olweel o Ngel: «Mbuul wu àsa ãndɔɔ omɔ̃ àkal y'elaã me mɔ̃.»6Kɛn a mbuul wu odzii k'akal dzu ke mviil ã Nziã me nkuul a okiool, abee oyɛɛn onse ɔ̃kwal ndiri: «Wu àyi ywel nã?» Ke ngwel wɛ, oŋɔ̃ ŋ'asa kwɛn Mãsia asool ke lɔ.7Abee hɛ̃ oyɛɛn ndiri: «Wu àsool onse ywɛn li ela li ke nsɛn a nsie nã?» Oŋɔ̃ ŋ'asa kwɛn andɛɛl Mãsia onse b'ákwi-ákwi.8Etal b'eyɛɛn Ɔ̃nkaan a Nziã me ndɔɔ emfa ki akal dzu: «Endɔɔ eli tsotsoo a yɛ, onse ɔ̃nywã a yɛ bvool onse ɔ̃kwal a yɛ.» Endɔɔ olɔ, li okiool li ebetee bee.9Ke ngwel wɛ, ŋɛn yɛ yɛɛn m'ɔ̃nywã a yɛ wɛn Yeso oli Mfam, bvool ŋɛn yɛ kiool onse ɔ̃kwal a yɛ wɛn Nziã áseel ndɛ onse b'ákwi-ákwi, yɛ àbvuul.10Ke ngwel wɛ, okiool b'osuul mbuul dzu, ofa onse ɔ̃kwal. Oyɛɛn hɛ̃ b'obiri mbuul k'obvuul, opal m'ɔ̃nywã.11Ke ngwel wɛ, Ɔ̃nkaan a Nziã olieel bubu: «Mbuul ɔ̃bi pyɛ wu olɔ okiool onse ndɛ k'àbɔɔ opfuru wɛ.»12Ke ngwel wɛ, okam k'oli mpɛ̃-a-mpɛ̃ Ayuda y'Agelek wɛ. Bɔ bueel ali ye Mfam ngɔmɔ̃, wu asa obvɛ bibi me baal bueel b'ata ndɛ mbel.13Ke ngwel wɛ, áyɛɛn ndiri: «Mbuul ɔ̃bi pyɛ wu àta Mfam mbel, àbvuul.»14Emfa emã ki eta bɔ mbuul wɛn bɔ k'akiool wɛ mbel? Emfa emã ki èkiool bɔ mbuul wɛn bɔ k'ayoo k'etee baal me ndɔɔ a ndɛ wɛ? Emfa emã ki èyoo bɔ okɛɛn mbuul wu atee bɔ pyɛ?15Okɛɛn k'ayuɔɔl mbuul wɛ, emfa emã ki ètee ndɛ? Ákel ndiri: «Ntaã e baal b'atee Nsia yi Ngesɛ eli yam mvɛ-mvɛ.»16Kɛn a bueel k'akiool Nsia yi Ngesɛ wɛ. Ke ngwel wɛ, Edzayi áfuul bubu: «Mfam, wu okiool ãtee ã bee nã?»17Obobɔ, okiool oya me m'ayoo, m'ayoo ãya m'Endɔɔ e Mãsia.18Kɛn a mɛ̃ efuul wɛn: Bɔ k'ayoo wɛ? Ngwanyã, bɔ ayoo. Nzal-a-ŋɛn Ɔ̃nkaan a Nziã ayɛɛn ndiri:«Nkii a bɔ esiaan me nsie yueel,ãyɛɛn ã bɔ ãyɛn tiil ntɔ a ɔ̃kiri a nsie.»19Mɛ̃ bvool efuul wɛn: Baal b'Isalayel k'akwaal otsɛn o ndɔɔ oyɔ wɛ? Moyize mpii tsɔɔn ŋ'ɛ̃kwel áyɛɛn ndiri:«Mɛ̃ èsa kwɛn byɛ ekal y'efeel me ndɔɔ a yam lɛn k'eli yam wɛ.Mɛ̃ èsa kwɛn byɛ eya mpuru me ndɔɔ a yam lɛn ãyal pyɛ.»20Edzayi bu adzi nkaã ndiri:«Bɛn k'ákebii mɛ̃ wɛ abɔɔ mɛ̃,mɛ̃ nsuo nzuru ola bɛn k'ákefuul mɛ̃ ɛ̃mfuul wɛ.»21Kɛn a me b'otal yam li Isalayel, Nziã olieel bubu:«Tsoo bwɛn a tsoo, mɛ̃ ebeyal mviɔɔl ola yam lɛn k'elweel mɛ̃ wɛ, bvool ebee k'eyoo mɛ̃.»Wycliffe Bible Translators, Inc.