Engungwel19
Nziĩ y'olweel o Nziã ke ywel
1Ke mbee oŋɔ̃, mɛ̃ ngyoo nkii yɛn onge nkii yi embuul e baal ki bibi ke ywel. Bɔ ákeyɛɛn kokɔ bubu: «Aleluya! Obvuul, ye lweel, ye waan, eli bvi Nziã a bia-byɛ!2Ke ngwel wɛ, ndɛ atsiil ãndɔɔ m'emfa ki taa-taa bvool ki edzu. Ndɛ owi nga-esio wu ɔ̃nɛn etumbu me ndɔɔ yɛn ndɛ ákebiil ɔ̃kiri m'esio e ndɛ. Ndɛ osi kwɛn ndɛ afuru obi o ndɛ b'ébam ndɛ asal a ndɛ.»3Embuul elieel li nsa yuaal ndiri: «Aleluya! Yoo li esii ndɛ kal ekeyi ywel ɔ̃bu nkal ɔ̃bu!»4Akuul-kuul ange-ãku-mbuaal y'ãnã (24) y'eluɔ bvi mwiĩ enã abvi ãbuo, alweel Nziã wu áli me nsɛn nkal a kiri li okwɛn. Bɔ alieel ndiri: «Amɛn! Aleluya!»Pfuun e bal e Muaan-emɛmɛɛ̃
5Nkii ngamɔ̃ efi kiri li okwɛn eyɛɛn ndiri: «Elweel Nziã a bia-byɛ, byɛ bueel b'asal a ndɛ, byɛ b'ebal ndɛ, akiɔɔl y'akuul!»6Mɛ̃ bu ngyoo nkii yɛn onge nkii e embuul e baal bibi, yɛn onge nkyal yi ekuu ãdza mã bibi, bvool onge nkyal yi osiaan b'anzyel bo kokɔ. Nkii oyɔ ékeyɛɛn bubu: «Aleluya! Ke ngwel wɛ, Mfam Nziã a bia-byɛ, Nziã-Ngaa-Waan, osuo okwɛn o ndɛ.7Bia-byɛ esia mpaa, eluul m'esɛ, bvool elweel ndɛ, ke ngwel wɛ lio e bal e Muaan-emɛmɛɛ̃ ekoo, ɔ̃kal a ndɛ amaawal ɔ̃yɛɛl.8Awi ndɛ mpwee yi alaal ekɔ ki lɛ̃ ki ɔ̃bvɛn, ki enyɛɛn, bvool ki tsɛtsɛ.» Ekɔ ki lɛ̃ ki ɔ̃bvɛn eli ãndɔɔ mã dzu m'esa ba ngel.9Ãnzwel ãlieel mɛ̃ bubu: «Swɛn wɛn: “Esɛ ngamfɛn ola baal bɛn ati bɔ mbel ke pfuun e bal e Muaan-emɛmɛɛ̃!”» Mɔ̃ bvool ãlieel mɛ̃ bubu: «Omɔ̃ ãyɛɛn ã Nziã mã taa-taa.»10Mɛ̃ mvi ke ntaã e mɔ̃ me ndɔɔ yi elweel mɔ̃, kɛn a mɔ̃ ãlieel mɛ̃ bubu: «Oyɛɛ ke sa obobɔ wɛ! Mɛ̃ ndi kɛn a ndoo a yɛ wu ɔ̃sal, ye wu andoo a yɛ b'atsweel Yeso. Wu elweel yɛ Nziã!»Nzal-a-ŋɛn, ãyɛɛn m'éyiaal Yeso baal, Ɔ̃fel wu abewa mɔ̃ ol'aliaal-ɛ̃kiɛɛn a Nziã.
Mbuul wu ɔ̃nɔɔn nkal swebval wa fuu
11Mɛ̃ bu mwɛn ywel kal, swebval wa fuu opal. Wu onɔɔn nkal a ndɛ, nkuũ a ndɛ «Wɛn k'akwɛɛn k'asa b'élieel ndɛ wɛ» bvool «Wa Taa-Taa». Ndɛ atsiil ãndɔɔ bvool adzɔɔ eta m'emfa ki dzu.12Mviil ã ndɛ ãli onge mbaa yi ékengal. Nkal ɔ̃tswɛ a ndɛ, éli y'ekɔrɔ bvi okwɛn bibi. Ndɛ oli ye nkuũ yi áswɛn yɛn mbuul si ngɔmɔ̃ k'ayɛɛ wɛ. Wu oyɛɛ yɔ kɛn a ndyam.13Ndɛ bvool olaal ekɔ ki abueel m'ãkel. Nkuũ a ndɛ eli Endɔɔ e Nziã.14Ambwel-mbwel b'ali ke ywel ákenɔɔn a ndɛ nkal aswebval b'afuu-fuu, alaal ekɔ bvi lɛ̃ bvi ɔ̃bvɛn, bvi afuu-fuu bvool bvi tsɛtsɛ.15Epwel ngemɔ̃ ki ápɛɛl epal onse ɔ̃nywã a ndɛ. Ndɛ abɛɛl ɛ̃kiri me kyɛ. Ndɛ wu akieel abiri ɛ̃kiri omyɛ̃ ye nkoo yueel. Ndɛ bvool wu adziaal nsia e bvine onse saan li nɛn li abekyɛɛl nsia onse lɔ li mpuru a Nziã Nga-Waan.16Nkal ekɔ y'ebyal a ndɛ, ákel nkuun yi: «Mfam wu onduru amfam bueel, Ɔ̃kwɛn wu onduru akwɛn bueel.»17Mɛ̃ mwɛn ãnzwel ngãmɔ̃ tɛ onse tal. Mɔ̃ ãbiool anywɛn bueel b'ákepɔɔn bam nkal ãntɛ ndiri: «Eya, kwɛn byɛ ebvɔɔn me ndɔɔ a odza o Nziã b'onɛn!18Eyedza tuo li akwɛn, tuo li ambiri b'ambwel-mbwel, tuo li awaan, tuo li aswebval ye b'anɔɔn nkal a bɔ, tuo e baal bueel, ankyal ye ba ndii, akiɔɔl y'akuul!»19Mɛ̃ mwɛn nyam, akwɛn a nsie y'ambwel-mbwel a bɔ. Bɔ abvɔɔn me ndɔɔ yi adzwaan ye wu onɔɔn nkal a swebval y'ambwel-mbwel a ndɛ.20Asiin nyam y'ɔ̃liaal-ɛ̃kiɛɛn wa mfya. Ɔ̃liaal-ɛ̃kiɛɛn ondɛ, wu ási emvieel ke nkwel a nyam, m'emfa kyɛn ndɛ ápfuru b'ábɔɔ eliĩ e nyam bvool ákebuɛɛn etiɔ. Atyel nyam y'ɔ̃liaal-ɛ̃kiɛɛn wa mfya amwiĩ-mwiĩ onse ywɛn e mbaa y'ɔ̃fel wa sofolo.21Abam bakyɛ m'epwel ki ékepal onse ɔ̃nywã a wu ákenɔɔn nkal a swebval, bvool anywɛn bueel ayedza tuo e bɔ.Wycliffe Bible Translators, Inc.