Engungwel16
Asiaan nsiaan
1Mɛ̃ ngyoo nkii ngamɔ̃ yi kokɔ efi onse mboo a Nziã yi ɔ̃nsensal, yɔ ékeyɛɛn ãnzwel nsiaan bubu: «Eyi, etsal asaan a mpuru a Nziã me nsie!»2Ãnzwel m'ɛ̃kwel ãyɛn ãyetsal saan a mɔ̃ me nsie. Ãbwɔɔ m'ãnɛn bvool m'ãluu bibi ãbɔɔl me baal b'áli y'eliĩ e nyam bvool ákebuɛɛn etiɔ e ndɛ.3Ãnzwel mã mbuaal ãtsal saan e mɔ̃ onse ãdza m'ɔ̃ngwa, ãdza omɔ̃ bu ãkɔɔl ãkel, mɛn onge mã mbuul wu okwi. Eluɔ bvi mwiĩ bvi éli onse ãdza m'ɔ̃ngwa bu ekwi-ekwi.4Ãnzwel m'ãtyel ãtsal saan e mɔ̃ onse ãnzal y'ɛ̃tswɛ mi amvieel. Ãdza mbueel bu ãkɔɔl ãkel.5Mɛ̃ bu ngyoo ãnzwel m'ãli y'okwɛn nkal ãdza ãlieel bubu:«Yɛ wu oli bvool wu áli, yɛ wu li Ɔ̃nsensal,yɛ li dzu, me ndɔɔ yi etsiil yɛ ãndɔɔ m'emfa okyɛ.6Ngwanyã, bɔ átsal ãkel ã ba ngel ye m'aliaal-ɛ̃kiɛɛn a yɛ,yɛ bu wi bɔ ãkel m'anywã.Ngwanyã, oyɔ ndɔɔ yi ebvaan me bɔ.»7Mɛ̃ ngyoo nkii ngamɔ̃ efi onse nkiin yi awa Nziã ãkab, yɔ ékeyɛɛn bubu:«Ngwanyã, Mfam Nziã, Nziã-Nga-Waan,yɛ abetsiil ãndɔɔ m'emfa ki taa-taa ye ki dzu.»8Ãnzwel m'ãnã ãtsal saan e mɔ̃ nkal a tal. Bu awi lɔ nkuul yi adziool baal me mbaa.9Baal bu adzio me mwiĩ ndyam wa kokɔ. Bɔ abvi nkuũ a Nziã wa y'okwɛn nkal ãmpal m'ãnɛn omɔ̃ osiaan. Bɔ abee k'akaal ɛ̃kwal ke nkwel a Nziã bvool abee k'alweel ndɛ.10Ãnzwel m'ãtaan ãtsal saan e mɔ̃ nkal a kiri li okwɛn e nyam. Okwɛn o ndɛ oyii osii empeel. Baal bu ayii atiɛɛn miin me mpuru a fool.11Bɔ abvi Nziã wa ke ywel osiaan me ndɔɔ ãmpal y'ãbwɔɔ ã bɔ m'ãnɛn, bvool bɔ k'ayɔɔl ɛ̃sal ɛ̃ bɔ mi ɛ̃bi-ɛ̃bi wɛ.12Ãnzwel m'ãsɛɛn ãtsal saan e mɔ̃ nkal a nzal yi nɛn yi Efalate. Ãdza bu ãkɛɛ, me ndɔɔ yi afaal akwɛn b'afa ɛ̃kiri m'etswi ki epal tal nkuul.13Mɛ̃ mwɛn k'epal ɛ̃fel mi ɛ̃bi-ɛ̃bi ɛ̃tyel, myɛn onge ãkwɔɔ. Myɛ̃ ɛ̃pal m'ɔ̃nywã a dalagɔ̃, m'ɔ̃nywã a nyam, m'ɔ̃nywã wu ɔ̃liaal-ɛ̃kiɛɛn wa mfya.14Eli ɛ̃fel mi ɛ̃bi-ɛ̃bi mi ebesa emvieel, bvool ɛ̃beyi ol'akwɛn b'ɔ̃kiri a nsie wueel, me ndɔɔ yi abvool bɔ me ndɔɔ a mvel yi tsoo li nɛn e Nziã, Nziã-Nga-Waan.15Mfam Nziã oyɛɛn bubu: «Yoo, mɛ̃ eya onge mbuul a pfuul. Esɛ ola mbuul wu akal ngɔ-mwiĩ bvool akwɛɛ ekɔ e ndɛ, kwɛn abee odzuũ odzuu, kwɛn opfuru o ndɛ obee omɔɔn.»16Ɛ̃fel mi ɛ̃bi-ɛ̃bi omyɛ̃ ɛ̃bvool akwɛn ke mboo yi ata m'ɔ̃nywã wu Ebele me Haamagedɔ̃.17Ãnzwel mã nsiaan ãtsal saan e mɔ̃ endii-ywel. Nkii ngamɔ̃ yi nɛn efi ke mboo a Nziã yi ɔ̃nsensal, ke kiri e ndɛ li okwɛn, yɔ ékeyɛɛn ndiri: «Ŋ'asi!»18Amvel abɛɛn, ãnkii ãyɛɛn, anzyel asiaan, nsie enziool nzuru yam kokɔ, m'emfa kyɛn mwɛn-endɛɛl baal okal me nsie, ãndɔɔ kɛn ãbwel m'emfa okyɛ wɛ.19Akab bviil li nɛn m'ebaal etyel. Ãbviil m'ɛ̃kiri ãtsɔɔn, bvool Nziã oyeel Babilon wu Ɔ̃nɛn, m'owa o ndɛ mbiɔ a ndɛ yi bvine li mpuru a ndɛ yi kokɔ.20Esanga bvieel ebal, ãnkio ãdziɔɔn.21Mvel wu ãkyal wa kokɔ ofi ywel ondwɔɔ nkal a baal. Ãkyal omɔ̃ ãli y'olyam bam bibi. Baal asiaan Nziã, me ndɔɔ a eywiri ki mvel wu ãkyal ondɛ. Ngwanyã, eywiri okyɛ éli kyam ki ongɛɛ.Wycliffe Bible Translators, Inc.