MAAK12

Mboo asal a nguun a bvine

1Ke mbee oŋɔ̃, Yeso obvi oyɛɛn ye bɔ m'ãmboo. Ndɛ oti bɔ mboo yi: «Mbuul ngɔmɔ̃ ákwɛn nguun a bvine. Ndɛ odzii yɔ ekɔɔ, otsam ywɛn onse yɔ me ndɔɔ yi akɛɛl nsia, bvool otuu nzɔ yi nkal a ywel yi ekal ɔ̃nkiaal. Ndɛ obuun yɔ m'asal a bvine, kwɛn bɔ abefuru ndɛ. Ndɛ bu ayɛn dzwɛ.2Ŋ'ekoo lio li aka nsia, ndɛ oyuɔɔl ɔ̃sal ngɔmɔ̃ ol'asal ba ke nguun, kwɛn bɔ awa boo e bvine li ndɛ.3Kɛn asal a nguun a bvine ayiool nkal ɔ̃sal o ndɛ, abɛɛl ndɛ bu abveel ndɛ ãkɛ-ãkɛɛ.4Ndɛ bvool oyuɔɔl bɔ ɔ̃sal ɔ̃kyam, ondɛ, bɔ abɛɛl m'ɔ̃tswɛ bvool aswel ɛ̃tswɛ.5Ndɛ oyuɔɔl ɔ̃sal wu atyel, ondɛ, bɔ abam. Ndɛ bvool oyuɔɔl asal akyam bibi, babyɛ bɔ abɛɛl, babyɛ bɔ abam.6Nga-nguun bu asiil kɛn a me muaan a ndyam ngɔmɔ̃ wu ɔ̃tio. Ndɛ oyuɔɔl bɔ ndɛ ke mbee asal bueel y'ãtsam mã: “Bɔ ol'àwel muaan a myam ye bvɛɛ!”7Kɛn asal a nguun a bvine ayɛɛn bam-a-bam bubu: “Etal wu akieel awal ɔ̃swal! Eya, ebam ndɛ, kwɛn ɔ̃swal akal wa bia-byam!”8Obobɔ, bɔ asiin ndɛ, abam ndɛ, bu atyel ndɛ ongwel a nguun a bvine.
9Ke nga-nguun a bvine bwɛn asa? Ndɛ àya, àtam k'abam asal obɔ, bvool àwa nguun m'asal akyam.10Byɛ lɔɔ-okal kɛn etsiɔ m'ákel onse ɔ̃nkaan a Nziã mã wɛ: “Nkɔɔn yi éti atuu pfɛɛ, eyii nkɔɔn yi nkiin yi nzɔ.11Ndɔɔ oyɔ efi ola Mfam,yɔ eli ndɔɔ yi ɛ̃kam ke mviil ã bia-byɛ!”»
12Amfam b'Ayuda ákebii ãyal m'asiin Yeso, kɛn a bɔ áli ye buɔ b'embuul. Bɔ ayɛɛ ndiri ndɛ mboo oyɔ me bɔ áti. Obobɔ, bɔ asiil ndɛ, bu ayɛn.

Mpal yi afuru ɔ̃kwɛn

13Amfam b'Ayuda ayuɔɔl Afalisaye ye baal ke kwɛ ba nkel a Elode ola Yeso, me ndɔɔ yi aywiin ndɛ bɛɛ m' ɔ̃mfuul.14Bɔ ayeliaal ndɛ bubu: «Ɔ̃tee, bee eyɛɛ kwɛn yɛ abeliaal otaa-taa bvool ke li ye buɔ o mbuul wɛ, ke ngwel wɛ yɛ ke li y'ɔ̃bɛɛ wɛ. Kɛn a yɛ abeyiool baal nkuul a Nziã onse otaa-taa bueel. Oŋɔ̃ meliaal bee bam b'etsam yɛ me ndɔɔ yi: Awi baal nkuul yi afuru mpaa yi ɔ̃kwɛn Sedzaal, wuo k'awi yɔ wɛ?»15Kɛn a Yeso wu ayɛɛ ãtsam ã bɔ m'ãbi, obveel bɔ bubu: «Ki eywiin byɛ mɛ̃ bɛɛ emã? Eyiaal mɛ̃ nzi yi ãbvieel ngamɔ̃ yi abefuru mpal kwɛn mɛ̃ ntal yɔ.»16Bɔ ayi ndɛ ye nzi yi ãbvieel ngamɔ̃. Ndɛ bu afuul bɔ bubu: «Osu ba bo nã? Nkuũ yi nã?» Bɔ abveel ndɛ ndiri: «Osu bo Sedzaal, nkuũ hɛ̃ yi Sedzaal.»17Yeso bu alieel bɔ ndiri: «Eluɔ bvi Sedzaal, ewa Sedzaal, bvi Nziã, ewa Nziã.» Ŋ'eyoo bɔ ɔ̃mveel ondɛ, esi bɔ ɛ̃kam bibi.

Ɔ̃mfuul me ndɔɔ osiool o b'akwi-akwi

18Obobɔ, Asaduseyɛ̃ ayi ola Yeso. Bɔ baal bɛn k'abekiool kwɛn b'ákwi-ákwi akieel asiool wɛ. Bɔ afuul Yeso bubu:19«Ɔ̃tee, Moyize ákel ndiri: “Ŋɛn bɔɔl okwi osiil ɔ̃kal wɛn bɔ k'abɔɔ muaan wɛ, muaan-ngoo a ndɛ àwal ɔ̃pfiil, kwɛn bɔ abuo esii e baal me nkuũ a ɔ̃pfu.”20Ŋ'esa oŋɔ̃, eli yam ngelemɔ̃ li baan b'abɔɔl nsiaan. Muaan wu ɛ̃kwel obaal ɔ̃kal, ndɛ okwi k'abɔɔ muaan y'ɔ̃kaal ondɛ wɛ.21Muaan wa buaal obaal ɔ̃pfiil, ndɛ hɛ̃ okwi k'abɔɔ muaan y'ɔ̃kaal ondɛ wɛ. Esi kɛn obobɔ me muaan wu atyel.22Bɔ bueel ange-nsiaan abaal ɔ̃kaal ondɛ, kɛn a wu obɔ muaan ye ndɛ pyɛ. Ke mbee a bɔ bueel, ɔ̃kaal ondɛ hɛ̃ okwi.23Ke ŋ'ekieel esiool b'ákwi-ákwi, ndɛ àkal ɔ̃kal nã onse baan-ngoo ange-nsiaan obɔ? Ke ngwel wɛ, bɔ bueel ábaal ndɛ!»24Yeso obveel bɔ ndiri: «Byɛ eli onse odzɛɛn, me ndɔɔ yɛn byɛ k'eyɛɛ m'ákel onse Ɔ̃nkaan a Nziã wɛ, byɛ hɛ̃ k'eyɛɛ waan e ndɛ wɛ.25Ke ngwel wɛ, ŋ'ekieel esiool baal onse b'ákwi-ákwi, akaal y'abɔɔl k'àbaal bakyɛ wɛ. Kɛn a bɔ akieel akal onge ãnzwel ke ywel.26Me b'otal osiool o b'ákwi-ákwi, byɛ kɛn etsiɔ b'élieel Nziã onse ɔ̃kaan a Moyize me ndɔɔ a muaan ɔ̃ti wu ákekaan mbaa wɛ? Ndɛ mpii álieel ndiri: “Mɛ̃, mɛ̃ ndi Nziã a Abalayam, Nziã a Isak, Nziã a Dzakab”!»27Yeso olweel bubu: «Nziã k'ali Nziã a b'ákwi-ákwi wɛ, ndɛ oli Nziã a baal b'amwiĩ-mwiĩ. Byɛ eli onse odzɛɛn b'onduru ɔ̃ndel.»

Ngel yi enduru mãkyɛ

28Ɔ̃yiool-ãngel ngɔmɔ̃ wu ayoo k'ebetsuun bɔ, bvool amwɛn kwɛn Yeso abveel Asadusɛɛn ngesɛ, oyefuul ndɛ bubu: «Onse ãngel mam mbueel, ngel yi enduru mãkyɛ yɛn?»29Yeso obveel ndiri: «Ngel yi enduru mãkyɛ yɔ yi: “Isalayel, yoo! Mfam Nziã a bia-byɛ oli kɛn a ndyam-sii wu oli Mfam.30Yɛ adzii Mfam Nziã a yɛ m'ɔ̃kwal a yɛ ndyam wueel, m'omwiĩ o yɛ bam bueel, m'ãtsam ã yɛ mam mbueel, me mpɛn a yɛ yam yueel.”31Tal yi mbuaal yi efɛɛn onge oyɔ: “Yɛ àdzii ngaburu-mbuul onge b'edzii yɛ nzuru a yam. K'eli ye ngel nkyam yi enduru m'ãnge-mbuaal omɔ̃ wɛ.”»32Ɔ̃yiool-ãngel ondɛ bu alieel Yeso ndiri: «Taa-taa Ɔ̃tee! B'eyɛɛn yɛ wɛn Mfam Nziã oli kɛn a ndyam-sii oli otaa-taa, bvool Nziã ɔ̃kyam wɛn onge ndɛ pyɛ.33Odzii o ndɛ m'ɔ̃kwal a yɛ ndyam wueel, m'omwiĩ o yɛ bam bueel, m'ãtsam ã yɛ mam mbueel, me mpɛn a yɛ yam yueel, y'odzii o ngaburu-mbuul onge b'edzii yɛ nzuru a yam, oyɔ ndɔɔ yi enduru owa o Nziã kab li edzio lam lueel y'ãkab mãkyɛ.»34Yeso ayemwɛn kwɛn ɔ̃yiool-ãngel obveel y'ãyal mbueel, ndɛ olieel ndɛ bubu: «Yɛ k'eli lala y'Okwɛn o Nziã wɛ.» Ke mbee oŋɔ̃, mbuul bvool wu ákembio k'afuul ndɛ ɛ̃mfuul pyɛ.
35Yeso ákeyiool onse Nzɔ a Nziã, ndɛ bu afuul ɔ̃mfuul wu: «M'emã ayiool b'ãngel abeliaal ndiri Mãsia oli muaan a David?36David ndyam, ŋ'éluul ndɛ m'Ɔ̃fel wu Ɔ̃nsensal, oyɛɛn ndiri: “Mfam olieel ye Mfam a mɛ̃ ndiri: Y'abva nsɛn me nkuɔ e mɛ̃ ki elam, tiil ye k'esuul mɛ̃ ataal a yɛ ke nsɛn a ntaã e yɛ.”
37David ndyam oti ndɛ me “Mfam”, k'emfa emã kyɛn Mãsia akal bvool muaan a David?» Obobɔ, embuul e baal bibi ékeyoo ndɛ y'esɛ.

Obee k'akal onge ayiool b'ãngel

38Onse ãndɔɔ m'ékeyiool Yeso, ndɛ ákeliaal baal bueel bubu: «Ekal y'onkyab me ndɔɔ ayiool b'ãngel, bɔ adzii k'adzuu m'ekɔ bvi ela-bvi ela bvool adzii kwɛn baal abio bɔ k'ãtaan.39Bɔ abesuaal ãkiri m'ɛ̃kwel onse ãnzɔ ã bɔ m'ãbuɛɛn bvool abesuaal ãmboo mã nkwel k'ãpfuun.40Bɔ abekuaal eluɔ bvieel bvi eli y'akaal b'apfiil, bvool me lio lili bɔ abesa ãbuɛɛn m'ãla-m'ãla me ndɔɔ yi asa empa onge bɛn bɔ ali dzu. M'ãndɔɔ omɔ̃, Nziã akieel awa bɔ etumbu ki enduru ki b'asiil mpuru!»

Kab li ɔ̃kaal wu ɔ̃pfiil

41Yeso ábvi nsɛn onse Nzɔ a Nziã, nsɔ̃-a-nsɔ̃ eluɔ ki abelɔ ãkab bvool áketal emfa ki ekelɔ baal nzi. Apfel booboo ákelɔ nzi bibi.42Kɛn ɔ̃kaal ngɔmɔ̃ wu ɔ̃pfiil wu ali ɔ̃ywa oyi bu olɔ edzi-dzi bviaal bvi ãbvieel.43Obobɔ, Yeso oti ayio a ndɛ mbel bvool olieel bɔ bubu: «Taa-taa bam, mɛ̃ ngyɛɛn byɛ wɛn, ɔ̃pfiil wu ɔ̃ywal wu olɔ nzi yi nduru yi baal bueel onse eluɔ ki abelɔ ãkab.44Ke ngwel wɛ baal bueel alɔ nzi yɛn bɔ k'ali ye kɔɔ e yɔ wɛ. Kɛn a ndɛ, onse oywal o ndɛ, olɔ nzi yam yueel yi eli a ndɛ, nzi yi ekedza ndɛ me yɔ.»

Wycliffe Bible Translators, Inc.

https://app.library.bible/content/3840a1950e7b8532