LUK2
1Me lio olɔ, Oguste wu ɔ̃kwɛn wu ɔ̃nɛn, otam baal a ndɛ ɔ̃tsiɔ a baal bam bueel ba nsie a ndɛ osa.2Oyɔ nsa yi ɛ̃kwel yi asa ɔ̃tsiɔ wu obobɔ. Me lio olɔ, Kilinus áli mfam wu ɔ̃kiri wa Sili.3Baal bueel bu ayesa ɔ̃tsiɔ, mbuul bwɛn a mbuul onse bviil li áburu ndɛ.4Dzedzef hɛ̃ ombal bviil li Nadzalet li ke nsie yi Ngalile, oyɛn bviil li David li Betelem, li ke Yude. Ke ngwel wɛ, ndɛ wu Dzedzef áli mbuul wa yam li David.5Ndɛ oyɛn bviil olɔ, me ndɔɔ yi ayesa ɔ̃tsiɔ okɔ, ye Mali, wu muaan-ɔ̃kaal wu ésɔɔn ndɛ me ndɔɔ yi abaal, wu áli hɛ̃ ye yam.6Me tal li éli bɔ m'ɔ̃lɔɔ ke Betelem, lio e Mali li oburu ekoo.7Ndɛ bu aburu muaan wu bɔɔl wu otab ɔ̃la a ndɛ. Ndɛ odzii ndɛ onse ekɔ, bvool olaal ndɛ onse mboo yi alɔ bvi-odza bvi anyam, ke ngwel wɛ bɔ k'abɔɔ mboo yi akal onse ngwel-a-nzɔ a anzii wɛ.8Onse ãnguun mã tsotsoo a Betelem, éli y'ɛ̃mbuaal-anyam. Bɔ ákewal ɛ̃nsiil, m'okiaal b'anyam a bɔ.9Ãnzwel ã Mfam Nziã ngãmɔ̃ ãpal ola bɔ, mbaa a ndɛ wu Mfam Nziã eyɛɛl mboo yi éli bɔ, buɔ bo bibi obɔɔ bɔ.10Kɛn Ãnzwel ãlieel bɔ ndiri: «Ebee buɔ oyoo, ke ngwel wɛ mɛ̃ ngyi yengwa byɛ nsia yi ngesɛ, yi esa kwɛn baal bueel aluul m'esɛ.11Nsia yi Ngesɛ oyɔ eli yi: Nonɔ̃ ŋã, onse bviil e David, aburu byɛ Ɔ̃mvuul. Ndɛ oli Mãsia, bvool oli Mfam.12Etal emfa ki èyɛɛ byɛ ndɛ: byɛ èmwɛn muaan wu ɔ̃bwee wu adzii onse ekɔ, bvool wu alaal onse mboo yi alɔ bvi-odza bvi anyam.»13Enseel oŋɔ̃, ãnzwel bibi ãfi ywel, ãbvɔɔn y'ãnzwel m'ɛ̃kwel, mɔ̃ bu ãbvi Nziã olweel ndiri:14«Bia-byɛ elweel Nziã wa ke ywel, bvool eyɔɔl kwɛn opi okal me nsie, onse baal b'edzii ndɛ!»15Ŋ'ekɔɔl ãnzwel ywel, ɛ̃mbuaal-anyam ayɛɛn bam-a-bam bubu: «Eyi tiil Betelem, me ndɔɔ yi etal ndɔɔ yi ɛ̃kam yi ebwel, yi elieel Mfam Nziã bia-byɛ!»16Bɔ ayɛn Betelem tswa-a-tswa. Ŋ'etɔ bɔ okɔ, bɔ ayebɔɔ Mali ye Dzedzef, ye muaan wu ɔ̃bwee bɔ onse mboo yi alɔ bvi-odza bvi anyam.17Ŋ'emwɛn bɔ ndɛ, bɔ alieel ãndɔɔ mam mbueel m'elieel ãnzwel bɔ me ndɔɔ a muaan ondɛ.18Baal bam bueel b'ayoo m'elieel ɛ̃mbuaal-anyam, akam me ndɔɔ ãyɛɛn ã bɔ.19Me b'otal Mali, ndɛ ákekwɛɛ ãndɔɔ omɔ̃ ngesɛ onse ɔ̃kwal, bvool áketsam me ndɔɔ a mɔ̃.20Ke mbee oŋɔ̃, ɛ̃mbuaal-anyam ɛ̃kɔɔl. Bɔ abvi oyam y'olweel o Nziã, me nkuul a nkuul, me ndɔɔ a m'emwɛn bɔ ye m'eyoo bɔ. Ke ngwel wɛ, ãndɔɔ ã́bwel kɛn a m'emfa ki éyɛɛn ãnzwel.21Ke mbee ãtsoo mpuɔ̃, atsiil muaan, bu awi ndɛ nkuũ yi Yeso. Nkuũ oyɔ yi élieel ãnzwel Mali ye k'ebva ndɛ yam.22Ke mbee oŋɔ̃, tsoo li embaal Mali ye Dzedzef mbiin m'emfa ki eyɛɛn ãngel ã Moyize, ekoo . Obobɔ, bɔ abiri muaan Yelusalem, me ndɔɔ yi asuo ndɛ ola Mfam Nziã.23Ke ngwel wɛ, ákel onse ɔ̃nkaan a Mfam Nziã ndiri: «Muaan wu bɔɔl ndyam wueel wu otab ɔ̃la a ngoo, ebvaan akal wa ngel me ndɔɔ a Mfam .»24Mali ye Dzedzef awi hɛ̃ kab, m'emfa ki etam ngel a Mfam Nziã osa: «Ãkuun mbuaal, wuo anywɛn akyam buaal b'emfa onge mɔ̃.»25Ŋ'esa oŋɔ̃, ke Yelusalem, éli ye bɔɔl ngemɔ̃ lɛn nkuũ Simehɔ̃. Bɔɔl olɔ éli dzu, bvool ékelweel Nziã. Lɔ ékekiaal kwɛn Nziã ayuɔɔl mbuul wu abvuul baal b'Isalayel. Ɔ̃fel wu Ɔ̃nsensal áli nkal a ndɛ wu Simehɔ̃,26bvool álieel ndɛ ndiri ndɛ k'akoo m'okwa wɛ, okɛɛn ndɛ k'amwɛn Mãsia wu éyɛɛn Mfam ndiri ayuɔɔl Isalayel wɛ.27Obobɔ, Ɔ̃fel wu Ɔ̃nsensal obiri ndɛ ke Nzɔ a Nziã. Kɛn a me lio olɔ, tal ye ngoo a Yeso abiri muaan, me ndɔɔ yi asa m'etam ãngel osa me ndɔɔ a ndɛ wu muaan.28Simehɔ̃ owel muaan onse mviɔɔl ɛ̃ ndɛ, obveel Nziã ãtuɛɛn, ndiri:29«Mfam! Meba ŋã, yɔɔl kwɛn mɛ̃ wu ɔ̃sal a yɛ nkwa onse opi, onge b'eyɛɛn yɛ.30Ke ngwel wɛ, mviil ã mɛ̃ ãmwɛn Ɔ̃mvuul wu eyuɔɔl yɛ.31Yɛ afaal ndɛ kwɛn baal bueel amwɛn ndɛ.32Ndɛ àkal onge mwiĩ wu asa kwɛn ɛ̃kiri mvieel ɛ̃yɛɛ yɛ, ndɛ hɛ̃ àkal ndɔɔ yi esa kwɛn baal awa Isalayel dzuun.»33Tal a Yeso ye ngoo a ndɛ akam me ndɔɔ ãndɔɔ m'eyɛɛn Simehɔ̃ me ndɔɔ a ndɛ.34Simehɔ̃ ondɔɔl bɔ kuɔɔl, bvool olieel Mali wu ngoo a Yeso bubu: «Nziã osueel muaan wu, me ndɔɔ yi abal baal bibi k'Isalayel, bvool aseel bakyɛ. Ndɛ àkal eliĩ ki efa ola ndɛ wu Nziã, kɛn a baal bibi àtiɔ ndɛ eboo.35Obobɔ, ndɛ àsuo ãtsam m'ãdziɔɔn onse ɛ̃kwal ɛ̃ baal bibi. Yɛ wu Mali, fool ètab yɛ ɔ̃kwal onge b'etab epwel mbuul.»36Oŋɔ̃ hɛ̃ éli y'ɔ̃kaal ngɔmɔ̃ wɛn nkuũ Ãnã. Ɔ̃kaal ondɛ áli ɔ̃liaal-ɛ̃kiɛɛn a Nziã. Ndɛ áli muaan a Fanwel, wa yam li Asɛɛl. Ndɛ ale yii ekukwel ki ɔ̃kaal. Ndɛ ákal y'ɔ̃lam wu ábaal ndɛ fa obwee, kɛn a mvel nsiaan.37Ɔ̃lam a ndɛ okwi. Ndɛ bu asiil ndyam sii, tiil ŋ'eyii ndɛ me mvel ɛ̃kuun-mpuɔ̃ ye nã (84). Ndɛ k'ákeywɛn ke Nzɔ a Nziã wɛ, ndɛ áli oŋɔ̃ tsia mwiĩ, ákesa ɔ̃sal a Nziã onse ãbuɛɛn mɛn k'adza wɛ.38Ndɛ otɔ oŋɔ̃ kɛn a me lio li ékeyɛɛn Simehɔ̃ ye Dzedzef bwɛn a Mali. Ndɛ obvi Nziã olweel me ndɔɔ a Yeso, bvool olieel ãndɔɔ m'ãtal ndɛ wu Yeso, ola baal b'ákekiaal kwɛn Nziã abvuul Yelusalem.39Ke mbee a ŋ'esi Dzedzef ye Mali ãndɔɔ mbueel m'etam ãngel osa, bɔ akɔɔl Ngalile, ke bviil e bɔ li Nadzalet.40Ŋ'esa oŋɔ̃, muaan ákeyal, bvool ákewam. Ndɛ ákeluul m'ãkaã, nyiĩ a Nziã éli ye ndɛ.41Mvel bwɛn a mvel, ngoo a Yeso ye tal a ndɛ ákeyi Yelusalem, me ndɔɔ a pfuun li Onduru .42Ŋ'ekoo Yeso mvel kuun ye yuaal, bɔ ayɛn okɔ ye ndɛ, onge b'abesa me tsoo e pfuun.43Ke mbee a pfuun, bɔ abvool ola, kɛn a Yeso osiil ke Yelusalem, ngoo ye tal yi ayɛɛ pyɛ.44Bɔ áketsam ndiri ndɛ áli ye baal bakyɛ b'áli ye bɔ. Bɔ bu abvi ndɛ obii ol'eburu e bɔ y'anga-ndoo a bɔ, ke mbee a ŋ'esi bɔ tsoo ɔ̃tsiin me nkuul.45Onge bɛn bɔ k'amwɛn ndɛ wɛ, bɔ akɔɔl Yelusalem ke ndɛ obii.46Ke mbee ãtsoo ãtyel, bɔ ayebɔɔ ndɛ me nsɛn onse Nzɔ a Nziã, kal-a-kal ayiool b'ãngel. Ndɛ ákeyoo bɔ, bvool ákefuul bɔ ɛ̃mfuul.47Baal bueel b'ákeyoo ndɛ ákekam bibi, me ndɔɔ yi ékebɔɔ ndɛ otsɛn b'ãndɔɔ ngesɛ-ngesɛ, bvool ákebveel ɛ̃mfuul y'ãyal mam mbueel.48Ŋ'emwɛn tal ye ngoo ndɛ, esi bɔ ongɛɛ, obobɔ ngoo a ndɛ olieel ndɛ bubu: «Muaan a mɛ̃, ndɔɔ yi esi yɛ bee yi mã? Tal, mɛ̃ ye tal a yɛ ɛ̃kwal al'ɛ̃yii ke ywel, bu eyii ebii yɛ ãmboo mbueel!»49Ndɛ obveel bɔ bubu: «Ndɔɔ mã yi ekebii byɛ mɛ̃? Byɛ k'eyɛɛ kwɛn ebvaan mɛ̃ etal ãndɔɔ ã tal a mɛ̃ wɛ?»50Kɛn a bɔ k'abɔɔ m'eyɛɛn ndɛ otsɛn wɛ.51Ke mbee oŋɔ̃, ndɛ okɔɔl Nadzalet ye bɔ. Ndɛ ákelweel bɔ. Ngoo ákekwɛɛ ãndɔɔ omɔ̃ mam mbueel onse ɔ̃kwal.52Yeso ákekwel, bvool ãkaã ákebɔɔl kɛn obɔɔl. Nziã ákedzii ndɛ, baal bueel hɛ̃ ákedzii ndɛ.
Wycliffe Bible Translators, Inc.