DZAÃ8
Ɔ̃kaal wu asiin y'anga-ɔ̃lam
1Yeso oyɛn nkio yi Olibve.2Kɛn a m'epal-epal, ndɛ obvool Nzɔ a Nziã, baal bueel ayi ola ndɛ. Ŋ'ebvi ndɛ nsɛn, ndɛ obvi bɔ oyiool.3Ayiool b'ãngel y'afalisaye abiri ndɛ ɔ̃kaal wu adzwɛɛn ye bɔɔl. Bɔ asuul ndɛ kal-a-kal a embuul.4Bɔ alieel Yeso bubu: «Ɔ̃tee, ɔ̃kaal wu, adzwɛɛn ndɛ ye bɔɔl.5Onse Ngel, Moyize atam bee k'etyal akaal ba m'emfa ki ãnkɔɔn. Obobɔ, yi eyɛɛn yɛ mã?»6Bɔ ákeyɛɛn obobɔ, m'ombio o ndɛ, kwɛn bɔ abɔɔ elyal ki afɛn ndɛ. Kɛn a ŋ'epfɔɔn ndɛ, ndɛ obvi okel me nsie m'ɔ̃liɛɛn.7Onge bɛn bɔ ákefuul ndɛ ɛ̃mfuul kɛn ofuul, ndɛ oseel nzuru, olieel bɔ ndiri: «Yɔɔl kwɛn onse byɛ, mbuul wu oywɛn obi, akal mbuul wu ɛ̃kwel wu atyal ndɛ nkɔɔn!»8Ndɛ opfɔɔn bvool, bu abvi okel bvool me nsie.9Ŋ'eyoo bɔ ãyɛɛn omɔ̃, bɔ adzuru ãnzuru ngɔmɔ̃-ngɔmɔ̃, bɛɛn m'akuul. Yeso osiil ndyam y'ɔ̃kaal wu áli kal-a-kal a baal.10Obobɔ, Yeso oseel nzuru, olieel ndɛ ndiri: «Ke ngu, bɔ kwɛn ali? Mbuul si ngɔmɔ̃ k'awi yɛ etumbu wɛ?»11Ɔ̃kaal obveel ndɛ ndiri: «Mbuul pyɛ, taal.» Yeso obveel ndɛ ndiri: «Mɛ̃ hɛ̃ ke ngwi yɛ etumbu wɛ. Oŋɔ̃ yi, bee bvool obi obesa.»]Mwiĩ a ɔ̃kiri
12Yeso bvool olieel bɔ bubu: «Mɛ̃ bam ndi mwiĩ a ɔ̃kiri. Mbuul wu anɔɔn a mɛ̃, k'àdzuu onse empeel bam wɛ, kɛn a ndɛ àkal ye mwiĩ wu elaã.»13Obobɔ, afalisaye alieel ndɛ ndiri: «Yɛ ndyam atsweel nzuru a yɛ yam: Ŋɛn otsweel o nzuru obɔ k'oli bo taa-taa wɛ.»14Yeso obveel bɔ bubu: «Onkyam ŋɛn mɛ̃ etsweel nzuru a mɛ̃ myam, otsweel o nzuru o mɛ̃ oli bo taa-taa, ke ngwel wɛ mɛ̃ ngyɛɛ ku mfi mɛ̃ ye ku eyi mɛ̃. Byɛ, byɛ k'eyɛɛ ku mfi mɛ̃ wɛ, k'eyɛɛ hɛ̃ ku eyi mɛ̃ wɛ.15Byɛ, byɛ etsiil ãndɔɔ m'emfa ki ombuul, kɛn a mɛ̃, mɛ̃ k'ewa mbuul etumbu wɛ.16Okɛɛn mɛ̃ ndyam ekeewa mbuul etumbu, etumbu e mɛ̃ ekeekal ki taa-taa, ke ngwel wɛ mɛ̃ ke ndi myam sii wɛ: Mɛ̃ ndi ye Taal wu ayuɔɔl mɛ̃.17Ákel onse Ngel a byɛ ndiri m'etsweel baal buaal ãli taa-taa.18Mɛ̃, mɛ̃ ebetsweel nzuru a mɛ̃ myam, Taal wu ayuɔɔl mɛ̃ abetsweel mɛ̃ hɛ̃.»19Bɔ bu afuul Yeso ndiri: «Tal a yɛ oli kwɛn?» Ndɛ obveel bɔ ndiri: «Byɛ k'eyɛɛ mɛ̃ wɛ, byɛ hɛ̃ k'eyɛɛ Tal a mɛ̃ wɛ. Okɛɛn byɛ al'eyɛɛ mɛ̃, byɛ ekeeyɛɛ Tal a mɛ̃ hɛ̃.»20Ndɛ ákeyɛɛn ãndɔɔ omɔ̃ ŋ'ékeyiool ndɛ onse Nzɔ a Nziã, tsotsoo eluɔ ki abelɔ ãkab mã nzi. Mbuul k'asiin ndɛ wɛ, ke ngwel wɛ lio e ndɛ ale kɛn ekoo wɛ.Wu eyuɔɔl Tal
21Yeso bvool olieel bɔ bubu: «Mɛ̃, mɛ̃ eyi, byɛ èbii mɛ̃, bvool byɛ èkwa onse obi o byɛ. Ku eyi mɛ̃ ndyam, byɛ, byɛ k'ekoo m'oya okɔ wɛ.»22Ayuda ayɛɛn bam-a-bam ndiri: «Ndɛ nzuru abii obam, kwɛn ndɛ ayɛɛn ndiri: “Ku eyi mɛ̃, byɛ bam k'ekoo m'oya okɔ wɛ.”»23Yeso ákeyɛɛn bɔ ndiri: «Byɛ, byɛ eli ba nsie, mɛ̃, mɛ̃ ndi wa ywel. Byɛ, byɛ eli b'ɔ̃kiri wu, mɛ̃, mɛ̃ ke ndi wu ɔ̃kiri wu wɛ.24Obɔ otsɛn be ngyɛɛn mɛ̃ wɛn, byɛ èkwa onse ãbi ã byɛ. Ke ngwel wɛ, ŋɛn byɛ k'ekiool wɛ wɛn, mɛ̃, mɛ̃ ndi, byɛ èkwa onse ãbi ã byɛ.»25Bɔ ákeliaal ndɛ ndiri: «Yɛ, yɛ ndyam nã li?» Ndɛ obveel bɔ ndiri: «Wu ngyɛɛn mɛ̃ byɛ fa obɛɛn.26Mɛ̃ ndi y'ãndɔɔ bibi me ndɔɔ a byɛ m'eyɛɛn ye m'etsiil. Kɛn a wu ayuɔɔl mɛ̃ oli wa taa-taa, bvool mɛ̃ ndyam eliaal ɔ̃kiri me ngyoo mɛ̃ ola ndɛ.»27Bɔ k'akwaal otsɛn ndiri ndɛ ákeyɛɛn ye bɔ me ndɔɔ a Tal wɛ.28Yeso olieel bɔ ndiri: «Ŋ'ekieel endɛɛl byɛ Muaan a mbuul, byɛ ekieel eyɛɛ wɛn mɛ̃, mɛ̃ ndi, bvool wɛn mɛ̃ k'esa ndɔɔ me myam wɛ. Kɛn a mɛ̃ eyɛɛn m'emfa ki eyiool Taal mɛ̃.29Wu ayuɔɔl mɛ̃ oli ye mɛ̃. Ndɛ k'asuul mɛ̃ myam-sii wɛ, ke ngwel wɛ mɛ̃ ndyam ebesa ãlio mbueel b'edzii ndɛ.»30Onge bɛn ákeyɛɛn ndɛ obobɔ, baal bibi alɔ okiool onse ndɛ.Baan b'Abalayam wuo baan b'ɔ̃fpu?
31Yeso olieel Ayuda b'álɔ okiool onse ndɛ ndiri: «Okɛɛn byɛ ekuru nzuru me be ngyɛɛn mɛ̃, byɛ bam ŋ'eli ayio a mɛ̃.32Byɛ ekieel eyɛɛ otaa-taa, otaa-taa okieel osuul byɛ ndii.»33Bɔ abveel ndɛ bubu: «Bee eli atiɔɔl b'Abalayam, bee mwɛn-éndɛɛl kɛn ekal ankyal a mbuul wɛ, bɛn yɛ ndyam atɔ m'oyɛɛn wɛn: “Byɛ ekieel ekal ndii!”»34Yeso obveel bɔ ndiri: «Taa-taa bam, mɛ̃ eyɛɛn byɛ wɛn, mbuul wueel wu asa obi, oli ɔ̃nkyal a obi.35Ɔ̃nkyal k'akal onse nzɔ ɔ̃bu wɛ, kɛn a muaan wu akal onse yɔ ɔ̃bu.36M'emfa okyɛ, okɛɛn Muaan osuul byɛ ndii, byɛ ekieel ekal bam ndii.37Mɛ̃ ngyɛɛ wɛn, byɛ eli atiɔɔl b'Abalayam. Kɛn a byɛ ebii k'ebam mɛ̃, me ndɔɔ yɛn eyɛɛn e mɛ̃ k'ebɔɔ mboo onse byɛ wɛ.38Mɛ̃, mɛ̃ eyɛɛn me mwɛn mɛ̃ ola Taal, oŋɔ̃ byɛ hɛ̃, esa m'eyoo byɛ ola tal wa byɛ.»39Bɔ abveel ndɛ ndiri: «Tal a bee, eli Abalayam.» Ndɛ olieel bɔ ndiri: «Okɛɛn byɛ eli baan b'Abalayam, kɛn byɛ ekeesa ɛ̃sal mi Abalayam.40Kɛn a meba, byɛ ebebii mɛ̃ wu ebam, mɛ̃ mbuul wu ngyɛɛn byɛ otaa-taa be ngyoo mɛ̃ ola Nziã. Abalayam k'ási obobɔ wɛ.41Byɛ, byɛ esa ɛ̃sal ɛ̃ tal a byɛ.» Bɔ abveel ndɛ ndiri: «Bee, bee k'eli baan b'embwɔɔ wɛ, bee eli kɛn a me tal ngɔmɔ̃: Tal a bee, eli Nziã.»42Yeso olieel bɔ ndiri: «Al'okɛɛn Nziã ali Tal a byɛ, byɛ ekeedzii mɛ̃. Ke ngwel wɛ, mɛ̃, mɛ̃ mpal ola Nziã, bvool mfi ola ndɛ. Mɛ̃ ke mfi ola myam wɛ, wu otam mɛ̃ ndɛ.43Ndɔɔ mã yɛn byɛ k'ekwaal otsɛn b'eyɛɛn e mɛ̃ wɛ? Me ndɔɔ yɛn byɛ k'ekoo k'eyoo ãyɛɛn ã mɛ̃ wɛ.44Byɛ, byɛ eli baan a tal a byɛ wu Ɔ̃pfu, obobɔ, byɛ edzii k'esa b'edzii tal a byɛ. Ndɛ wu Ɔ̃pfu oli ɔ̃bam fa obɛɛn. Ndɛ k'ákekal onse otaa-taa wɛ, me ndɔɔ yɛn onse ndɛ otaa-taa pyɛ. Ŋ'etsoo ndɛ mfya, ndɛ ŋ'ayɛɛn m'emfa ki eli ndyam, ke ngwel wɛ ndɛ oli nga-mfya, bvool oli tal a mfya.45Kɛn a mɛ̃, me ndɔɔ yɛn mɛ̃ eyɛɛn otaa-taa, byɛ k'ekiool mɛ̃ wɛ.46Onse byɛ, mbuul wɛn okoo k'aliaal mɛ̃ obi be nsi mɛ̃ nã? Okɛɛn mɛ̃ eyɛɛn otaa-taa, otsɛn omã bɛn byɛ bam k'ekiool mɛ̃ wɛ?47Mbuul a Nziã akiool ãyɛɛn ã Nziã. Okɛɛn byɛ bam k'ekiool wɛ, me ndɔɔ yɛn byɛ k'eli ba Nziã wɛ.»Yeso y'Abalayam
48Ayuda abveel Yeso ndiri: «Bee ke y'ɔ̃dzoo wu eyɛɛn wɛn yɛ, yɛ li ɔ̃fi-Samali, bvool wɛn yɛ li y'ɔ̃fel wu ɔ̃bi-ɔ̃bi wɛ!»49Ndɛ obveel bɔ ndiri: «Mɛ̃ ke ndi y'ɔ̃fel wu ɔ̃bi-ɔ̃bi wɛ. Mɛ̃ elweel Tal a mɛ̃. Kɛn a byɛ, byɛ k'elweel mɛ̃ wɛ.50Mɛ̃, mɛ̃ k'ebii lweel li myam wɛ, eli ye ngɔmɔ̃ wu abii lweel e mɛ̃, bvool atsiil ãndɔɔ.51Taa-taa bam, mɛ̃ eyɛɛn byɛ wɛn, okɛɛn mbuul okwee eyɛɛn e mɛ̃, ndɛ kieel k'akwa bam wɛ.»52Obobɔ, Ayuda alieel ndɛ ndiri: «Meba ŋã, bee eyeyɛɛ kwɛn yɛ li y'ɔ̃fel wu ɔ̃bi-ɔ̃bi. Abalayam okwi, aliaal-ɛ̃kiɛɛn a Nziã hɛ̃ akwi, bɛn yɛ bam atɔ m'oyɛɛn wɛn: “okɛɛn mbuul okwee eyɛɛn e mɛ̃, ndɛ kieel k'akwa bam wɛ!”53Yɛ bam olɔ nduru tal a bee Abalayam wu ákwi. Aliaal-ɛ̃kiɛɛn a Nziã ákwi hɛ̃. Yɛ b'atsam wɛn yɛ nã li?»54Yeso obveel bɔ ndiri: «Okɛɛn mɛ̃ ebelweel nzuru a mɛ̃ myam, lweel e mɛ̃ k'eli y'otsɛn wɛ. Wu abelweel mɛ̃, Tal a mɛ̃. Ndɛ wu ebeyɛɛn byɛ wɛn: “Ndɛ oli Nziã a bee!”55Ke yam, byɛ k'eyɛɛ ndɛ wɛ, kɛn a mɛ̃, mɛ̃ ngyɛɛ ndɛ. Okɛɛn mɛ̃ ngyɛɛn wɛn, mɛ̃ ke ngyɛɛ ndɛ wɛ, mɛ̃ olɔ nkal nga-mfya onge byɛ. Kɛn a mɛ̃ ngyɛɛ ndɛ, mɛ̃ hɛ̃ elweel Endɔɔ e ndɛ.56Abalayam wu tal a byɛ áluul m'esɛ, ke ngwel wɛ ndɛ áyɛɛ kwɛn ndɛ àmwɛn tsoo e mɛ̃. Ndɛ ámwɛn lɔ, bvool ásia mpaa ngamfɛn.»57Ayuda alieel ndɛ ndiri: «Yɛ mvel ãku-ãtaan (50) kɛn ekoo wɛ, yɛ wɛn yɛ ámwɛn Abalayam!»58Yeso olieel bɔ ndiri: «Taa-taa bam, mɛ̃ eyɛɛn byɛ wɛn, ye k'aburu Abalayam, mɛ̃ ndi.»59Etɔ oŋɔ̃, bɔ awel ãnkɔɔn, me ndɔɔ yi atyal ndɛ mɔ̃. Kɛn a Yeso odziɔɔn, bu apal onse Nzɔ a Nziã.Wycliffe Bible Translators, Inc.