DZAÃ13
Yeso osuɔɔl ntaã yi ayio a ndɛ
1Ye k'ekoo lio e Pfuun li Onduru, Yeso al'amaayɛɛ kwɛn lio al'emeekoo li embal ndɛ ɔ̃kiri wu bvool ayi ola Taal. Ndɛ wu ádzii baal a ndɛ b'áli onse ɔ̃kiri, ndɛ bvool odzii bɔ bibi tiil ntɔ.2Yeso y'ayio a ndɛ ákedza m'ãnkunkwal. Ŋ'esa oŋɔ̃, Ɔ̃pfu al'amaalɔ ãtsam m'atiɔ Yeso onse ɔ̃kwal a Yuda, wu muaan a Simɔ̃ Isikaliot.3Kɛn a Yeso áyɛɛ kwɛn Tal áwi ãndɔɔ mam mbueel me mviɔɔl ɛ̃ ndɛ, áyɛɛ kwɛn ndɛ áfi ola Nziã, bvool áyɛɛ kwɛn ndɛ àyi ola Nziã.4Ndɛ otɛɛn ke misa, odzuul ekɔ ki abelaal ke ywel ɔ̃kuru, owel epie ki ekɔ, bu akuru kyɛ me luu.5Ke mbee oŋɔ̃, ndɛ olɔ ãdza onse saan li enɛn, obvi ayio a ndɛ ntaã osuɔɔl, bu ayieel yɔ m'ekɔ ki ekuru ndɛ m'eluu.6Ndɛ oyi ola Simɔ̃ Piɛɛl. Piɛɛl olieel ndɛ ndiri: «Mfam, yɛ ndyam asuɔɔl mɛ̃ ntaã?»7Yeso obveel ndɛ bubu: «Ndɔɔ yi esa mɛ̃ bam, yɛ ndyam k'akwaal yɔ otsɛn meba wɛ, kɛn a yɛ akieel akwaal yɔ otsɛn ke mbee.»8Piɛɛl obveel ndɛ ndiri: «Hɛɛ̃-hɛ̃, yɛ ke koo bam m'osuɔɔl mɛ̃ ntaã wɛ!» Ndɛ obveel Piɛɛl ndiri: «Okɛɛn mɛ̃ ke nsuɔɔl yɛ ntaã wɛ, yɛ k'àkal ye bvoo ye mɛ̃ wɛ.»9Simɔ̃ Piɛɛl olieel ndɛ ndiri: «Mfam, okɛɛn obobɔ, bee kɛn a ntaã osuɔɔl, suɔɔl hɛ̃ mviɔɔl ɛ̃ mɛ̃ y'ɔ̃tswɛ a mɛ̃.»10Yeso olieel ndɛ ndiri: «Mbuul wu amaayɔɔ ãdza oli ye kɔɔ li asuɔɔl kɛn a ntaã. Ke ngwel wɛ ndɛ oli ndyam wueel tsɛtsɛ. Byɛ, byɛ eli tsɛtsɛ, kɛn a ke byɛ bueel wɛ.»11Ke ngwel wɛ, Yeso áyɛɛ wu akieel atiɔ ndɛ. Obɔ otsɛn bɛn ndɛ oyɛɛn ndiri: «Byɛ bueel k'eli tsɛtsɛ wɛ.»12Ke mbee a ŋ'esuɔɔl ndɛ bɔ ntaã, ndɛ obveel ekɔ me nzuru, obvool ke misa, bu afuul bɔ bubu: «Byɛ ekwaal otsɛn o be nsi mɛ̃ byɛ?13Byɛ, byɛ ebeta mɛ̃ m'Ɔ̃tee bvool me Mfam, byɛ eli y'ɔ̃dzoo, ke ngwel wɛ mɛ̃ ndi Ɔ̃tee bvool ndi Mfam.14Okɛɛn mɛ̃ wu ndi Mfam bvool ndi Ɔ̃tee, nsuɔɔl byɛ ntaã, byɛ hɛ̃ ebvaan esuɔɔl bakyɛ ntaã.15Ke ngwel wɛ, mɛ̃ nsuo byɛ emfa ki asa, kwɛn byɛ hɛ̃ esa onge be nsi mɛ̃ byɛ.16Taa-taa bam, mɛ̃ eyɛɛn byɛ wɛn, ɔ̃sal k'anduru mfam a ndɛ wɛ, ntam hɛ̃ k'anduru wu otam ndɛ wɛ.17Okɛɛn byɛ eyɛɛ obobɔ, byɛ eli baal b'esɛ, oŋɔ̃ ŋɛn byɛ esi be ngyɛɛn mɛ̃.18Mɛ̃ ke ngyɛɛn bɔ me ndɔɔ a byɛ bueel wɛ. Mɛ̃ ngyɛɛ be nsueel mɛ̃. Kɛn a ebvaan asa m'ákel ndiri: “Wu adza mampa ye mɛ̃ oyii ɔ̃taal a mɛ̃.”19Mɛ̃ eyɛɛn byɛ yɔ meba, me ndɔɔ yɛn ŋ'ekieel aya ndɔɔ oyɔ, byɛ eyɛɛ kwɛn mɛ̃ ndyam ndi.20Taa-taa bam, mɛ̃ eyɛɛn wɛn, wu ayɔɔ wu ntam mɛ̃, wu oyɔɔ mɛ̃, wu oyɔɔ mɛ̃, wu oyɔɔ wu otam mɛ̃.»Yeso oyɛɛn ndiri Yuda akieel atiɔ ndɛ
21Ke mbee a ŋ'eyɛɛn Yeso obobɔ, ɔ̃kwal a ndɛ obii, ndɛ bu ayɛɛn bubu: «Taa-taa bam, mɛ̃ eyɛɛn byɛ wɛn, ngɔmɔ̃ onse byɛ àtiɔ mɛ̃.»22Ayio atal bakyɛ, bvool abvi afuul bam-a-bam me ndɔɔ yi abii k'ayɛɛ wu ekeyɛɛn Yeso me ndɔɔ a ndɛ.23Ngɔmɔ̃ onse ayio, wu ékedzii Yeso áli ke misa, bɔ nkal otwel o ndɛ.24Simɔ̃ Piɛɛl opyel ndɛ, kwɛn ndɛ afuul Yeso me ndɔɔ yi ayɛɛ mbuul nã wu ékeyɛɛn ndɛ.25Ɔ̃yio ondɛ oyiɔɔl nzuru nkal otwel o Yeso, bu afuul ndɛ ndiri: «Mfam, wu ebeyɛɛn yɛ nã?»26Yeso obveel ndɛ bubu: «Mɛ̃ ètob etswel e mampa onse mbiɔ, mbuul wu èwa mɛ̃ kyɛ, ndɛ ondɛ.» Yeso owel etswel e mampa, otob kyɛ onse mbiɔ, bu awi Yuda wu muaan a Simɔ̃ Isikaliot.27Kɛn a ŋ'ewel Yuda etswel e mampa okyɛ, Ɔ̃pfu osam onse ndɛ. Obobɔ, Yeso olieel ndɛ ndiri: «Ndɔɔ yi esa yɛ, sa yɔ tswa-a-tswa!»28Mbuul si ngɔmɔ̃ onse b'áli ke misa k'akwaal otsɛn b'ékeyɛɛn Yeso ndɛ obobɔ wɛ.29Ke ngwel wɛ, onge bɛn Yuda áli mbuul wu ákesiin nkab a nzi, ayio bakyɛ áketsam ndiri Yeso ŋ'átam ndɛ ndiri: «Suun eluɔ bvi eli bia-byɛ ye kɔɔ e bvɛ me ndɔɔ a pfuun», wuo ndɛ ákeyɛɛn ndɛ ndiri: «Yi ayewa wuaal ol'aywal.»30Obobɔ, ke mbee a ŋ'ewel Yuda etswel e mampa, ndɛ opal alili oŋɔ̃. Tsia al'amaabva.Ngel yi nyiɔɔn
31Ke mbee a ŋ'epal Yuda, Yeso olieel bubu: «Meba ŋã, lweel e Muaan a mbuul emɔɔn, bvool Nziã abɔɔ lweel me nkuul a ndɛ.32[Onge bɛn lweel e Nziã emɔɔn me nkuul a ndɛ,] Nziã hɛ̃ àsa kwɛn me nkuul a ndyam, lweel e Muaan emɔɔn, bvool ndɛ àsa yɔ alili oŋɔ̃.33Baan a mɛ̃, mɛ̃ kɛn ndi ye byɛ me muaan-lio. Byɛ ekieel ebii mɛ̃, kɛn a meba, mɛ̃ eyɛɛn ye byɛ onge b'eyɛɛn mɛ̃ Ayuda wɛn: Ku èyi mɛ̃ ndyam, byɛ bam k'ekoo m'oyi okɔ wɛ.34Mɛ̃ ngwi byɛ ngel yi nyiɔɔn yi: Edzii bakyɛ. Onge be ndzii byɛ, byɛ hɛ̃ edzii bakyɛ.35Okɛɛn byɛ eli ye dzii onse byɛ, baal bueel ayɛɛ kwɛn byɛ eli ayio a mɛ̃.»Yeso oyɛɛn ndiri Piɛɛl àtwɛn ndɛ
36Simɔ̃ Piɛɛl ofuul Yeso ndiri: «Mfam, yɛ kwɛn ayi?» Yeso obveel ndɛ ndiri: «Ku èyi mɛ̃, yɛ ke koo m'onɔɔn o mɛ̃ meba wɛ, yɛ akieel anɔɔn a mɛ̃ m'ãtsoo m'ãya.»37Piɛɛl bvool ofuul ndɛ ndiri: «Mfam, otsɛn omã bɛn mɛ̃ ke nkoo m'onɔɔn o yɛ meba wɛ? Mɛ̃ nkoo m'okab omwiĩ o mɛ̃ me ndɔɔ a yɛ».38Yeso obveel ndɛ ndiri: «Yɛ wɛn yɛ koo m'okab omwiĩ o yɛ me ndɔɔ a mɛ̃? Taa-taa bam, mɛ̃ eyɛɛn yɛ wɛn, ye k'ekuaal nswee, yɛ akieel atwɛn nsa tyel wɛn yɛ ke yɛɛ mɛ̃ wɛ.»Wycliffe Bible Translators, Inc.