EBEL3
1Andoo ba ngel, obɔ otsɛn bɛn byɛ b'éti Nziã mbel me ndɔɔ yi ebɔɔ opfel bo ywel, etal kɛn a Yeso wu ebekiool bia-byɛ ke kwel a baal bueel onge ntam bvool ngaa-a-Nziã wu ɔ̃nɛn.2Ndɛ áli wu obvaan m'olɔ b'okiool onse ndɛ, ke mviil ã Nziã wu ásueel ndɛ, onge b'éli Moyize nkal a yam e Nziã lueel.3Kɛn a Yeso ábɔɔ dzuun li enduru li éli a Moyize. Nzal a ŋɛn mbuul wu atuu nzɔ oli ye dzuun li enduru li nzɔ yam.4Ke ngwel wɛ, nzɔ yueel, wu abetuu yɔ mbuul. Kɛn a wu átuu bvieel Nziã.5Me b'otal Moyize, ndɛ áli wu obvaan m'olɔ b'okiool onse nzɔ a Nziã yueel, onge ɔ̃sal, me ndɔɔ yi atsweel ãndɔɔ m'ékeeyɛɛn Nziã ke mbee.6Kɛn a Mãsia oli wu obvaan m'olɔ b'okiool onge Muaan nkal a nzɔ a Nziã. Ŋ'esa oŋɔ̃, nzɔ a ndɛ eli bia-byɛ, okɛɛn bia-byɛ esɛn ãnã tiil ntɔ onse ãŋã ye kaã bvi eli bia-byɛ y'esɛ me bvɛ.7Obɔ otsɛn bɛn, Ɔ̃fel wu Ɔ̃nsensal oyɛɛn ndiri:«Okɛɛn nonɔ̃ byɛ eyoo nkii a ndɛ,8ebee y'ɛ̃tswɛ mpɛn okal,onge me tsoo li ébee bɔ Nziã olweel,bvool ámbio ndɛ,onse ɔ̃baan wa kɛɛ-kɛɛ.9Okɔ, ankiɔɔn a byɛ ápwee mɛ̃ ŋ'ékeywɛɛn bɔ mɛ̃ k'esa ndɔɔ,onkyam ŋɛn, bɔ ámwɛn ɛ̃sal ɛ̃ mɛ̃,10mvel ãku-ãnã (40).Obɔ otsɛn bɛn, mɛ̃ éyoo nkye ye baal ba lio olɔ bvool élieel bɔ wɛn:“Ɛ̃kwal ɛ̃ bɔ ɛ̃bebii kɛn onge obii,bvool bɔ k'ayɛɛ ãnkuul ã mɛ̃ wɛ.”11Onse mpuru a mɛ̃, mɛ̃ ndab ɔ̃kyel wɛn:“Bɔ kieel k'asam bam onse owuun o mɛ̃ wɛ!”»12Andoo, ekal y'onkyab! Mbuul ngɔmɔ̃ onse byɛ abee y'ɔ̃kwal wu ɔ̃bi okal, abee okiool oywɛn, bvool abee lala ye Nzia wa mwiĩ osyal.13Kɛn ewa bakyɛ mpɛn tsoo bwɛn a tsoo, me lio lam lueel lɛn akoo k'ata me: «Nonɔ̃», kwɛn mbuul si ngɔmɔ̃ onse byɛ abee y'ɔ̃tswɛ mpɛn okal, me pfuru li obi.14Ke ngwel wɛ, bia-byɛ eyii bvoo ye Mãsia, okɛɛn bia-byɛ esɛn ãnã tiil ntɔ onge b'éli bia-byɛ fa obɛɛn.15Obobɔ, ákel bubu:«Okɛɛn nonɔ̃, byɛ eyoo nkii a ndɛ,ebee y'ɛ̃tswɛ mpɛn okal,onge me tsoo li ébee bɔ Nziã olweel.»16Ke mbee a ŋ'éyoo bɔ nkii a Nzia, b'áywɛɛn ndɛ k'asa ndɔɔ anã? Eli baal bueel b'épaal Moyize k'Edzipito.17B'éyi Nziã mpuru ye bɔ mvel ãnku-anã (40) anã? Eli ye baal b'ási ãbi, bɛn ebiĩ e bɔ élaal abɔ-bɔ k'ɔ̃baan wa kɛɛ-kɛɛ.18Ŋ'élab Nziã ɔ̃kyel ndiri: «Bɔ kieel k'asam onse owuun b'éyɛɛl mɛ̃ me ndɔɔ a bɔ wɛ», ndɛ y'anã ákeyɛɛn? Eli ye b'ábee ndɛ olweel.19Obobɔ, bia-byɛ emwɛn kwɛn bɔ k'ákoo k'asam wɛ, me ndɔɔ yɛn bɔ áywɛn a okiool.
Wycliffe Bible Translators, Inc.