Read EBEL 10

EBEL10

¹Ngel eli kɛn a edzel-a-dzel bvi eluɔ bvi ekieel eya, ke mɔ̃-a-mɔ̃ wɛ. Obɔ otsɛn bɛn, yɔ k'ekoo bam k'esuul baal b'asyal tsotsoo a Nziã akal ɔ̃koo wɛ, onkyam ŋɛn mvel bwɛn a mvel ákewa ãmpɔɔ m'emfa kiki ãlio mbueel.²Okɛɛn Ngel al'ekoo k'esuul baal ɔ̃koo, kɛn etel-nziil, baal b'abewa ãmpɔɔ omɔ̃ ámaayɔɔl mɔ̃ owa, me ndɔɔ yɛn bɔ ol'áyii tsɛtsɛ sa ngelemɔ ɔ̃bu, bvool k'abekal y'ãtsam m'ãbi ã bɔ wɛ.³Ke yam, ãmpɔɔ mã mvel bwɛn a mvel omɔ̃, ákeyeel bɔ ãbi ã bɔ.⁴Ke ngwel wɛ, ãkel m'alam b'angwɛmbɛ ye m'alam b'antab k'ãkoo bam k'ãmbaal ãbi wɛ.

⁵Obɔ otsɛn bɛn, ŋ'eyi Mãsia m'ɔ̃kiri wu, ndɛ olieel Nziã ndiri:«Ãmpɔɔ y'ãkab,yɛ k'ádzii mɔ̃ wɛ!Ke mboo a mɔ̃,yɛ buo mɛ̃ nzuru!⁶Onkyam ãmpɔɔ m'ãbedziool mam mbueel y'ãmpɔɔ m'odzeel b'ãbi,yɛ hɛ̃ k'ásia mpaa me mɔ̃ wɛ!⁷Obobɔ, mɛ̃ ndieel wɛn:“Ee Nziã, mɛ̃ bu, mɛ̃ ngyii,mɛ̃ ngyii me ndɔɔ yi esa ãndɔɔ m'edzii yɛ,m'emfa ki ákel me ndɔɔ a mɛ̃,onse Ɔ̃nkaan wa ngel.”»

⁸Ŋ'ɛ̃kwel kɛn ndɛ olieel ndiri: «Yɛ ke dzii bvool ke sia mpaa m'ãmpɔɔ y'ãkab wɛ, m'ãmpɔɔ m'ãbedziool mam mbueel wɛ, m'ãmpɔɔ m'odzeel b'ãbi wɛ.» Kwɛn ŋɛn ákewa mɔ̃ m'emfa ki etam Ngel.⁹Ndɛ bvool olweel ndiri: «Mɛ̃ bu, mɛ̃ ngyi me ndɔɔ yi esa b'edzii yɛ». Ŋɛn ndɛ ombaal emfa ki ɛ̃kwel ki obuɛɛn, bu akiil ki bviaal ke mboo a kyɛ.¹⁰Yeso Mãsia osi b'edzii Nziã: Ndɛ owi nzuru a ndɛ me ndyam sa ngemɔ̃ ɔ̃bu. M'emfa okyɛ, bia-byɛ eyii ba ngel.

Okal ɔ̃koo me bvoo ye Mãsia

¹¹Ngaa-a-Nziã wueel áketɛɛn tsoo bwɛn a tsoo me ndɔɔ yi asa ɔ̃sal a ndɛ. Ndɛ ákewa ãmpɔɔ mamã nsa bibi, mɛn k'ãkoo bam k'ãmbaal ãbi wɛ.¹²Kɛn a Mãsia, ke mbee a ŋ'éwi ndɛ mpɔɔ sa ngemɔ̃ ɔ̃bu me ndɔɔ ãbi, ndɛ ábvi nsɛn me kuɔɔl e Nziã ki elam.¹³Oŋɔ̃, ndɛ abekiaal tiil tsoo li èsuul Nziã ataal a ndɛ ke nsɛn a ntaã e ndɛ.¹⁴Ke ngwel wɛ, me mpɔɔ kɛn a ngamɔ̃, Mãsia ámaasuul baal ɔ̃koo ɔ̃bu nzal ɔ̃bu, baal obɔ b'émeesuul ndɛ áyii ba ngel.

¹⁵Ɔ̃fel wu Ɔ̃nsensal hɛ̃ atsweel bia-byɛ yɔ. Ke ngwel wɛ, ndɛ ŋ'ɛ̃kwel álieel ndiri:¹⁶Mɛ̃ wu Mfam ndieel bubu: «Tal Ondoo b'ekieel etɛn mɛ̃ ye bɔ ke mbee ãtsoo omɔ̃. Mɛ̃ ekieel elɔ ãngel ã mɛ̃ onse ɛ̃kwal ɛ̃ bɔ, mɛ̃ hɛ̃ ekieel epuul mɔ̃ onse ãtsam ã bɔ.¹⁷Mɛ̃ bvool kieel k'ebeyeel ãbi ã bɔ y'elyal e bɔ wɛ.»¹⁸Onge bɛn Nziã odzeel ãbi ã baal ɔ̃bu, otsɛn bvool b'awa ãmpɔɔ me ndɔɔ a ãbi k'obekal wɛ.

¹⁹Obobɔ, andoo a dzii, bia-byɛ eli y'ãŋã m'esam ɔ̃kwɛɛl pyɛ onse mboo yi enduru ɔ̃nsensal me nkuul a ãkel ã Yeso.²⁰Ndɛ ámaadzweel bia-byɛ nkuul yi enyiɔɔn bvool yi ebiri k'elaã. Ndyam ábwel me yɔ, me nkuul a lido li onse mboo yi enduru ɔ̃nsensal, ŋ'ayɛɛn ndiri nzuru a ndyam.²¹Bia-byɛ bvool eli ye Ngaa-a-Nziã wu ɔ̃nɛn wu ásuul Mfam a Nzɔ a Nziã.²²Obobɔ, esyal tsotsoo a Nziã ɔ̃kwal kal, y'okiool b'ɔ̃koo, y'ɔ̃kwal wa amaasuɔɔl m'ãtsam mbueel m'ãbi-ãbi, ye nzuru yi amaasuɔɔl m'ãdza mã tsɛtsɛ.²³Enɔɔn k'eta kaã e bia-byɛ ke nkwel a Nziã, owɔɔl wɛ, ke ngwel wɛ, Nziã wu áwi bia-byɛ lɔɔ, oli wu obvaan m'okiool.²⁴Bia-byɛ ewuaal a bakyɛ, ewa bakyɛ mpɛn k'ekal onse dzii bvool k'esa ɛ̃sal mi ngesɛ.²⁵Ebee ãbvɔɔn ã bia-byɛ obal, onge b'emeenam bakyɛ obesa. Kɛn bia-byɛ ewɛɛl bakyɛ, onge b'emwɛn byɛ kwɛn tsoo e Mfam eyii tsotsoo.

²⁶Ke ngwel wɛ, ke mbee a ŋ'emeeyɛɛ bia-byɛ otaa-taa, okɛɛn bia-byɛ ebesa obi kɛn osa me nkoo, mpɔɔ nkyam bvool k'ebekal wɛ yi embaal ãbi.²⁷Esiil kɛn a k'ekiaal y'ongɛɛ bueel otsiil b'ekieel etsiil Nziã ãndɔɔ ã baal ye mbaa yi kɔɔ-kɔɔ yi ekieel edziool baal b'abee k'alweel ndɛ.²⁸Okɛɛn mbuul ofel Ngel a Moyize, abebam ndɛ nyiĩ pyɛ, ŋɛn amwɛn buaal wuo atyel atsweel ndiri ndɛ osi obi.²⁹Oŋɔ̃ etumbu ol'ekal bwɛn ki akieel awa mbuul wu omwɛn Muaan a Nziã ngwel, wu opfiɔɔl ãkel m'ondoo m'ã́mbaal ãbi ã ndɛ, bvool wu otoo Ɔ̃fel wu áyi a ndɛ nyiĩ a Nziã?³⁰Ke ngwel wɛ, bia-byɛ eyɛɛ wu álieel ndiri:«Mɛ̃ wu ebveel obi m'obi, mɛ̃ wu èwa furu e ndɔɔ yueel», bvool ndiri:«Mfam akieel atsiil ãndɔɔ ã baal a ndɛ.»

³¹Eli ndɔɔ yi ongɛɛ bibi k'abva me mviɔɔl ɛ̃ Nziã wa mwiĩ.

³²Emeetsam m'ãtsoo m'obɛɛn, mɛn ŋ'édzw eel Nziã byɛ mviil, byɛ ékuru ɛ̃kwal onse ãmpal bibi m'édzwaan a byɛ.³³Ke ngwel wɛ, lio likyɛ, áketoo bvool áketuaal byɛ mpal ke mviil ã baal. Lio likyɛ hɛ̃, byɛ ékemwɛn fool bvoo ye baal bakyɛ bɛn áketuaal bɔ mpal yi emfa kiki.³⁴Ke ngwel wɛ, byɛ émwɛn fool bvoo ye baal a bwal, bvool byɛ ékiool kwɛn awɛɛl eluɔ e byɛ y'esɛ kieel, me ndɔɔ yɛn byɛ eyɛɛ wɛn byɛ eli y'opfel b'onduru obvɛn bvool b'ɔ̃bu.³⁵Obobɔ, ebee ãŋã e byɛ oyɔɔl, ke ngwel wɛ furu li enɛn ekuru nzuru me mɔ̃.³⁶Ke ngwel wɛ, ebvaan byɛ ekal y'osɛ-mwiĩ, kwɛn ke mbee a ŋ'esi byɛ b'edzii Nziã, byɛ ebɔɔ ki éwi ndɛ lɔɔ.³⁷Ke ngwel wɛ, ákel bubu:«Esiil kɛn etsi-tsiri, kyam kɛn etsi-tsiri,mbuul wɛn ebvaan aya, àya,ndɛ kieel k'ayiil wɛ.³⁸Kɛn a mbuul a mɛ̃ wa dzu akieel akal y'elaã m'okiool.Kɛn a ndɛ abvool mbee, mɛ̃ k'èbesia mpaa me ndɛ wɛ.»

³⁹Bia-byɛ, bia-byɛ k'eli m'ɔ̃luo a baal b'abvool mbee kwɛn edziɔɔn wɛ. Kɛn a bia-byɛ eli m'ɔ̃luo a baal b'ali y'okiool, me ndɔɔ yi ebvuul omwiĩ o bia-byɛ.

Wycliffe Bible Translators, Inc.

https://app.library.bible/content/3840a1950e7b8532