GALATE5
Okal ndii me Mãsia
1Mãsia opaal bia-byɛ onse ebwal, kwɛn bia-byɛ ekal bam ndii. Obobɔ, bia-byɛ etɛɛn ye mpɛn, me ndɔɔ yi ebee onse ebwal ki onkyal obekɔɔl.2Mɛ̃ wu Pool eyɛɛn byɛ wɛn, okɛɛn byɛ ewi nzuru kwɛn atsiil byɛ , ŋɛn Mãsia k'àbekal y'otsɛn me ndɔɔ a byɛ wɛ.3Mɛ̃ bvool eyɛɛn byɛ bam wɛn, mbuul wueel wu awa nzuru kwɛn atsiil ndɛ, ebvaan ndɛ akiaal Ngel yam yueel hɛ̃.4Byɛ baal b'ebii k'ekal dzu m'okiaal o Ngel, byɛ ŋ'ekab nzuru ye Mãsia. Byam ŋ'epal onse nyiĩ a Nziã.5Me b'otal bia-byɛ b'eli y'okiool, bia-byɛ ebeta kaã wɛn Nziã àsuul bia-byɛ dzu. Ɔ̃fel wu asa kwɛn bia-byɛ ekiaal ndɔɔ oyɔ ɔ̃kwal mbaa-mbaa.6Ke ngwel wɛ, onse Mãsia, ndɔɔ yi nkiin k'otsiil o nzuru wuo obee o nzuru otsiil wɛ. Ndɔɔ yi nkiin eli kɛn okiool b'osuo nzuru me dzii.7Byɛ éketsuu ntiin ngesɛ. Mbuul nã wu otɛɛl byɛ, kwɛn byɛ ebee otaa-taa obelweel?8Ãtsam m'obobɔ k'ãfi ola wu oti byɛ mbel wɛ.9Muaan-lebviil etsi-tsiri asuul pɔtɔ-pɔtɔ ndyam wueel afel.10Mɛ̃ ndyam ndi ye kaã me byɛ onse Mfam wɛn, byɛ k'ètsam emfa ekyam wɛ. Kɛn a mbuul ɔ̃bi pyɛ wu alɔ ɛ̃tsab onse byɛ, àbɔɔ etumbu.11Andoo a mɛ̃, me b'otal mɛ̃, okɛɛn mɛ̃ kɛn ebetee wɛn otsiil o nzuru oli y'otsɛn, ke ndɔɔ mã yi abetuaal mɛ̃ mpal kɛn otuaal? Ke ngwel wɛ, okɛɛn mɛ̃ ebetee obobɔ, enkulusu e Mãsia k'ebekal ndɔɔ yi ebal mbuul si ngɔmɔ̃ wɛ!12Bɔ obɔ b'alɔ byɛ ɛ̃tsab, ametɔ tiil m'ombaal b'obɔɔl o bam!13Byɛ b'andoo a mɛ̃, Nziã áti byɛ mbel kwɛn byɛ ekal ndii. Kɛn a yɔɔl kwɛn okal ndii o byɛ obɔ obee mpwee yi esa byɛ m'etam efua bvi ombuul okal. Yɔɔl kwɛn me dzii, byɛ ekal asal a bakyɛ.14Ke ngwel wɛ, Ngel yueel eli onse ndɔɔ ngamɔ̃ yi: «Yɛ àdzii ngaburu-mbuul onge b'edzii yɛ nzuru a yam.»15Kɛn a ŋɛn byɛ etswa bakyɛ miin bvool ekɔɔl bakyɛ, ekal y'onkyab byɛ ol'eyesiɛɛn k'obam o bakyɛ!Emfa ki edzuu ɔ̃kiool
16Mɛ̃ eyɛɛn byɛ bubu: Edzuu m'Ɔ̃fel, obobɔ byɛ k'èsa ãndɔɔ m'etam efua bvi ombuul osa wɛ.17Ke ngwel wɛ, efua bvi ombuul k'eta y'Ɔ̃fel wɛ, efua bvi Ɔ̃fel hɛ̃ k'eta y'ombuul wɛ. Bɔ ange-buaal ali onse eta, m'emfa kyɛn byɛ k'ekoo k'esa b'edzii byɛ osa wɛ.18Kɛn okɛɛn Ɔ̃fel abiri byɛ, byɛ k'ebekal ke nsɛn a okwɛn o Ngel wɛ.19Efua bvi ombuul ebemɔɔn m'ãndɔɔ mã: Obvool o ntal ye mbuul wɛn byɛ kɛn ebaal bakyɛ wɛ, ãndɔɔ mã mbiin, ãndɔɔ m'esio,20olweel b'anziã ba mfya, ebel, byal, ɛ̃tsuun, nsɔɔ, ãmpuru, ombɔɔ, ɛ̃kɔɔl, otsɔɔn ye bakyɛ,21ɔ̃tam, obɔɔ o mbal, odza y'onywã b'onduru ɔ̃ndel, y'ãndɔɔ mãkyɛ mɛn onge omɔ̃. Mɛ̃ ewa byɛ ãnkunkwa onge b'ewi mɛ̃ byɛ mɔ̃ tsɔɔn wɛn, baal b'asa ãndɔɔ mã m'emfa okyɛ, bɔ k'àsam Okwɛn o Nziã wɛ.22Kɛn Ɔ̃fel abeburu eluɔ bvi: dzii, esɛ, opi, osɛ-mwiĩ, owuaal o bakyɛ, obvɛ, okiool,23efyɛ, okuru b'ɔ̃kwal. Ngel k'ebee ãndɔɔ omɔ̃ wɛ.24Baal ba Yeso Mãsia ámaakwal ãtsam m'ombuul y'efua bvi ombuul m'enkulusu.25Onge bɛn bia-byɛ eli y'elaã m'Ɔ̃fel, edzuu m'emfa ki edzii ndɛ.26Bia-byɛ ebee y'ondɛɛl o nzuru okal, ebee bakyɛ opoo, ebee bakyɛ ɔ̃kwal olɔ.Wycliffe Bible Translators, Inc.