Ɛ̃SAL22
1«Baan-ngoo a mɛ̃ y'abetaal, meba ŋã, emeeyoo be nzii mɛ̃ byɛ oyɛɛn me ndɔɔ yi esuun nzuru a mɛ̃.»2Ŋ'eyoo bɔ kwɛn Pool ayɛɛn ye bɔ m'ɔ̃nywã wu Ebele, bɔ bvool abvi ɔ̃lii wu onduru. Ndɛ bu ayɛɛn bubu:3«Mɛ̃ ndi Ɔ̃yuda wa bviil li Taase li nsie yi Silisi. Kɛn a mɛ̃ ékwel ke Yelusalem ŋã, bvool Gamalyel mbuul wu áyiool mɛ̃ ãndɔɔ mbueel m'onkɔɔ o bia-byɛ. Mɛ̃ éli y'ebal me Nziã, onge byɛ bueel hɛ̃ nonɔ̃.4Mɛ̃ étueel baal b'anɔɔn a nkuul a Yeso mpal tiil epfu, esiin akaal y'abɔɔl etyal me bwal.5Ngaa-a-nziã wu ɔ̃nɛn ye nkel yi akuul-kuul akoo k'atsweel wɛn mɛ̃ otaa-taa ebeyɛɛn. Bɔ bam baal b'áwi mɛ̃ ɛ̃nkaan kwɛn mɛ̃ ngyi yensuul myɛ̃ ola baan-ngoo ba Damas. Mɛ̃ éyɛn me ndɔɔ yɛn akiool b'eyebɔɔ mɛ̃ okɔ, mɛ̃ nsiin bɔ bvool mbiri bɔ ke Yelusalem kwɛn awa bɔ etumbu.»6«Mɛ̃ éli me nkuul, bvool alengyii tsotsoo a Damas, enseel oŋɔ̃, ŋ'eyii sua tal dzu, mbaa yi nɛn yi efi ywel enyɛɛn edzii mɛ̃.7Mɛ̃ bvi me nsie, bvool ngyoo nkii ngamɔ̃ eyɛɛn mɛ̃ bubu: “Sol, Sol, ki ebetuaal yɛ mɛ̃ mpal emã?”8Mɛ̃ mfuul ndiri: “Yɛ nã li, Mfam?” Nkii oyɔ ebveel mɛ̃ ndiri: “Mɛ̃ ndyam ndi Yeso wa Nadzalet wɛn yɛ ndyam abetuaal mpal.”9Baal b'ákeyi ye mɛ̃ amwɛn mbaa yam ngesɛ. Kɛn a bɔ k'akwaal otsɛn o nkii a mbuul wu ákeyɛɛn ye mɛ̃ wɛ.10Mɛ̃ bu mfuul ndiri: “Mfam, mɛ̃ ngyii bwɛn esa?” Mfam obveel mɛ̃ ndiri: “Tɛɛn, yi Damas, okɔ, àyɛɛn yɛ mam mbueel m'ètam Nziã yɛ osa!”11Kɛn onge bɛn onyɛɛn o mbaa oyɔ óbwel mɛ̃ mviil, b'áli ye mɛ̃ asiin mɛ̃ me kuɔɔl, bu abiri mɛ̃ Damas.12Ŋ'esa oŋɔ̃, mbuul ngɔmɔ̃ wɛn nkuũ Ananias áli oŋɔ̃. Ndɛ ákuru nzuru me Nziã, y'ãngel ã Moyize. Ayuda bueel b'ákekal ke Damas áketuɛɛn ndɛ.13Ndɛ oyi ola mɛ̃ bvool olieel mɛ̃ ndiri: “Sol, ndoo a mɛ̃, mwɛn bvool!” Kɛn a me lio alili, mviil ã mɛ̃ ãdzweel nzuru, mɛ̃ bu mwɛn ndɛ.14Ndɛ olieel mɛ̃ bubu: “Nziã a nkiɔɔn a bia-byɛ tsɔɔn ásueel yɛ, me ndɔɔ yɛn, yɛ yɛɛ b'edzii ndɛ, bvool mwɛn Yeso wa dzu, bvool kwɛn yɛ yoo nkii a ndɛ.15Ke ngwel wɛ, yɛ kieel wu ayeyɛɛn me ndɔɔ a ndɛ ke nkwel a baal bueel, m'ãndɔɔ m'emwɛn yɛ ye m'eyoo yɛ.16Meba ŋã, ki ekiaal yɛ bvool emã? Tɛɛn, y'awal opongo, kwɛn Nziã adzeel ãbi ã yɛ, ŋ'eta yɛ nkuũ a ndɛ mbel.”»17«Ŋ'ebvool mɛ̃ Yelusalem, me lio li ékebuɛɛn mɛ̃ onse Nzɔ a Nziã, mɛ̃ Ɔ̃fel osiin.18Mɛ̃ mwɛn Mfam. Ndɛ olieel mɛ̃ bubu: “Mbal Yelusalem bam tswa-a-tswa, ke ngwel wɛ baal a bviil li k'àkiool b'eyɛɛn yɛ me ndɔɔ a mɛ̃ wɛ.”19Mɛ̃ mveel bubu: “Ke Mfam, bɔ ayɛɛ ngesɛ kwɛn mɛ̃ ékeyi onse ãnzɔ m'ãbuɛɛn me ndɔɔ yi etyal b'akiool yɛ onse bwal, bvool ebɛɛl bɔ.20Ŋ'ábam Etyɛn wu áketee Nsia a yɛ, mɛ̃ ndyam éli oŋɔ̃. Mɛ̃ étsweel ãndɔɔ ã baal b'ábam ndɛ, mɛ̃ hɛ̃ ékwee ekɔ e bɔ.”21Mfam bu alieel mɛ̃ bubu: “Yi, mɛ̃ ndyam ètam yɛ lela, ola baal bɛn k'Ayuda wɛ.”»22Baal ayoo Pool. Kɛn a ndɛ ayeyɛɛn ndɔɔ oyɔ, bɔ abvi ɛ̃sɔɔl okuaal bvool ayɛɛn ndiri: «Akwa! K'ebvaan asuul ngaburu wu mwiĩ wɛ!»23Bɔ ákekuaal ɛ̃sɔɔl, ákenzɔɔ ekɔ e bɔ, bvool ákedzweel ɔ̃fel ke ywel.24Obobɔ, kapiri otam k'aswɛɛl Pool onse ekɔɔ ki ambwel-mbwel, bvool k'abɛɛl ndɛ, kwɛn ndɛ aliaal elyal ki ákeyiri ndɛ ɛ̃sɔɔl.25Ŋ'ayii akuru ndɛ ɛ̃sii, ndɛ olieel mbiri a ambwel-mbwel wu áli oŋɔ̃ ndiri: «Mbuul a Lom wɛn mbal kɛn etsiil ndɔɔ a ndɛ wɛ, awi yɛ nkuul yi abɛɛl ndɛ?»26Ŋ'eyoo mbiri obobɔ, ndɛ oyeyɛɛn ye kapiri ndiri: «Mfam, yɛ bwɛn asa? Mbuul wu oli mbuul a Lom!»27Kapiri bu ayefuul Pool ndiri: «Yɛɛn mɛ̃, taa-taa, yɛ mbuul a Lom li?» Pool obveel ndɛ ndiri: «Hɛɛ̃!»28Kapiri olieel ndɛ ndiri: «Mɛ̃ ndyam éfuru nzi bibi m'okal o mɛ̃ mbuul a Lom.» Pool obveel ndɛ ndiri: «Kɛn a mɛ̃ ndi mbuul a Lom wu emburu-ngoo!»29Alili oŋɔ̃, b'ákebii kwɛn Pool ayɛɛn m'ɔ̃dzii, asyel lela ye ndɛ. Kapiri buɔ obɔɔ ndɛ, ŋ'eyɛɛ ndɛ kwɛn mbuul wu etam ndɛ ɛ̃si okuru oli mbuul a Lom.30Kapiri ákedzii k'ayɛɛ ngesɛ-ngesɛ elyal ki éfɛn Ayuda Pool. Obɔ otsɛn bɛn ela esiool, ndɛ otam kwɛn anyiɔɔn Pool ɛ̃sii, bvool otam kwɛn amfam b'angaa-a-Nziã ye mbal yi nɛn yi Ayuda abvɔɔn. Ndɛ otam k'asool ye Pool, bu asuul ndɛ ke nkwel a bɔ.
Wycliffe Bible Translators, Inc.