Ɛ̃SAL14
1K'Ikonihum, Pool ye Balanabas ayɛn hɛ̃ ayesam onse nzɔ a ãbuɛɛn a Ayuda, bɔ atee m'emfa kyɛn Ayuda ye baal bɛn k'Ayuda wɛ bibi ayii akiool.2Kɛn Ayuda bakyɛ b'ábee okiool asi nsiɔɔl ola bɛn k'Ayuda wɛ k'akal y'ãtsam m'ãbi-ãbi m'andoo.3Kɛn a Pool ye Balanabas akool ãtsoo m'ɔ̃lɔɔ onse bviil olɔ. Bɔ ákeyɛɛn y'ãŋã, ke ngwel wɛ bɔ áketa kaã me Mfam. Ndɛ wu Mfam ákesuo otaa-taa b'Endɔɔ e nyiĩ a ndɛ yi nɛn me waan y'emwã bvi ékesa bɔ.4Baal ba bviil olɔ, akab ebaal bviaal, bɛn m'epie ki Ayuda, bɛn m'epie ki antam.5Baal bɛn k'Ayuda wɛ, y'Ayuda bwɛn amfam a bɔ awɛɛ k'atuaal antam mpal, bvool k'atyal bɔ ãnkɔɔn.6Ŋ'eyoo bɔ nsia oyɔ, bɔ abal onse ãbviil mã nsie yi Likahoni: Bviil li Lisitele ye li Dɛɛbe, ye mã nku-a-nku a mɔ̃.7Okɔ, bɔ atee Nsia yi Ngesɛ.8Ke Lisitele éli ye bɔɔl ngɔmɔ̃ wu ékwi mviil. Ndɛ áli ekal fa mwiĩ a ngoo, ndɛ mwɛn-éndɛɛl kɛn adzuu wɛ.9Ndɛ ákeyoo m'ékeyɛɛn Pool. Ndɛ wu Pool olɔ ndɛ etɔ, omwɛn kwɛn ndɛ oli y'okiool me ndɔɔ yi abvuul.10Ndɛ bu ayɛɛn kokɔ ndiri: «Tɛɛn, kal dzu me ntaã e yɛ!» Mbuul ondɛ ayebiri kab lam nyã, obvi odzuu.11Ŋ'emwɛn baal b'esi Pool, bɔ abiool m'ɔ̃nywã wu Alikahoni ndiri: «Anziã ke bɛn awel emfa e baal, bu asool ola bee.»12Bɔ ati Balanabas me nziã «Dzehus», Pool wu eti bɔ me nziã «Hɛɛmes», me ndɔɔ yɛn ndɛ wu ákeyɛɛn.13Nzɔ yi abebuɛɛn Dzehus éli k'ɔ̃nywã a bviil. Ngaa-a-nziã a Dzehus obiri alam b'angwɛmbɛ ye bviĩ bvi ebvɛ-ebvɛ nkal a bɔ, k'ɛ̃nywã ɛ̃ nzɔ oyɔ. Ndɛ ákedzii k'awa Pool ye Balanabas kab, mfoo ngamɔ̃ ye baal .14Ŋ'eyoo antam ange-buaal ãndɔɔ omɔ̃, bɔ akɔɔl ekɔ e bɔ, ayɛn tswa-a-tswa onse baal, abiool ndiri:15«Andoo, ki esa byɛ obobɔ emã? Bee hɛ̃ baal onge byɛ eli! Okɛɛn bee etee byɛ Nsia yi Ngesɛ yi, me ndɔɔ yɛn byɛ eyɔɔl anziã b'etiɔ bɛn otsɛn pyɛ ba, kwɛn byɛ ekɔɔl ola Nziã wa mwiĩ. Ndɛ wu ási ywel ye nsie, y'ãdza m'ɔ̃ngwa, y'eluɔ bvieel bvi eli onse okɔ.16Tsɔɔn-tsɔɔn ndɛ áyɔɔl ãyam ã baal mam mbueel ã́nɔɔn ãnkuul ã bam.17Kɛn a ndɛ k'ákwɛɛn k'asuo bɔ obvɛ o ndɛ wɛ. Ke ngwel wɛ, fa ywel, ndɛ abeyuɔɔl byɛ amvel y'ekwɛn me lio li ngesɛ. Ndɛ hɛ̃ abewa byɛ bvi-odza bibi, bvool abeluul ɛ̃kwal ɛ̃ byɛ m'esɛ.»18Onkyam ŋɛn Pool ye Balanabas ayɛɛn obobɔ, bɔ amwɛn fool bibi m'oluo o baal k'awa bɔ ãkab.19Me lio alili, Ayuda afi Antioswe y'Ikonihum. Bɔ asi baal nsiɔɔl k'adzoo Pool ãnkɔɔn. Onge bɛn bɔ áketsam ndiri ndɛ ŋ'akwi, bɔ adzuru ndɛ me nsie-a-nsie tiil k'apaal ndɛ onse bviil.20Kɛn ayio ayedzii ndɛ, ndɛ otɛɛn, bu abvool onse bviil. Ŋ'etsi bviil, ndɛ oyɛn Dɛɛbe ye Balanabas.21Pool ye Balanabas atee Nsia yi Ngesɛ onse bviil li Dɛɛbe. Onse bviil olɔ, bɔ abɔɔ akiool bibi. Ke mbee oŋɔ̃, bɔ abvool ke Lisitele, k'Ikonihum, bvool k'Antioswe mã Pisidi.22Bɔ awi ayio mpɛn, bvool awi bɔ luo k'asɛn ãnã onse okiool, ndiri: «Ebvaan bia-byɛ emwɛn fool bibi, m'osam onse Okwɛn o Nziã.»23Onse Ebvɔɔn bwɛn a Ebvɔɔn, Pool ye Balanabas asueel baal b'akal akuul-kuul. Obobɔ, ke mbee a ŋ'ebuɛɛn bɔ bvool asi ãbuɛɛn mã me nzal, bɔ awi akuul-kuul obɔ me mviɔɔl ɛ̃ Mfam wu élɔ bɔ okiool onse ndɛ.24Ke mbee a ŋ'etsiil Pool ye Balanabas Pisidi, bɔ atɔ Pamfili.25Bɔ atee Endɔɔ e Nziã ke Pɛɛdze, bu ayɛn Atali.26Bɔ ambal oŋɔ̃, awel ãsua abvool Antioswe mã Sili, ke mboo yi áwi bɔ me nyiĩ a Nziã me ndɔɔ ɔ̃sal wu efi bɔ osa.27Ŋ'etɔ bɔ, bɔ abvool Ebvɔɔn, bu awi bɔ nsia a ãndɔɔ mbueel m'esi Nziã me nkuul a bɔ, y'emfa ki edzweel ndɛ baal bɛn k'áli Ayuda wɛ nkuul a okiool.28Pool ye Balanabas akal lio li ela y'ayio k'Antioswe.
Wycliffe Bible Translators, Inc.