2 Kolinte9
Ãndɔɔ ãkyam m'asa me ndɔɔ ɔ̃ta
1Me b'otal wuaal me ndɔɔ akiool, k'eli y'otsɛn kwɛn mɛ̃ nkel byɛ ɔ̃nkaan wɛ.2Ke ngwel wɛ, mɛ̃ ngyɛɛ kwɛn byɛ eli y'ɔ̃kwal wa ngesɛ. Mɛ̃ mbɛɛl ntwel ola baal a Maseduaan me ndɔɔ a byɛ. Mɛ̃ ngyɛɛn bɔ wɛn: «Akiool ba nsie yi Akayi amaawal ɔ̃yɛɛl fa mvel wu abwel.» M'emfa okyɛ, nzal a ɔ̃sal yi eli a byɛ ewi baal bibi efua ki asa emfa kiki.3Onkyam obobɔ, mɛ̃ ngyuɔɔl andoo obɔ, kwɛn obɛɛl b'ebɛɛl bee ntwel me ndɔɔ a byɛ, obee ngwel okal me ndɔɔ yi, bvool kwɛn byɛ ekal bam y'ɔ̃yɛɛl, onge be ngyɛɛn mɛ̃.4Ke ngwel wɛ, okɛɛn andoo a Maseduaan ayi ye mɛ̃, k'ayebɔɔ byɛ emeewal ɔ̃yɛɛl wɛ, bee b'eta kaã me byɛ, ol'eluul m'opfuru. Byɛ hɛ̃ ol'eluul me bɔ.5Obobɔ, mɛ̃ mwɛn ngesɛ kwɛn andoo atsɔɔn nkwel a mɛ̃ ola byɛ. Bɔ àbvool ɔ̃nta wu ɔ̃kwal ngɔmɔ̃ wu ewi byɛ lɔɔ. M'emfa okyɛ, ŋ'èya mɛ̃, mɛ̃ èyebɔɔ ndɛ amaayɛɛl, oŋɔ̃ ŋ'ekieel esuo kwɛn byɛ ebewa ɔ̃kwal ngɔmɔ̃, k'ewa ebveel kuul mbee wɛ.6Eyeel ndɔɔ yi: Wu akwɛn etsi-tsiri, atsam hɛ̃ etsi-tsiri. Wu akwɛn bibi, atsam hɛ̃ bibi.7Yɔɔl kwɛn mbuul bwɛn a mbuul awa m'emfa ki ewɛɛ ndɛ onse ɔ̃kwal, ãwua pyɛ, abee ndɛ oywɛɛn, ke ngwel wɛ Nziã odzii wu awa y'esɛ.8Nziã oli ye waan li aluul byɛ m'ondɔɔl o kuɔɔl b'emfa bwɛn emfa. Obobɔ, byɛ èbɔɔ kɛn obɔɔ bvieel bvi eli a byɛ y'ekɔɔ, byɛ bvool èbɔɔ bvi esa byɛ ndɔɔ yueel yi ngesɛ.9Ákel onse ɔ̃nkaan a Nziã ndiri:«Ndɛ awa aywal ɔ̃kwal ngɔmɔ̃,obvɛ o ndɛ oyiil ãlio mbueel.»10Ndɛ wu abewa ɔ̃kwɛn ekwɛn, bvi ewa ndɛ bvi-odza. Ndɛ àwa byɛ hɛ̃ ekwɛn, bvool asa kwɛn bvɛ ekal bvam bibi, kwɛn obvɛ o byɛ olɔɔ kɛn olɔɔ.11M'emfa okyɛ, byɛ ekal apfel bam ãlio mbueel, kwɛn byɛ ekoo k'ewa ɔ̃kwal ngɔmɔ̃. Obobɔ, baal bibi àbveel Nziã ãtuɛɛn m'ãkab m'èwa bee bɔ m'ãfi ola byɛ.12M'ãkab omɔ̃, byɛ èwa akiool bvi eywɛn a bɔ, bvool èwa bɔ mpwee bibi yi abveel Nziã ãtuɛɛn.13M'ãkab omɔ̃, byɛ èsuo kwɛn byɛ elweel Nsia yi Ngesɛ yi Mãsia. M'emfa okyɛ, akiool bibi àbveel Nziã ãtuɛɛn me ndɔɔ okiool y'ɔ̃kwal a byɛ wa ngesɛ wa bibi me ndɔɔ a bɔ bvool me ndɔɔ a bakyɛ.14Bɔ àsuo byɛ dzii e bɔ li bibi, ŋ'èbuɛɛn bɔ me ndɔɔ a byɛ, me ndɔɔ yɛn Nziã osi byɛ obvɛ b'emwã.15Bia-byɛ ebveel Nziã ãtuɛɛn me ndɔɔ ekab e ndɛ li emwã!Wycliffe Bible Translators, Inc.