2 Kolinte13
Ãnkunkwa mã ntɔ y'ɔ̃bio
1Yi nsa yi tyel yi eyetal mɛ̃ byɛ. Ákel ndiri: «M'otsiil o ndɔɔ yueel, ebvaan ayoo amwɛn buaal wuo atyel.»2Ŋ'éyi mɛ̃ byɛ otal li nsa yuaal, mɛ̃ éwi byɛ ãnkunkwa. Meba, ŋɛn mɛ̃ ke ndi onse byɛ wɛ, mɛ̃ bvool ewa mɔ̃ me b'ási obi tsɔɔn, emfa kiki hɛ̃ me b'asiil: Ŋɛn mɛ̃ ngyi byɛ otal, mɛ̃ k'èsio mbuul nyiĩ wɛ.3Ke ngwel wɛ, byɛ ebii eliĩ ki esuo byɛ kwɛn Mãsia wu ãbeyɛɛn me nkuul a mɛ̃, ndɛ wɛn k'ali y'okwal onse byɛ wɛ, kɛn a ndɛ abesuo waan e ndɛ onse byɛ.4Ngwanyã, ábɛɛl ndɛ m'enkulusu me ndɔɔ yɛn ndɛ áli y'okwal onge mbuul, kɛn a ndɛ oli mwiĩ me waan e Nziã. Bee hɛ̃ eli y'okwal me bvoo ye ndɛ, kɛn a bee ekieel ekal mwiĩ mboo mɔ̃ ye ndɛ, me waan e Nziã.5Emeebwɛɛl ɛ̃kwal ɛ̃ byɛ ngesɛ, bvool emeetsam, me ndɔɔ yi etal okɛɛn byɛ ebekal m'emfa ki ekal akiool. Byɛ k'eyɛɛ wɛn Yeso Mãsia oli onse byɛ wɛ? Yɛɛn wɛn nsɔɔ̃ byɛ k'ebwɛɛl ɛ̃kwal ɛ̃ byɛ ngesɛ wɛ.6Mɛ̃ etsam mpii byɛ eyɛɛ wɛn bee bam k'ebvi onse ɔ̃mbio wɛ.7Kɛn a bee esɔɔ ola Nziã kwɛn byɛ ebee ndɔɔ yi mbi osa. Ke me ndɔɔ yi esuo wɛn bee ebvel ɔ̃mbio wɛ. Ki edzii bee kyɛn byɛ esa obvɛ, onkyam ŋɛn bee epal onge baal bɛn k'abvel ɔ̃mbio wɛ!8Ke ngwel wɛ, bee k'eli ye mpɛn yi ekii otaa-taa wɛ, bee eli kɛn a ye mpɛn yi esal me ndɔɔ otaa-taa.9Bee eli y'osia mpaa me lio li eywɛn a bee mpɛn, ki nguo kyɛn byɛ ekal ye mpɛn. Ki edzii bee, kyɛn byɛ ebvool me nkuul.10Obɔ otsɛn bɛn, ŋe ndi mɛ̃ lala ye byɛ, mɛ̃ nkel obobɔ. M'emfa okyɛ, ŋ'ekieel eya mɛ̃ ola byɛ, mɛ̃ mbee byɛ ãyɛɛn ã mpɛn oyɛɛn. Ke ngwel wɛ, okwɛn b'éwi Mfam mɛ̃ b'etuu, ke b'etsal wɛ.11M'osɛɛl, andoo, esia mpaa. Ebii kwɛn byɛ ebvool me nkuul. Ewa bakyɛ mpɛn, ekal y'ɔ̃dzi, ekal onse opi. Obobɔ, Nziã wa dzii, wu opi, àkal ye byɛ.12Ebio bakyɛ ye dzii m'emfa ki ebvaan me baan a Nziã.Akiool bueel abio byɛ.13Yɔɔl kwɛn nyiĩ a Mfam Yeso Mãsia, dzii e Nziã, ye bvoo wu Ɔ̃fel wu Ɔ̃nsensal, ekal ye byɛ bueel.
Wycliffe Bible Translators, Inc.