2 Kolinte11
Pool y'antam ba mfya
1Ee, mɛ̃ nzii kwɛn byɛ emeekuru ɔ̃kwal kwɛn mɛ̃ menkal ye muaan-laa! Hɛɛ̃, emeekuru ɔ̃kwal me m'èyeyɛɛn mɛ̃!2Ke ngwel wɛ, mɛ̃ ndi y'ebal me ndɔɔ a byɛ, ebal e mɛ̃ ki efi ola Nziã. Ke ngwel wɛ, mɛ̃ nsɔɔn byɛ k'ebaal ɔ̃lam ngɔmɔ̃, ɔ̃lam ondɛ Mãsia. Ngwanyã, mɛ̃ nzii k'esuo byɛ ola ndɛ onge nsam-ɔ̃kaal yɛn k'eyɛɛ abɔɔl wɛ.3Kɛn a onge bɛn ntaal m'ãyal ã ndɛ m'ãbi-ãbi ápfuru Ebva, mɛ̃ ndi ye buɔ owɛɛl ãyal ã byɛ ãyebii, bu eyeyɔɔl okuru o nzuru o byɛ me Mãsia bo taa-taa bvool bo tsɛtsɛ.4Ke ngwel wɛ, okɛɛn mbuul ɔ̃kyam oyetee byɛ Yeso wu okam ye wu étee bee, oŋɔ̃ byɛ ekiool ndɛ bam! Byɛ hɛ̃ ekiool k'eyɔɔ ɔ̃fel ɔ̃kyam wu okam ye wu éyɔɔ byɛ, wuo ekiool k'eyɔɔ Nsia yi Ngesɛ yi ekam ye yi éyɔɔ byɛ! Byɛ ekuru ɔ̃kwal m'ãndɔɔ omɔ̃ mbueel!5Kɛn a mɛ̃ etsam wɛn antam a byɛ b'anɛn k'anduru mɛ̃ bvɛɛ wɛ!6Onkyam ŋɛn mɛ̃ wɛn ndiri ke ngyɛɛ oyɛɛn bam ngesɛ wɛ, me b'otal oyɛɛ o Nziã, nswɛɛl pyɛ! Bee ésuo byɛ ndɔɔ oyɔ kal-a-kal ãmboo mbueel, me mbueel m'esi bee.7Ŋe ntsal mɛ̃ byɛ Nsia a Nziã yi Ngesɛ ngwel y'okuaal o nzuru bueel, me ndɔɔ yi endɛɛl byɛ, mɛ̃ oŋɔ̃ obi nsi?8Mɛ̃ nkiool kwɛn ãbvɔɔn mãkyɛ ãwa mɛ̃ furu, me ndɔɔ yi ewuaal a byɛ.9Ŋ'éywɛn mɛ̃ bvieel ola byɛ, mɛ̃ k'ésɔɔ eluɔ e mbuul wɛ. Ke ngwel wɛ, andoo ba Maseduaan áyi mɛ̃ ye bvi éli mɛ̃ ye kɔɔ e bvɛ. Mɛ̃ ébee k'ekal pfuũ me ndɔɔ a byɛ, mɛ̃ ekieel esa obobɔ ãlio mbueel.10Me ndɔɔ otaa-taa o Mãsia b'oli onse mɛ̃, mɛ̃ ngyɛɛn wɛn, mbuul si ngɔmɔ̃ onse etswi e nsie ki Akayi k'akoo k'akii mɛ̃ k'ebɛɛl ntwel me ndɔɔ oyɔ wɛ.11M'emã mɛ̃ ngyɛɛn obobɔ? Me ndɔɔ yɛn mɛ̃ ke nzii byɛ wɛ? Nziã ndyam oyɛɛ kwɛn mɛ̃ nzii byɛ!12B'ebesa mɛ̃, mɛ̃ èsa bɔ kɛn osa. M'emfa okyɛ, b'abii mpwee yi andɛɛl nzuru m'osa b'ãndɔɔ onge bee, k'abɔɔ yɔ wɛ.13Baal ba m'emfa okyɛ ali antam ba mfya, asal a pfuru. Bɔ abesa empa bvi akal antam a Mãsia.14K'eli ndɔɔ yi ɛ̃kam wɛ, nzal-a-ŋɛn Satana ndyam abesa empa ki akal ãnzwel m'oyɔɔl.15Obobɔ, k'eli ndɔɔ yi ɛ̃kam wɛ yɛn asal a Satana akal onge asal b'asa ndɔɔ yi dzu. Kɛn a ntɔ a bɔ ekieel ekal m'emfa ki ɛ̃sal ɛ̃ bɔ.Ãmpal m'emwɛn ntam Pool
16Mɛ̃ bvool ngyɛɛn wɛn, ebee otsam wɛn mɛ̃ ndi ye laa! Wuo, okɛɛn byɛ etsam obobɔ, oŋɔ̃ ekiool kwɛn mɛ̃ nkal ye laa, m'emfa okyɛ mɛ̃ èbɛɛl ntwel etsi-tsiri.17B'eyɛɛn mɛ̃, mɛ̃ k'eyɛɛn bɔ m'emfa ki edzii Mfam wɛ, mɛ̃ eyɛɛn bɔ onge b'eyɛɛn wa ye laa. Ngwanyã, mɛ̃ ngyɛɛ bam wɛn, mɛ̃ ndi y'ɔ̃dzoo wu ebɛɛl ntwel.18Onge bɛn meba bibi abebɛɛl ntwel m'ãndɔɔ m'ombuul, mɛ̃ hɛ̃ èbɛɛl ntwel.19Ke ngwel wɛ, byɛ b'ange-ãyal, byɛ ebekiool ewool bam ndɔɔ pyɛ.20Taa-taa, byɛ ebekiool kwɛn akaal byɛ ankyal, awɛɛl byɛ eluɔ, akuaal byɛ eluɔ, awal byɛ ngwel, abɛɛl byɛ m'osu.21Mɛ̃ ndi y'opfuru b'eyɛɛn ndɔɔ yi: Bee esuo okwal bam bibi.Kɛn okɛɛn mbuul okie k'abɛɛl ntwel, mɛ̃ hɛ̃ ebɛɛl yɔ, onkyam ŋɛn mɛ̃ eyɛɛn onge wa ye laa.22Bɔ Afi-Ebele ali? Mɛ̃ hɛ̃ kyɛ ndi. Bɔ afi-Isalayel? Mɛ̃ hɛ̃ ndɛ ndi. Bɔ ba yam li Abalayam ali? Mɛ̃ hɛ̃ wa lɔ ndi.23Bɔ asal a Mãsia ali? Yɔɔl mɛ̃ bvool ngyɛɛn onge wa ye laa: Mɛ̃ hɛ̃ ndɛ bvool nduru bɔ. Mɛ̃ nsal nduru bɔ, nsam etuul nsa bibi nduru bɔ, abɛɛl mɛ̃ bvool bam bibi yi enduru yi bɔ, nsa bibi mɛ̃ mfuul epfu.24Nsa taan, Ayuda ayuul mɛ̃ asukɔrɔ ãku-ãtyel ye bva (39).25Nsa tyel, apfel mɛ̃ ɛ̃mpaã, nsa ngamɔ̃, atyel mɛ̃ ãnkɔɔn. Nsa tyel, ebɛɛl ki éli mɛ̃ edziin. Sa ngemɔ̃, mwiĩ ɔ̃tsiin ye tsia ɔ̃tsiin, mɛ̃ ndyel etswel ki ekwii kal-a-kal adza m'ɔ̃ngwa.26Onse ãdzwɛ mɛ̃ ngyɛn mɛ̃ bibi, mɛ̃ mwɛɛn y'etsam bvi emfa bwɛn emfa: Etsam bvi nzal, etsam bvi edzuul, etsam bvi efa ola baan-ngoo a mɛ̃ b'Ayuda, ye bɛn k'Ayuda wɛ, etsam bvi onse ãbviil, etsam bvi onse ɛ̃baan mi kɛɛ-kɛɛ, etsam bvi ãdza m'ɔ̃ngwa, ye bvi efa ol'andoo ba mfya.27Mɛ̃ nsi ɛ̃sal ɛ̃ fool, bvool nsa bibi ngwel ɛ̃nsiil. Mɛ̃ ngyoo nzuaal ye nzal, bvool ngywɛn a bvi-odza. Nsa bibi, mɛ̃ ngyoo mfyɛ, bvool ngywɛn a ekɔ.28Oŋɔ̃ ŋɛn mɛ̃ ke ngyɛɛn ndɔɔ yi esiil wɛ: Ndɔɔ oyɔ yi ebekɛɛ mɛ̃ nguo me ndɔɔ ãbvɔɔn mbueel tsoo bwɛn a tsoo.29Ŋɛn mbuul osam onse okwal, oŋɔ̃ mɛ̃ hɛ̃ ngyoo okwal. Ŋɛn mbuul osi ãbi, oŋɔ̃ mɛ̃ hɛ̃ ɔ̃kwal obii.30Okɛɛn ndɔɔ yi abɛɛl ntwel, mɛ̃ èbɛɛl ntwel me ndɔɔ okwal o mɛ̃.31Nziã wu Tal a Mfam Yeso oyɛɛ kwɛn mɛ̃ k'epfuru wɛ. Yɔɔl kwɛn alweel ndɛ ɔ̃bu nkal ɔ̃bu!32Ŋ'éli mɛ̃ ke bviil li Damas, mfam wa ke nsɛn ɔ̃kwɛn Aletas áketam k'akiaal ɛ̃nywã ɛ̃ bviil, me ndɔɔ yi asiin mɛ̃.33Asuul mɛ̃ nsool me fenetel, onse pɛɛ̃, m'ebɔɔ-ebɔɔ, mɛ̃ bu mvuul me mviɔɔl ɛ̃ ndɛ.
Wycliffe Bible Translators, Inc.