Read 1KO 2

1KO2

Otee o Mãsia wu ábɛɛl m'enkulusu

¹Andoo, me b'otal mɛ̃, ŋ'eyi mɛ̃ ola byɛ me ndɔɔ yi etee byɛ ãndɔɔ ã Nziã mã m'edziɔɔn, mɛ̃ k'eyi onge mbuul wu onduru etiaal li oyɛɛn, wuo onge mbuul wu y'ãyal wɛ.²Ke ngwel wɛ, mɛ̃ k'edzii k'eyɛɛ ndɔɔ si mɔ̃ onse byɛ, ndɔɔ yi edzii k'eyɛɛ mɛ̃ kɛn a Yeso Mãsia, Yeso Mãsia wu ábɛɛl m'enkulusu.³Myam éli ke nkwel a byɛ y'okwal, ye buɔ, y'etiɔɔl lueel.⁴M'ékeyɛɛn mɛ̃ ye m'ékeyiool mɛ̃ k'ã́kefa m'ãyɛɛn m'ãyal m'ombuul m'ãywɛɛn baal k'akiool wɛ, kɛn a mɔ̃ ã́kefa me waan li Ɔ̃fel li ékemɔɔn onse mɔ̃.⁵M'emfa okyɛ, okiool o byɛ k'okal sɔɔ nkal ãyal ã baal wɛ, bɔ okal sɔɔ nkal a waan e Nziã.

Ãyal m'ãfa ola Nziã

⁶Kɛn a bee hɛ̃ ebetee ãyal ol'akiool b'amaawam onse okiool. Kɛn ãyal omɔ̃ k'ãli m'ɔ̃kiri wu wɛ. Mɔ̃ hɛ̃ k'ãli mi ɛ̃fel mi ɛ̃bi-ɛ̃bi mi ɛ̃li y'okwɛn nkal ɔ̃kiri wu wɛ, mi ɛ̃kieel ɛ̃siɛɛn k'odziɔɔn.⁷Bee ebetee ãyal ã Nziã, mɛn baal k'ákeyɛɛ wɛ bvool m'ã́li m'edziɔɔn. Kɛn a ye k'ebɛɛn ɔ̃kiri, Nziã ál'amaayɛɛl ãyal omɔ̃ me ndɔɔ yi awa bia-byɛ lweel.⁸Mbiri si ngɔ̃mɔ̃ wu ɔ̃kiri wu k'áyɛɛ ãyal omɔ̃ wɛ. Ke ngwel wɛ, okɛɛn bɔ áyɛɛ mɔ̃, bɔ k'ákaabɛɛl Mfam a lweel m'enkulusu wɛ.⁹Kɛn ákel onse Ɔ̃nkaan a Nziã ndiri:«Ãndɔɔ mɛn dziil k'emwɛn wɛ, mɛn tswi k'eyoo wɛ,mɛn mbuul k'abɔɔ ãtsam ã mɔ̃ wɛ,Nziã ofaal mɔ̃ me ndɔɔ a b'adzii ndɛ.»

¹⁰Kɛn ola bia-byɛ, Nziã osuo mɔ̃ m'Ɔ̃fel. Ke ngwel wɛ, Ɔ̃fel oyɛɛ mbueel, onkyam ɛ̃yɛɛl ɛ̃ Nziã mi ɛ̃li myam m'edziɔɔn.¹¹Mbuul nã onse baal wu oyɛɛ ãtsam ã mbuul? Wu oyɛɛ mɔ̃ eli kɛn ɔ̃fel a ndyam wu oli onse ndɛ. Emfa kiki hɛ̃, mbuul si ngɔmɔ̃ k'ayɛɛ ãtsam ã Nziã wɛ, wu oyɛɛ mɔ̃ eli kɛn Ɔ̃fel a Nziã.¹²Ke yam, ɔ̃fel wu eyɔɔ bia-byɛ k'ali ɔ̃fel wu ɔ̃kiri wɛ, bia-byɛ eyɔɔ Ɔ̃fel wu ofi ola Nziã, kwɛn bia-byɛ eyɛɛ m'ewi Nziã bia-byɛ me nyiĩ a ndɛ.¹³Bee k'eyɛɛn mɔ̃ m'oyɛɛn b'ãyal m'ombuul wɛ, bee eyɛɛn mɔ̃ m'ãyɛɛn m'eyiool Ɔ̃fel a Nziã. Obobɔ, bee ebeyɛɛn ãndɔɔ m'Ɔ̃fel m'ãyɛɛn m'Ɔ̃fel ondɛ.¹⁴Kɛn a mbuul wu abetsam kɛn a m'emfa ki ombuul k'akiool ãndɔɔ m'ãfa ol'Ɔ̃fel a Nziã wɛ. Mɔ̃ ãli owool me ndɔɔ a ndɛ, obɔ otsɛn bɛn ndɛ k'akoo k'akwaal mɔ̃ otsɛn wɛ. Ngwanyã, Ɔ̃fel wu Ɔ̃nsensal wu asa kwɛn mbuul akyɛɛl mɔ̃ ngesɛ.¹⁵Mbuul wu adzuu m'Ɔ̃fel abekyɛɛl mbueel, kɛn a ndɛ, mbuul wu akyɛɛl ndɛ pyɛ.¹⁶Ke ngwel wɛ, ákel ndiri:«Wu ayɛɛ ãtsam ã Mfam nã,m'owa o ndɛ luo?»Kɛn a bia-byɛ, bia-byɛ eli y'ãtsam ã Mãsia.

Wycliffe Bible Translators, Inc.

https://app.library.bible/content/3840a1950e7b8532