Bwɛndi bopele bokoma MALAKO MALAKO14
1Edikaka masu mabae boso bo tɛkɛ e Pasika ko na tɛkɛ e mapa ma pɛpɛ levile . Banganga ba Ndjakomba banɛnɛnɛnɛ ko na balehi ba mobeko bahombaka mwɛngi mo bopea Yesu na mbombi bɛngi bamowoe.2Ta tina emina basabaleana bo: «Etabɔngɔ ta ndelo e tɛkɛ modjɔ mo bato basa lemoa.»3Yesu adaaka ta Betania, ta dii Simo moto odaaka na mabha; mwali omɔti akwea ta ehole edaaka iyo ta mesa, mwali omina apeaka molangi mo alibatele modaaka na malasi ma motwia mokɔɔmɔ na nale e pɛpɛ iputo. Adipoa molangi momina ko asopea malasi ta molo mo Yesu.4Ndambo e bato bakina badaaka ena, basuboa ko basawadjana bo: «Tina esabedja na nde malasi imimi nda?»5Bataka mwali o mina ko babalaka bo: «Babwanaki botɛkɛ malasi mamina na pata dji palanga bonɔ mikama misato ko batombe palanga djimina bɛngi bakɔmedje na bakwali!»6Ekahia Yesu abala bo: «Mokinani. Tina e motungeakadeani na nu nda? Modjɔ mosakɔmeani iyo modii mopele.7Ino odikamadeani na bakwali masu masusu, obwani bo bakɔmeani bopele ehole esusu epali ino; endelo mbi, nitadaabi na nu kɔbili.8Akɔɔki midjɔ mibwanaki na nde bokɔɔ. Asuoni malasi tina e bobɔngedja mokuku mo mbi tina ediki mweka bɛngi bapuseini .9Naotɔndekadeani sooti mɛnɛ bo: pamba isusu ilehabi bo Bwɛndi Bopele, ta ngondo mobimba, babalabi midjɔ mikɔini mwali iyo ko badaakabi bamolɛdjɛ.»10Yudhasi Isikaliote, motingami omɔti ta tei e doomi na babae, akɛɛ ta dii banganga ba Ndjakomba banɛnɛnɛnɛ bɛngi abakabee Yesu.11Ehole eoka bo modjɔ mo mina, baluma na sepi enɛnɛ ko bamodikana bomopa palanga. Ko Yudhasi abanga bohomba mwɛngi ndani mobwani iyo bokaba Yesu.12Ta busa bo mbangi bo tɛkɛ e mapa ma pɛpɛ levile, busa bomina bopaka ibo mbeka e bhata tina e tɛkɛ e Pasika, batingami ba Yesu bawadja bo: «Esika ndani epalakadea wɛ lokɛe aosalingodja mia ma Pasika?»13Iboa Yesu aloma batingami ba nde babae, ko abala na bu bo: «Kɛɛni ta ngando enɛnɛ, osonganadeani na moto omɔti apeli mondungulu mo madiba. Mokimanani,14ko polo ekweadea iyo, tɔndeani moswa ndako bo: “Molehi abali bo: omoinedje ekenge e ndako ekini wɛ bɛngi ayake mia ma Pasika engbanga emɔti na batingami ba nde?”15Ko aonedjadeani ekenge e ndako enɛnɛ e ekpalaka, ebɔngedjama bopele. Ko ta esika e mina olobɔngedjadeani boyaka.»16Batingami bakɛɛ ko bakwea ta ngando enɛnɛ; batanea midjɔ misusu oko mondumba mo batɔndeaka Yesu, ko basɛlingoa mia ma Pasika.17Aimea busa mɔkɔmɔkɔ, Yesu aimea na batingami doomi na babae.18Ehole edaka bo ta mesa ko eyakaka ibo, Yesu abala bo: «Naotɔndeini, edii sooti bo: omɔti ta tei e bino, oyakakadea na mbi, akabadeani .»19Batingami baoka ndjokwa, ko babanga bomowadja omɔti omɔti: «Edii mbi?»20Yesu abasɔmbedja bo: «Edii omɔti ta tei e bino doomi na babae, iyo oyakakadea na mbi mia ta saani emɔti .21Mwana o moto atungi bogwa oko mondumba mokomama ta Makomi tina e nde ; endelo ndjokwa enɛnɛ na moto iyoyo obwani bokaba Mwana o moto! Eidaaka nongo moto o mina abobotame!»22Ta ndelo eyakaka ibo, Yesu atomba ipa, ngɔngɔ dji bosakoa Ndjakomba, abuka ko apa na batingami ba nde; abala na bu bo: «Tombani, iyeye edii mokuku mo mbi.»23Atomba naikina keni e vino, asakoa Ndjakomba, abapa, ko ibo basusu bamwaka vino emina.24Yesu abala na bu bo: «Iyeye edii makiya ma mbi, makiya ma baneakadea mokongo mo Ndjakomba imimi ma sopea tina e bato banɛnɛ.25Sooti mɛnɛ naotɔndeakadeani bo: nitamwakabi vino iyeye naikina tee oko busa bo mwakabi mbi vino e yeene ta Bokumu bo Ndjakomba.»26Ngɔngɔ dji boemba ndjembo, baso bakɛɛ ta ngomba e mele mi Olive.27Yesu abala na batingami bo: «Ino basusu otiadeanini, tina ekomami bo: "Naowabi sindjili o bhata, ko bhata bananganabi ".28Ekahia, ngɔngɔ dji bosisoa ta bogwa bo mbi, nasuabi boso ta Galileya.»29Petelo abala na nde bo: «Nongo bakina bakaotia, mbi nabwaniti bootia.»30Iboa, Yesu amosɔmbedja bo: «Naotɔndei sooti mɛnɛ bo: ta bulu bo busa ibubu, boso bo kɔkɔ abekoe mbala djibae, oinganeadeani mbala djisato.»31Ekahia Petolo abalaka mbala na mbala bo: «Nongo nakaimea mbuti na bogwa nabwaniti boinganea.» Ko ibo basusu babala oko mondumba momina momɔti.32Baimea ta polo emɔti iyena ekabee ibo na kombe e Getesemani , ko Yesu abala na batingami ba nde bo: «Daani iyaya, nakɛi angɔnɔ.»33Atomba Petelo, Djake ko na Yoane. Abanga booka bokɛsɛdji ko na bɔɔ,34ko abala na bu bo: «Molema mo mbi molumi na bokɛsɛdji mbuti na bogwa; dikani iyaya ko osɛndjɛlɛni.»35Akɛɛ adaa bohali na bu, akwaka ta kpɔtɔ ko angɔnɔkɔ bɛngi, ekabɔngɔ, adae pɛpɛ bodaa na ehole iyeye e saya ta boso bo nde.36Aangɔnɔkɔ bo: «Aba , Sesa, pɛpɛ nongo modjɔ momɔti mo onɔi; dongedja keni iyeye e saya mbuti na mbi. Ndelo esusu pɛpɛ bokɔ modjɔ imumu mopalakadea mbi, endelo kɔɔ imumu mopalakadea wɛ.»37Ahula ko aso abatanea bawɛli hiɔ. Ko abala na Petelo bo: «Simona, owɛi? Ohɔniti bodaa mɔsu nongo ngonga emɔti bɛngi osɛndjɛleni?38Sɛndjɛlɛni ko angɔnɔni, bɛngi osakamekamani. Mwembo modii na ngulu, endelo mokuku modii na bwɛmbu.»39Asɔmbɔ naikina angɔnɔ ko abala oko midjɔ mimina mimɔti.40Asɔmbɔ naikina ta polo ekina iyo batingami ba nde ko abatanea bawɛli; baihɔnɔkɔ bodaa mɔsu. Ko baidiaka nongo eka emɔti e bomobalea.41Asɔmbɔ naikina mbala e basato ko abala na bu bo: «Edɛdiyeye obwanini bowɛni ko osahemedjeni mweka? Ehole emina eimei bɛngi Mwana o moto akabame ta mabɔ ma bato ba pekato.42Angɔni! Lokɛeni! indjani, moto iyoyo okabakadeani aimei!»43Oko ta ehole edaka Yesu abala mɛko mimina, Yudhasi, omɔti o batingami doomi na babae, aimea engbanga emɔti na bato banɛnɛ bapeli bipeko bi bila ko na pengu. Balomamaka na banganga ba Ndjakomba banɛnɛnɛnɛ, balehi ba mobeko, ko na basuku.44Yudhasi, iyoyo okabaka Yesu ainedja emumu embete iyeye: «Moto iyoyo opadea mbi ekɔpi, edii iyo. Mopeani, mobaneani bopele.»45Ehole eimɛa bo na nde mbuti na Yesu, Yudhasi abatama mbuti na nde ko abala na nde bo: «Molehi!» Ko amopa ekɔpi.46Iboa bakina babakea mɔmɔ diko di Yesu ko baso bamopea.47Ekahia omɔti ta tei e ibia badaaka ena atomba mɔmbi mo nde akwɛlɛ mosali o nganga o Ndjakomba o monɛnɛ ko aso amolena itoi .48Yesu abala bo: «Edaki mbi mokondji o batɔmbɔki bɛngi odoeni na mɛmbi ko na pengu apeani?»49Masu masusu nadaaka na nu ta tepelo ko nalehaka, oidoani apeanini. Endelo edii oto bɛngi Makomi makokedjame.50Iboa batingami basusu bamokina ko batia .51Mwenga omɔti atingamaka ngɔngɔ dji Yesu, asadingaka na dala, ko bamopea,52ekahia iyo, asundola dala ko aso atia mbundu.53Bakɛɛ na Yesu ta dii nganga o Ndjakomba o monɛnɛ, iho baputoana na bakondji ba banganga ba Ndjakomba banɛnɛnɛnɛ, basuku ko na balehi ba mobeko.54Petelo akimana Yesu tee oko ta ikanga di nganga o Ndjakomba o monɛnɛ. Iho, adaaka na mobondo esika emɔti na sindjili ba nde aokaka mosa.55Banganga ba Ndjakomba banɛnɛnɛnɛ na Ikita inɛnɛ di Bayudha bahombaka tati ebwani boloma Yesu ta yogo, baiebolodjaka.56Modjɔ mo bato banɛnɛ, babalaka tati dji bokuta tina e Yesu , endelo ibo basusu batikoanaka milɔkɔ.57Bato bakina bangɔkɔ ko bakosa na Yesu mɛko bo:58«Lokaka abala bo: "Mbi nabukabi tepelo iyeye ekɔɔmɔ na mabɔ ma bato, ko ngɔngɔ dji masu masato nabwani natonge ekina iyeye edaa pɛpɛ botongama na mɔmɔ ma bato ."»59Endelo ta modjɔ momina, batikoanaka milɔkɔ mi bobo.60Iboa nganga o Ndjakomba o monɛnɛ angɔ ta boso bo Ikita ko awadja Yesu bo: «Wɛ obwaniti nongo bosɔmbedja eka emɔti ta tati idjidji djiopundakadea na bu?»61Ekahia Yesu apɔpɔnɔkɔ, aisɔmbedjaka nongo eka emɔti. Nganga o Ndjakomba o monɛnɛ amowadjaka na ikina bo: «Wɛ odii Masiya, Mwana o Ndjakomba iyo Odjongoama?»62Yesu amosɔmbedja bo: «Edii mbi. Onɛbini Mwana o moto adii ta ebɔ e baami e Ndjakomba Onɔi na Ngulu; ko bodonga ta matute o diko .»63Iboa nganga o Ndjakomba o monɛnɛ aala bisendja bi nde ko abala bo: «Lohombakadea naikina ba temo ntina nda!64Okini mondumba mosasinga iyo Ndjakomba! Olɛdjɛkɛdeani na modjɔ momina bo?» Ko ibo basusu bamodumba na ikambo ko badhimedja bo abwani na bogwa.65Bakina ta tei e bobo babanga bomotwea masɔi, bamonanga esendja ta miso, bomoboma mabɔtɔ ko babala na nde bo: «Sainedja bo odii motɛli! Loinedja osa oboma nda!» Ngɔngɔ djimina, sindjili batomba Yesu ko babanga bomoboma bipapata.66Ehole edaka Petelo na mobondo ta ikanga, mwali omɔti adoa ena, adaaka mosali mwali omɔti o nganga o Ndjakomba o monɛnɛ.67Aɛnɛ Petelo iyo ookaka mosa, amokokoledja ko abala na nde bo: «Wɛ pongono, oidaaka na Yesu, moto o Nadjalɛtɛ.»68Petolo aingana ko amosɔmbedja bo: «Nitasipoakadea eka epalakadea wɛ bobala.» Ngɔngɔ djimina aimana sokolu, ta monɔkɔ mo ndako. [Iboa kɔkɔ moomi abekoa.]69Endelo mosali mwali amoenɛ na ikina ko abanga botɔndea bato ibia badaaka ena bo: «Moto iyoyo adii omɔti o bobo!»70Endelo Petelo aingana naikina. Ngɔngɔ djimina, ibia badaaka ena babala na nde bo: «Sooti mɛnɛ odii omɔti o ibia badaaka na nde, modjɔ mo wɛ pongono odii moto o Galileya».71Iboa, Petelo akata seleka bo: «Oko ta kombe e Ndjakomba, nitadjebakadea moto iyona.»72Oko ta ehole emina, kɔkɔ abekoa mbala e babae, iboa, Petelo abanga bolɛdjɛ mɛko mibalaka Yesu na nde bo: «Boso bo kɔkɔ abekoe, oinganeadeani mbala djisato.» Petelo aoka ndjokwa ta molema ko aso abanga boyea biyo.
The Seed Company