MALAKA11
1Ehole ebatamaka bo na ibonga i Yelusalɛmɛ, baimeaka ta Betepasa e Betania, mbuti na makoli ma Olipa; Yesu alomaka batingami ba nde babae.2Abalaka na bu: «Kɛni ta ngando yena edi boso bo bino. Ehole aimeakeno, wataneakeni mwana, o tito okabee bo, ane atingi; yona oda moto pɛ bobakama boso. Motingoani ko duani na yu.3Moto akohɔdjɔni: “Tina ndani wakɔkɔni bea”, balani na nde: “Kumu adi na ikamba na yu, na bea aesɔmbedjakedea pɛpɛlɛ .”»4Bakɛkɛ ko bataneaka mwana o tito omina atingi sokolu, mbuti na ekukɛ, na ndjea; ko baetingoaka.5Bato badaka ena babahɔdjɔkɔ: «Eka akɔkɔ no nda? Tina ndani watingoakani mwana o tito iyo?»6Babasɔmbedjaka oko moda mobalaka Yesu na bu, ko babakinaka bokɛ.7Bahulaka na mwana, o tito okabee bo ane, adi Yesu. Babakeaka bisendja bi bobo ta diko i tito ko Yesu abakamaka ta diko i yu .8Emumu e bato enɛnɛ baandaka bisendja bi bobo ta ndjea ko bakina bapeaka mango ma mabia mabukakabo ta gbie .9Bato ibadalaka boso bo Yesu ko na bia bamokimanaka badaka bagama: «Odjana adi Ndjakomba! Ko Ndjakomba adjongoe yona aduake na kombe e Kumu!10Ekumu edae ta bokumu bua baduake, bokumu bo Dapiti Sange e biso! Odjana ta bisika inɔi na diko i losusu !»11Yesu akweaka ta ibonga i Yelusalɛmɛ ta tepelo. Ngɔngɔ iboendja misusu midaka mbuti na nde, akɛkɛ ta ibonga i Betania na bapɔsɔlu ba nde domi na babae, tengasa eimeaka mɔmɔkɔ.
Yesu alakedji mole mo pigi
12Aya busa, ehole ekinaka bo ibonga i Betania, Yesu aokaka ndja.13Aenɛkɛ bohali mole mo pigi molumaka na kasa, akɛkɛ na elɛndɛ ebotanea mbuma; endolo ehole eimeaka yo mbuti na mole, ataneaka oto kasa; tengasa eidaka bodidi bo mbuma i pigi.14Na bea Yesu abalaka na mole mo pigi: «Moto atayabi naikina seko na seko mbuma i wɛ!» Ko batingami ba nde baokaka.Yesu ta tepelo
15Baimeaka ta ibonga i Yelusalɛmɛ. Yesu akweaka ta tepelo ko abangaka bobengana bato i batɛkɛkɛ na i basombaka ta ikanga i tepelo. Adumbakaka mesa i batɛki ko na bidie bi batɛki ba bimbenga ,16ko aikinaka nongo moto atombe eka ta tepelo.17Na bea, aimeaka bobaleha ko abalaka: «Ta makomi, Ndjakomba abalaka: “Ndako e mbi ebeamabi ndako e miongɔnɔ tine bato ba bikomi bisusu bi ngondo.” Endolo ino, oimedjini etondo e baubi !»18Bakondji ba banganga ba Ndjakomba na balehi ba mobeko aokaka bo bea, bahombaka enɔeli e bowa Yesu. Na bea, badaka na bɔɔ na nde, tine bato basusu bakamoaka na bileho bi nde.19Ehole e mɔmɔkɔ, Yesu na batingami ba nde baimaka ta ibonga inɛnɛ .Yesu na mole mo pigi mokakanake
20Aya busa ehuma, yana adakabo banɔe, batingami baenɛkɛ mole mo pigi mokakana mosusu mbunoko nginga.21Piɛlɛ asɔmbedjaka malɛno ta meako minɔkɔ ko ahɔdjɔkɔ Yesu: «Labi, endja mole mo pigi imolakedja wɛ mokakani mosusu.»22Yesu abalaka na batingami ba nde: edi soti «Dani na bodima adi Ndjakomba!23Okobea, nabali na nu: Edi soti, yona obalakabi na ikoli: “Donga ta polo yena ko sadumba ta duwa”, ko amiti daa na kitɛ ta molema mo nde, endolo na edimeli meako mabalaka yo makɔmɔke, makokedjamake tina e nde.24Na tina emina, nabalaka na nu: losusu lohɔdjɔkɔbino ta miongɔnɔ, dimani boo obolodjini, ko miopamakabini.25Ko ehole emino diko tine bongɔnɔ, okada na modjɔ na mwange e wɛ, moyɛ, na bea sange e bino yona odi ta busa aoyɛkeni pongono mabe makɔi no. [26Endolo omiti yɛni babinanu, sange e bino odi o diko atoyɛbini mabe makɔi no .]»Bokondji bo Yesu bodonga djɔɔ?
27Bahulaka naikina ta ibonga i Yelusalɛmɛ. Yana adakabo ta ikanga i tepelo, banganga ba Ndjakomba, na balehi ba mobeko ko na basuku ba ibonga baduaka mbuti na nde.28Bamohɔdjɔkɔ: «Na kpatsi enda akɔkɔ na wɛ midjɔ mi? Opa kpatsi emina nda?»29Yesu abasɔmbedjaka: «Napalaka nohɔdjeni ihɔdjɔ imɔti; sɔmbedjanini, ko mbi notɔndeakeni kpatsi akɔkɔ na mbi meako mimina.30Inelo i Yoane idongaka adi Ndjakomba kaoko adi bato? Sɔmbedjanini .»31Endolo balɛdjɛkɛ ta tei e bobo ko basabaleanaka: «Lokasɔmbedja: “Idongaka adi Ndjakomba”; alohɔdjɔke: “Tina ndani oidimeani Yoane?”32Ko lokamosɔmbedja: “Idongaka adi bato...”» Badaka na bɔɔ na emumu e bato, tengasa bo basusu balɛdjɛkɛ Yoane adi soti mbaeli o Ndjakomba.33Na bea basɔmbedjaka Yesu: «Lotadjebaka.» Yesu abalaka na bu: «Edi bopele! Mbi pongono, nitotɔndeakeni na kpatsi e ndani akɔkɔ na mbi midjɔ mimina.»The Seed Company