1Biaa Iesu ta se ilei axumuli xan no tsi asasing ta sangaul ma ga laa lua, asuk tali abia watwat ma banam sin di ngali tulen atsuulngi no salawa ma atoaa no mat laxen maramase,2ma a tulen di ngali baais taman xan Maradaan Moroaa ma ngali atoaa biaa di, di ta maramase.3Iesu ga asaaiti di, â Gim nangaam adi xaa was sin abala inesâ na xap xa xudak, na xap xa tutuel, na xap xa tsoki, na xap xa xuxute ma na xap xa uga bula mii gim.4Sen anua gim laa tsap lalon, gim na manman atia lalon til gim ta papaalii abia inaman laba.5Nawe no inaman di xap sirawaa gim lalon abia xobel, gim na panlii kuku sin no xaden gim nawe gim tapaas papaalii abia xobel ngali asen so malen xa papaare leng ngali epuske mii di.â6Lowas no tsi asasing di tapaas laa lalon no xobel xuxuuk di ga baais taman Inesaait Mamainaang ma di ga atoaa no inaman lalon abia no xolot araraa.
Erot adodo xuduxudu ngali Iesu
7Erot,gawana ina no prowins Galili ma Peraiʼa, alongmen abala no maarang ta tsap ma xan adodo asuk xap matul axaau. Amuina biexaal di we Jon a se tapaas mula sin minet.8Biexaal di we Elaija a se asemat, o biexaal bula di we, iexa ina no propet in ti laamua a sebula tino mula.9Oro Erot ga paare, â Iaa se ritlii xuan Jon. O saa aila, iaa ta alongmen ta sebula xosaraa abala no maarang?â Ma ga xonon ngali na lasi ia.
Iesu atabali 5,000 ina inaman
10Biaa no aposal di ta se mula laa di le asaaiti Iesu taman no sen maarang di ta se xosaraa. A giwaa di mii ia ma di ga arie laa xasinge di tsaa lalon xobel Betasaida.11Oro biaa malep, di se sinaae sin Iesu itaa naba ta laa ma di ga suk amusili ia. Iesu a suei di ma ga asaaiti di taman xan Maradaan Moroaa, ga atoaa abia di, di ta maramase.12A se nale, o no sangaul axuuk ma ga laa lua ina tsi asasing di ga xaalame sangan Iesu di ga we, â Tulen abala malep laa lalon no xobel atat ngali di ba laa tsal xadi luxaal ma xaa xolot ngali urange amuina gita man lalon xobel biil.â13Iesu ga xisi, â Gim na tabali di taman xaa luxaal ngali di ba angen.â Di xisi, â Alima no tsoki ma alua mu no xoo bala, o giem xap pupua ngali uuli xaa luxaal ngali abala xariin malep.â14A pupua malen alima no tausan ina taamat.O Iesu ga paare sin xan no tsi asasing ga we, â Gim na atsotsoi no taamat sin no xumkumul ina no sangaul alima ina taamat.â15No tsi asasing di xosaraa weaatia o no inaman araraa di suk tsotso lapula.16Iesu adi no tsoki ta lima ma no xoo ta lua, a nanen laa balalangit ga putsangi axaau sin Moroaa ma ga tsabaxi no. Mil ga tali sin no tsi asasing ngali di ba tabali no inaman.17No inaman di angen ma di ga suk maaslii no xolot ina luxaal. No tsi asasing di adi sangaul ma ga laa lua ina tep ma di ga tuali xadi no ngaalngaal.
Pita a paare leng taman Iesu
18Sin biexa leng, Iesu a laa sausawit mii xan no tsi asasing lalon biexa xolot ta xap xa inaman ma Iesu ga atsuraa di, â Balawaa no malep di we iaa saa?â19Di xisi, â Biexaal di we, iu Jon unaaxaxadaan, biexaal di we, iu Elaija, biexaal bula di we, iu xa ina abia no propet in ti laamua, o ga sebula tino mula.â20O Iesu ga atsura, â Oro gim, gim we iaa saa?â Pita a xisi, â Iu xan Karisito Moroaa.â21Iesu atewaai di ngali di na tilaamamil ngali xap asaaiti xaal taman abala.22O Iesu ga we, â Xan Tsi Taamat naba alet sosong sin no daan mat maarang, ma no xusaak, no lalaamua ina no unsausawit ma no unaasasing ina lo di ba palolii ia. Ma di ba sas amantei, o mulina nanaatuul ina leng naba tapaas mula taman tino.â23Iesu ga paare sin di araraa, â Nawe xa a saan ngali amusili iaa, na suk adodolii ia tsaa, ma na atsaxei xan tongol sin no daan leng ma na amusili iaa.24Nawe saa ia ta taxaariti xan tino lalon xolkolmoxo, naba xosorlii, oro saa ia ta tali xan tino lalon xolkolmoxo ngali iaa naba tino.25Xan sen axaau taamat naba adi nawe a tapkina abala xolkolmoxo o mil ia tsaa ga xap adi tino laaliu?26Nawe xa a mangiel sin iaa ma nugu no totore, Xan Tsi Taamat bula naba mangiel sin, nawe a xaalame taman xan minaalam ma xan no minaalam xan Mom ma no angelo pat.27Iaa asaaiti gim taman so, biexaal ina gim di ta tiltil atalaa di ba xap mager met sin di ba ta setauan lasi xan Maradaan Moroaa.â
Iesu mii Elaija ma Moses
28Iesu asaait taman abala o mulina no leng ta paasaatuul ta se liu, A giwaa Pita, Jon ma Jeims ma di ga laa ningning lapalaa papan biexa buk.29Biaa Iesu ta lo sausawit, xan nanen asuk tsap xaatsap ma xan no uga disdis asuk iaas buxa malen tsilatsila.30No taamat alua, ilaa Moses ma Elaija,31delu asemat taman minaalam ina tsilatsila, ma delu ga papaare mii Iesu. Detuu papaare taman Iesu naba ta poroklii xolkolmoxo, biaa naba ta taxaa puaa tia Jerusalem.32Pita mii no turan, detuu suk mata uʼurange, oro biaa detuu ta pade axaau maaba, di suk lasi xan minaalam Iesu ma biaa delulu ta tiltil mii.33Biaa Moses ma Elaija delu ta we na se papaalii Iesu, Pita asuk paare sin, â Manmanel, asuk axaau gita na le man ataala. Gita na atilngi xaa baul na tuul ataala, num ka, xaka Moses ma xaka Elaija.â (Pita a xap atii sawe abia ta papaare taman.)34Biaa ta lo papaare tsaa, pu xelangit atsap, ma ga ngaati di ma di ga suk mataa, biaa di ta tsiga lalon abia xelangit.35O inan xa axaal lalon abia xelangit ga we, â Ilawaa, nugu tsi, iaa ta se axilangi. Gim na lolong sin.â36Biaa ine a se papaare xap, o detuu ga lasi Iesu ta se tiltil ia xasinge. No tsi asasing detuu xap asaaiti xa sin abia aua taman sawe detuu ta se lasi.
Iesu atoaa tsi, salawa tsaxa ta tsigaii
37Sin leng papan, biaa di ta se tsuul lapula xaal papan buk, xariin malep di le sabasue ia.38Lasi, iexa taamat lalon abia malep asuk ilei Iesu, â Unaasasing, iaa suk ningi iu ngali u ba lasi nugu tsi, ilawaa nugu nan tsi mu.39Salawa tsaxa alogotsi ia o ga tunga ma ga xaa xuup, a xaa lii adidiiri lapula ma no biso ga xaa tsuul lalon ngutsina. A xap xaa papaalii ia, ma ga tsaalen ia.40Iaa ningi num no tsi asasing ngali di na saali aia salawa tsaxa o di ga xap pupua.â41Iesu a xisi, â Gim no muun taltaalnge ma no utmilmil ina namaang morokon. Saapuaa iaa ta manman mii gim, o gim ba ie tinaalnge langisa? Tali num tsi tala.â42Biaa iwaa tsi ta lo es xaxaalame, iwaa salawa tsaxa alii ia papan pula ma ga suk didiir. Oro Iesu asuk imii iwaa salawa tsaxa, atoaa iwaa tsi ma ga taal mulangenai laa sin xan mom.43No inaman di suk tunga sin abia xan watwat ma xan minaalam Moroaa. Biaa no inaman di ta lo adodo xuduxudu sin abia maarang Iesu ta xosaraa, o Iesu ga paare sin xan no tsi asasing,44â Gim na lolong axaau sin sawe iaa ta wena asaaiti gim taman. Xan Tsi Taamat di ba babel talipapan no liman no taamat.â45Oro di xap leng sin muina abala totore. Balawaa totore asuk man xuxii sin di ngali di ba xap tsiili. Di ga mataa ngali atsuraa Iesu taman.
Saa asuk lot buxa?
46Biexa inemagaae atsap lolobet ina no tsi asasing ngali saa naba suk ies lot labatina di.47Iesu a se atii xadi no adodo ina butsa, ga giwaa tsi dokdok ma ga atilngi sangan.48Ma ga paare ngali di, â Nawe saa ia ta suei atatoni aila tsi dokdok sin iesan iaa, a malen mu ta suei atatoni iaa, o nawe saa ia ta suei atatoni iaa, a malen mu ta suei atatoni iwaa ta tulen iaa. Amuina saa ia ta adokdoki labatina gim araraa, a ies lot lalon no matan Moroaa.â
Taxaa taman iesan Iesu
49Jon asaaiti, â Manmanel, giem tii lasi iexa taamat ta tulen atsuulngi no salawa sin iesaam ma giem xonon ngali tilbanti amuina ia a xap ina gita.â50Iesu a xisi, â Gim nangaam tilbanti, nawe saa ia ta xap epuske mii gim, ia mu ina gim.â
No Samaria di epuske mii Iesu
51Leng a se atat ngali Iesu naba se laa balalangit, o ga adodo watwat ngali laa Jerusalem.52A es laa lalon xolot Samaria ma ga tulen no ngutsu ngali asaaiti no inaman lalon biexaa xobel ngali di na taxaaturung ngali xan tsinap Iesu.53Oro, no inaman atia di xap sirawaa ia, amuina di se atii we Iesu naba laa Jerusalem.54Biaa xan no tsi asasing, Jeims ma Jon delu ta alongmen abala delu suk atsuraa Iesu, â Orong, u saan ngali gelu na asaaiti Moroaa ngali na tulen ie xaal balalangit ngali le xosor atsoti di?â55Oro Iesu aputsi ma ga imii delu,56ma di ga se laa sin biexa xobel xaatsap.
Iliil ngali amusili Iesu
57Biaa di ta lo eses laa lalon sal o iexa taamat ga asaaiti Iesu, â Iaa ba amusili iu sin no xolot araraa u ba ta laa sin.â58Iesu a xisi, â No xapunakok di ie mat ma no maan di ta lolo lapalaa di ie uni, oro xan Tsi Taamat a xap xa xolot ngali atetei xuan.â59Ga sebula asaaiti iexa taamat, â U na amusili iaa.â Oro, iwaa taamat a xisi, â Orong, u na setauan poroklii iaa ngali iaa ba laa punami nugu mom.â60Iesu ga paare ngali, â Papaalii no minet di na punami xadi no minet tsaa, oro u na laa ma baais taman xan Maradaan Moroaa.â61Ma iexa taamat a sebula paare, â Iaa ba amusili iu, Orong, maarang mu iaa na ben mula ngali laa xubalaasaai sin nugu matenaanua.â62Iesu a xisi, â A xap xa taamat na taxaana ios ngali tsupki pula o ga nanen mula, a xap pupua ngali inatalil lalon xan maradaan Moroaa.â