1Biaa Iesu ta se araraai xan no papaare sin xadi lolong no inaman, asuk tsiga Kaperanaam.2Tia, xan untutule lalaamua ina no unmakmaxil a maramase ngali na se met. Iwaa lalaamua ina no unmakmaxil asuk titii buxaai iwaa xan untutule.3Iwaa lalaamua ina no unmakmaxil alongen Iesu ta tsap ma ga tulen no xusaak ina no Jiu laa sangan ia, ngali di na atsuraa, ngali na xaalame ma na atoaa xan untutule.4Biaa di ta xaalame sangan Iesu di suk asaait awatwati weaatalaa, â Ilawaa taamat asuk saan ngali una xosaraa abala sin,5amuina a titii buxaai xida xobel labalaba Judaia ma ga xosaraa xida anua sausawit.â6O Iesu ga laa mii di. Tii xap mager tsap atataaen anua, iwaa lalaamua ina no unmakmaxil ga tulen no turan ngali asaaiti ia weaatala: â Orong, nangaam adodo xuduxudu, amuina iaa xap axaau buxa ngali u ba xaalame tataaga.7Biaabi iaa ga lasi malen iaa xap pupua ngali xaalame sangaam amuina iaa xap mamainaang buxa ngali xaalame sangaam. Oro u na paare mu ngali nugu untutule naba tuo.8Ngali iaa tsaa taamat, iaa manman paina banam, nugu no unmakmaxil di manman paina iaa. Iaa xaa asaaiti aila, â Laa,â o ga laa; o iliaa, â xaalame,â o ga xaalame. Iaa xaa asaaiti nugu untutule, â xosaraa abala,â ga xaa xosaraa malen iaa ta xaa paare.â9Biaa Iesu ta alongmen abala, asuk olol buxa sin ia, ga putsi laa sin abia malep ta amusili ia ga paare, â Iaa asaaiti gim, iaa xap tatanginai xa na ie xariin tinaalnge tala Israel malen aila.â10Mil biaa no taamat di ta xaalame sangan Iesu, biaa di ta se mula laa nan anua, di se laa tatanginai iwaa untutule ta se axaau.
Iesu atoaa xan tsi iexa aina xan maxis ta se met
11Mil mu, Iesu a laa lalon inaman laba Nain o xan no tsi asasing ma xariin malep di tii laa bula mii ia.12Biaa Iesu ta se laa atataaen matan mat ina abia inaman laba, di alet atsuulngi iexa tsi ta se met. Xan tsi taamat iwaa aina ta xuuk mu xan maxis tii se metlii taman. Biaa xariin malep lalon inaman laba di laa mii ia.13Biaa Orong ta lasi iwaa aina, asuk titii buxaai ia ma ga asaaiti, â Nangaam teng.â14Mil ga laa lapalaa ga taana abia xabangas tongaan ta tete papan, ma biaa di, di ta atsaxei ia di suk til wat. Iesu ga paare, â Taamat xulaau, iaa asaaiti iu, u na tapaas!â15Iwaa tongaan a tapaas ma ga suk papaare, o Iesu ga giwaa laa sin xan nagaa.16No inaman araraa di tii us taman xariin minataa ma di tii ga suk paʼii Moroaa, di ga paare weaatalaa, â Ilawaa xariin propet so, a se tsap labatina gita. Ma gita se lasi no liman Moroaa ta taxaa talaawaaâ17Balawaa inesaait ina Iesu asuk sol sin no xolot araraa Judaia ma biaa no inaman laba atataaen.
Iesu ma Jon Unaaxaxadaan
18Xan no tsi asasing Jon di tii asaaiti ia, taman abala no maarang. Tii ilei delulu,19ma ga tulen delulu ngali laa atsuraa Orong: â Iu mu Karisito iwaa naba xaalame, o giem ba lo liliis tsaa ngali xa, xaatsap?â20Biaa lo taamat delu tii le tsap sangan Iesu, delu ga paare, â Jon Unaaxaxadaan a tulen gelu xaalame sangaam ngali le atsuraa iu: â Iu mu Karisito iwaa naba ta xaalame, o giem ba lo liliis tsaa ngali xa xaatsap?â â â21Sin abia leng, Iesu atoaa no daan inaman di tii ie maramase ma ga saali no salawa morokon ta tsigaii di, ma ga atoaa no matababa.22O ga xisi delulu, â Gulu na mula, ma gulu na atolomi sin Jon, sawe gululu ta se lasi ma alongmen: No matababa di se nanen, no xadek met di se eses, biaa no taamat taman minet basbas di se tuo, biaa no talingaban di se lolong, biaa no inaman di ta se met, di se tapaas mula ma di se baais taman inesaait mamainaang laa sin no muun was.23Atubudaani aia taamat ta xap xol laa palaaen amuina sin iaa.â24Mulina xan no tsi asasing Jon, delu tii se laa, Iesu a sebula papaare sin abia malep taman Jon, â Gim tii laa lalon xobel biil, ngali laa lasi sawe? Biaa lenlil maal ta lo mamaalen?25Nawe a xap, O gim tii laa ngali lasi sa? Taamat ta tamtuel lalon no uga mamainaang buxa? A xap! Biaa di, di ta tamtuel lalon no uga mamainaang buxa xadi no iliil ta lapalaa ma di manman lalon no xariin anua.26Oro gim tii laa ngali laa lasi sa? Xa propet? Iou! Iaa asaaiti gim, Jon asuk lot buxa ngen tsaa no propet.27Balawaabi di ga atalaa abala ngali aia xa.â â â Iaa ba tulen nugu ngutsu laamuangen iu,iwaa naba ta taxaaturungi num sal laamuaan iu.â28Iaa asaaiti gim, labatina no inaman araraa, biaa di, no aina di ta taxaana, a xap xa na lot buxa ngen Jon, oro iwaa ta dokdok buxa lalon xan Maradaan Moroaa asuk lot buxa ngen ia.â29(No inaman araraa, ma no unaalalet taakis bula, biaa di ta alongen xan no totore Iesu, di suk nen xilalaa we xan sal Moroaa asuk tutiik amuina Jon tii axadaani di.30Oro no Paarasi ma no unsinaae ina lo di palolii xan adodo Moroaa ngali di, amuina di tii xap muun alet axaxadaan sin Jon.)31â Iaa ba sen apuaa we, abala nan ul in atalaawaa? Di sen parawe?32Di malen abia no tsi dokdok di ta tsotso lalon niaan susune, di xaa ililei engen di:â â â Giem xuina piut ngali gim ba tiilio gim ga xap muun tiili.Giem anaanngi no tso tengteng o gim ga xap muun teng.â33Amuina Jon Unaaxaxadaan, tii xap xaalame ngali ngen tsoki ma nun waain o gim ga paare, â Salawa tsaxa tii tsigaii ia.â34Xan Tsi Taamat a xaalame ga angangen ma nun, ma gim ga paare, â Ilawaa taamat atsaam metmet ia ungogo taman daan watwat, ma xan no turan, no unaalalet taakis ma no untsaxa.â35Oro biaa tino mamainaang ina abia di, di ta amusili sinaae, di asen we aso.â
Aina untsaxa asilii no xaden Iesu
36Iexa ina no Paarasi aningi Iesu ngali laa angen tatan sin biexa nale. Iesu a se laa lalon xan anua aia Paarasi ma ga se tsotso ngali angen.37Iexa aina, a manman taman tino ina namaang tsaxa lalon abia inaman laba, ga atii we Iesu naba le angen tatan aia Paarasi, asuk xaalame taman sobuk xaat ta us taman daan ta tso mamainaang.38Ma ga le til mulina ia sangan no xaden taman no tineng, asuk amadaaki no xaden ia taman xan no didin mat. Ga sil a puraa no xaden ia taman no ulin xuan, anguri no, ma ga patsaa abia daan ta tso mamainaang papan xan no xaden.39Biaa iwaa Paarasi ta ningi ia ngali xaalame tatan, a lasi abala ga suk paare sin ia tsaa, â Nawe ilawaa taamat ia propet, naba atii saa aia ta taana ia ma sen mat laxen aina aia, amuina ilawaa aina untsaxa.â40Iesu a xisi ia, â Saimon, was bala iaa we ina asaaiti iu taman.â Saimon ga paare, â Asaaiti iaa, unaasasing.â41â Lo taamat delu ie xiba sin iexa taamat ngali delu ba xisi mil. Xan xiba iexa taamat a malen no sangsangaul alima ina xuxute (500) o iexa no sangaul alima (50) sin.42Delu adi abia no xuxute oro delu ga xap ie xuxute ngali xisi. Mil iwaa taamat ga adodolii xadelu no xiba amuina delu xap muun xisi no. Lowas, saa ina delulu naba suk titii buxaai iwaa taamat?â43Saimon a xisi, â Manaa, iwaa taamat ta adi xuxute lot tii se adodolii xan xiba.â Iesu ga we, â Num ininte a tutiik.â44Mil Iesu apuxutsi laa sangan aia aina ga paare ngali Saimon, â U lasi aila aina. Iaa le tsiga lalon num anua o u ga xap muun tali xa daan ngali silii no xaʼigi, oro ilawaa aina asilii no xaʼigi taman xan no didin mat ma ga a puraa no taman no ulin xuan.45U tii xap nguri iaa, oro ilawaa aina, biaa iaa ta le tsiga, a xap iaawis sin ngurnguri no xaʼigi.46U xap aturungi daanwe papan xuaaga, oro ilawaa aina a patsaa no xaʼigi taman daan ta tso mamainaang.47Biaabi iaa ga asaaiti iu, xan no namaang tsaxa araraa iaa se adodolii no, asen malen xan titii a buxa. Oro, saa ia ta adodolii dokdok, xan titii a dokdok bula.â48Mil Iesu ga asaaiti ia, â Num no namaang tsaxa, iaa se adodolii no.â49Biaa no xibong di epaare engen di tsaa, â Saa taamat aila, ta pupua ngali adodolii no namaang tsaxa?â50Iesu ga paare ngali aia aina, â Num tinaalnge a se atoaa iu, laa lalon malina.â